VOV4.K’ho- Ngai 19/05, Ủy viên Đảng Dà lơgar, Kwang atbồ dờng Anih jơnau đơs Việt Nam ồng Đỗ Tiến Sỹ bal mờ Mpồl kwang bàng Anih jơnau đơs Việt Nam dê tus còp mờ chu ñàng tàm Tiah tềl lời wơl rơgồng Trầm- Hìu yàng Phờk Trầm, xã Phụng Châu, Kơnhoàl Chương Mỹ, ƀòn dờng Hà Nội di dơ̆ tơngkah kir sơn rai 132 nam Ngai deh Củ tịc Hồ Chí Minh dê. Do là  tiah Anih jơnau đơs Việt Nam pờ “Jơnau hòi jà gùt lơgar ñă ntàu tam lơh” bơh Củ tịc Hồ Chí Minh dê tàm mang ngai 19/12/1946.

Tàm dơ̆ chu ñàng, Kwang atbồ dờng Anih jơnau đơs Việt Nam ồng Đỗ Tiến Sỹ bal mờ Mpồl Kwang bàng bơh Anih jơnau đơs Việt Nam mờ kwang đơng lam bồ xã Phụng Châu, kơnhoàl Chương Mỹ neh chu ñàng tàm Anih duh khoai tờm mờ rơgồng Trầm, kah wơl ală broă lơh geh lơh tàm hìu Yàng Phờk Trầm dê pơgap mờ do 76 nam. Tàm dơ̆ lòt còp mờ lơh broă mờ kwang đơng lam bồ Ủy ƀan Ñân zân xã Phụng Châu, kơnhoàl Chương Mỹ, ƀòn dờng Hà Nội dê, Kwang atbồ dờng Anih jơnau đơs Việt Nam ồng Đỗ Tiến Sỹ pơyoa jơnau ưn ngài Ủy ƀan Ñân zân xã Phụng Châu dê neh pơgồp bơnah sền gàr Tiah tềl lời wơl rơgồng Trầm- Hìu Yàng Phờk Trầm, tiah Anih jơnau đơs Việt Nam bơtoah ngan geh lơh anih lơh broă bơh chờm tàm rài tam lơh sền gàr dà lơgar.

Cau mblàng K’Hạnh