VOV4.K’ho- Tàm 2 ngai bơh ngai 20 tus ngai 21 nhai 9, Mpồl kwang bàng Quôk hội càr Dăk Nông neh lơh ală dơ̆ tìp mat mờ cau tĕ khà tàm ală xã Nâm N’Jang, kơnhoàl Dăk Song, xã Quảng Tâm, kơnhoàl Tuy Đức, xã Quảng Phú, kơnhoàl Krông Nô mờ xã Quảng Sơn, kơnhoàl Dăk Glong lài mờ bơyai lơh pơrjum dơ̆ 4, Quôk hội khoá 15.

Mpồl kwang bàng Quôk hội càr Dăk Nông tìp mat mờ cau tĕ khà lài mờ bơyai lơh pơrjum dơ̆ 4, Quôk hội khoá 15

Làng bol lơh broă sa suơn sre càr Dăk Nông geh jơnau đơs tàm pơrjum tìp măt mờ cau te\ khà

Tàm ală dơ̆ tìp mat, ală kwang bàng Quôk hội tàm Dăk Nông neh yal bè broă lơh pơrjum dơ̆ 4 Quôk hội khoá 15 kờp dŭ geh bơyai lơh tàm nhai 10 tus; geh sền sơ wì uă tơngume, rơndap broă lơh adat, tàm hơ̆ geh ală Adat geh gơrềng ngan ngồn tus rài kis làng bol dê. Hơ̆ là ală rơndap broă lơh adat làng bol lơh tờm tàm ƀòn lơgar, Adat ù tiah tam gơl, Adat sền gàr cau ngui sa, Adat hợp tak xã. Cau tĕ khà Dăk Nông neh đơs bè uă ngan broă gơlik geh tàm càr, uă ngan là ală bơta ờ niam, bơta kòl yan tàm gah broă ù tiah, sền gàr brê, lơyài tàm broă bơsong sră nggal tàm ƀòn lơgar. Ngan là tàm gah lơh sa suơn sre, cau tĕ khà đơs broă pơlam gùng dà dong cau lơh broă sa in lik bơh bơta “geh kàl tơnhào mơya giă tăc ờ yòm”, “koh kơl mờ tam wơl; tam wơl mờ koh kơl”.

Cau mblàng K’Hạnh