VOV4.K’ho- Gờñ geh broă lơh bơsong bơta gơguh kas khà priă ù tiah ờ ngan, pleh lơh gơbàn jơnau gơ lời wơl ờ niam jŏ jòng ai broă bơtàu tơnguh lơh sa mpồl bơtiàn in. Do là jơnau sồr bơh Mpồl kwang bàng Quôk hội càr Dăk Lăk dê tàm dơ̆ lơh broă mờ Sở Tài nguyên mờ Môi trường bè lam lơh broă lơh, adat boh lam bè lam lơh ngan ngồn tềm pềr, sơndră hoàc huơr, tơngai bơh nam 2016 tus nam 2021 tàm ngai 13/4.

Jat Sở Tài nguyên mờ Môi trường càr Dăk Lăk pà git, tơrgùm kờp 3 nhai bồ nam 2022, khà tac bro ù tiah tàm càr gơguh uă nisơna mờ 103 rbô dơ̆, gơguh mờr 200% pơndrờm mờ bal dùl tŭ nam lài. Khà priă ù kung gơguh jơnhua pơndrờm mờ quý 4 nam 2021. Tềng đap bơta geh ngan do, Sở Tài nguyên mờ Môi trường neh geh sră nggal tă pơgồp jơnau đơs mờ Ủy ƀan Ñân zân càr đơng lam ală kơnhoàl gròi sền nền nòn broă tam gơl jơnau kờñ ngui ù.

Mpồl kwang bàng Quôk hội lơh kơnòl gròi sền sồr, Sở Tài nguyên mờ Môi trường càr Dăk Lăk sơlơ tơnguh broă mblàng yal, bơto bơtê adat boh lam nàng lam lơh jat ngan ngồn tềm pềr, sơndră hoàc huơr geh cồng nha. Mờ kung sền gròi tus broă atbồ kes priă dà lơgar, cau lơh broă, phan bơna di mờ jơnau sồr; gàr broă tơnhàu, ngui ală phan kuơ bè ù tiah, phan kuơ tàm ù, dà geh cồng nha, kơ̆ kơljap jŏ jòng sùm.

Cau mblàng K’Duẩn