VOV4.K’ho- Mho ngai 09/03, tàm Hìu Quôk hội, Mpồl kwang bàng jăt sền bơh Quôk hội dê bè tơngume “Broă lơh jăt gùng dà broă lơh dong kờl, kơrnoăt boh lam bè broă lơh rơndăp ù tiah kờp bơh tŭ Adăt Rơndăp ù tiah geh ai lơh jăt” neh lơh broă mờ ƀòn dờng Hồ Chí Minh, càr Đồng Nai mờ Bình Dương jăt broă lơh pờ tơn tàm internet.

Phó Củ tịc Quôk hội ồng Nguyễn Đức Hải đơs tàm dơ̆ pơrjum

Jăt mpồl jăt sền đơs, bơh jơnau yal bơh 3 tiah do dê, gam uă broă pal lơh loh, hơ̆ là: broă lơh mờ jun yal mờ Thủ tướng Cíñ phủ in kĭ rơndăp ù tiah Ƀòn dờng, rơndăp ù tiah 2 càr tơngai bơh nam 2021- 2030 tŭ do ndrờm lơyài, ƀòn dờng Hồ Chí Minh ờ hềt geh kĭ kơnòl broă lơh rơndăp ù tiah; càr Bình Dương ờ hềt săc rwah geh bơto pơlam lơh rơndăp ù tiah; càr Đồng Nai gam lam lơh rơndăp ù tiah.

Đơs pơndŭt dơ̆ lơh broă, Phó Củ tịc Quôk hội ồng Nguyễn Đức Hải pà gĭt, ală càr mờ ƀòn dờng pal kah ală jơnau sồr nàng lơh geh broă bơtòm tơrgùm rơndăp ù tiah; ală jơnau cih gơrềng tus sac rwah bơto pơlam lơh rơndăp ù tiah; ală jơnau cih bè tam gơl wơl bàr pe tiah rơndăp ù tiah nàng gơ in dipal mờ bơta geh ngan; ală jơnau cih nàng gàr niam gơnoar broă ătbồ dà lơgar tŭ sơrbì ală rơndăp ù tiah phan bơna.

Cau mblàng Lơ Mu K’Yến