VOV4.K’ho - Mho òr (03/04), mpồl kwang bàng lơh broă bơh Ƀộ Nông nghiệp mờ Phát triển Nông thôn neh tus sền broă tơmù hoàc huơr tài bơh mìu dờng tàm càr Quảng Bình. Tàm 3 ngai do, càr Quảng Bình neh gơtìp mìu dờng tàm uă tiah. Do là dơ̆ mìu dờng ờ niam lơh hoàc huơr uă ngan tus mờ broă lơh sa suơn sre, tàm hơ̆ uă ngan là broă lơh sa kàl prang. Mìu dờng neh lơh gơbam rơlao 5 rơbô 900 lồ sre kòi, tàm hơ̆ kơnhoàl Lệ Thuỷ mờr 3 rơbô 700 lồ, kơnhoàl Quảng Ninh rơlao 1 rơbô lồ.Càr Quảng Bình geh rơlao 910 lồ sre ròng ka tàm kòi, uă dra ròng kràng mờ git nđờ jơ̆t gŭ ròng ka gơtìp hoàc huơr. Bŭ lah trồ neh rơhờt mìu, mơya kung gam geh uă bă sre lơh kòi, phan tam ờ jŏ tơngai gơtìp gơbam jrô tàm dà tài tiah thòng tàm ală kơnhoàl Quảng Ninh, Lệ Thuỷ.

Càr Quảng Bình dan mờ Ƀộ Nông nghiệp mờ Phát triển Nông thôn dong kờl sơntìl phan tam, phan ròng nàng drơng tàm broă lơh sa. Bè jŏ jòng, càr dan mờ Dà lơgar dong kờl priă lơh kơl jăp wơl bơtơ̆t mờ brông tơlik dà tàm bơtơ̆t ờ uă tiah neh gơtìp tơrlah; dong kờl priă nàng bơ̆t kơl jăp wơl ală tiah di gơlan tơrlah, ờ kơl jăp nàng làng bol ring niam rài kis, brồ guh wơl broă lơh sa.

Cau mblàng Ndong Brawl