Tơngai tus, Ủy ƀan Ñân zân càr Dăk Lăk dan Cíñ phủ tơnguh broă lơh ồs đèng càl, đèng mat tơngai tàm càr tàm Rơndap ù tiah ồs đèng 8; mhar ring bal rơndap ù tiah ồs đèng càl 8 mờ giă blơi đèng mat tơngai, giă blơi mờ tac ồs đèng càl; mhar ai tơlik kơrnuat cok giă priă, rơ wah cau lơh rơndap broă mờ giă blơi đèng gơ wèt mờ rơndap broă lơh ồs đèng mat tơngai, đèng càl tơrbŏ gùng che.

Đơs tàm dơ̆ jat sền, mò Lê Thị Thanh Xuân, Phó Kwang atbồ Mpồl lơh broă sùm Mpồl kwang bàng Quôk hội càr Dăk Lăk sồr Ủy ƀan Ñân zân càr Dăk Lăk bơ tơl mùl màl jơnau sồr, jơnau dan nàng Mpồl in mblàng lơh loh, sền sơ wì, tơrgùm pơyua tơngume yal mờ Cribơyai Quôk hội in tă bơsong ală kal ke, kòl yan lơh gơlik bơta niam ai bơtàu tơnguh lơh sa- mpồl bơtiàn tàm càr in. Mờ kung sồr Ủy ƀan Ñân zân càr sơlơ tơnguh broă lơh atbồ dà lơgar tàm broă lam lơh broă lơh, adat boh lam bè bơtàu tơnguh năng lượng tàm càr bơh broă sền sơ wì, jat sền.