Mho ngai 23/02, Mpồl kwang bàng jat sền bơh Quôk hội bơh ồng Dương Thanh Bình, Uỷ viên Ƀan Thường vụ Quôk hội, Kwang atbồ Ƀan Dân nguyện gơwèt Ủy ƀan Thường vụ Quôk hội lơh kwang atbồ mpồl neh geh dơ̆ lơh broă mờ Ủy ƀan Ñân zân càr Dăk Lăk bè broă hòi jà, atbồ mờ ngui ală bơta pràn drơng broă lơh rcang sơndră kòp Kovid-19, broă lơh jat broă lơh adat boh lam bè Hìu sơnơm ƀòn lơgar, gah lơh sơnơm rcang lài.

Jat jơnau yal tàm dơ̆ lơh broă, bơh nam 2020 tus nam 2022, càr Dăk Lăk neh hòi jà bơh kes priă dà lơgar, khà priă 986 tơmàn 632 tơlak đong ai broă lơh rcang sơndră kòp Kovid-19. Càr kung hòi jà bơta pràn mờ dờp bơh ală mpồl cau, cau dùl nă să is tàm lơgar mờ lơgar ndai mờ khà priă 71 tơmàn 355 tơlak đong. Bơh khà priă do, ală anih lơh broă, mpồl lơh broă neh rcang lam lơh broă lơh blơi ală măy mok, sơnơm tơm ba, phan bơna gah lơh sơnơm nàng di pal jơnau sồr rcang sơndră kòp Kovid-19 tàm càr dê. Gah lơh sơnơm càr Dăk Lăk kung neh sền gròi bơto bơtê kwang bàng lơh sơnơm ƀòn lơgar mờ lơh sơnơm rcang lài. Bơh hơ̆, tơnguh uă bơta chài gròi sền kòp, sền gŏ kòp gờñ, lam lơh kơryan ală bơta kòp mờ kơryan kòp di tŭ. Ồng Dương Thanh Bình, Kwang atbồ Ƀan Dân nguyện- Uỷ ƀan Thường vụ Quôk hội tơngkah càr pal sền sơ wì tai broă ai bàr Hìu sơnơm rê tàm ală tiah atbồ, lơh loh gơnoar broă bơh Hìu sơnơm xã, sơnah ƀòn gơwèt mờ broă kham mờ sơm kòp mờ sră bảo hiểm Y tế; tơnguh uă bơta niam kham, sơm kòp tàm Hìu sơnơm kơnhoàl nàng tơrmù ƀà khà cau kòp lòt kham tàm hìu sơnơm hơđang; sền gròi tai bè priă bơcri ai ală Hìu sơm mờ gah lơh sơnơm ƀòn lơgar tàm ù tiah càr dê.