VOV4.K’ho- Mho ngai 21/08, jơnau yal bơh Gah đơng lam Mpồl ling sền gàr tiah nhàr lơgar càr Kon Tum dê pà gĭt, mpồl ling bơh Gah đơng lam Mpồl ling sền gàr tiah nhàr lơgar càr dê pơgồp bal mờ Mpồl ling sền gàr tiah nhàr lơgar càr Tây Ninh neh lam dong klàs gơtùi dùl nă kơnòm ùr pa tàu 16 sơnam ơm tàm xã Đăk Xú, kơnhoàl Ngọc Hồi, càr Kon Tum gơtìp pơrlồm tăc tus lơgar Campuchia mờ jơnau hơ lơh kông ñân broă nggờk mơya priă nhai uă ngan. Bơh jơnau yal bơh sơnrờp Y Liên dê yal mờ Mpồl ling sền gàr tiah nhàr lơgar in den klau Lê Ngọc Nhất lơh kwèng bơh tàm internet mpồl bơtiàn Facebook tăc khai ai Kông ty bơh sơnrờp in mờ giă 1 rbô 800 dolar Mỹ, tơnơ̆ hơ̆ Y Liên gơtìp tăc tai ai kông ty ndai in.

Tài bơh kơn jơ̆ broă lơh gơ sồr uă ir ờ jai lơh geh, Y Liên kờñ dan rlô broă nàng rê hờ Việt Nam mơya kông ty sồr pal tơm 3 rbô 500 dolar Mỹ halà pal pơndờm geh bơh 3 tus 5 nă cau lòt lơh broă ai kông ty in den hơ̆ sồng ai rê hờ lơgar tờm. Bơtuah ngan Y Liên geh mpồl ling sền gàr tiah nhàr lơgar càr Kon Tum mờ Tây Ninh pơgồp bal dong klàs. Tơnơ̆ tŭ geh dong klàs, mho ngai 20/08/2022, Y Liên neh geh mpồl ling sền gàr tiah nhàr lơgar càr Kon Tum mờ Tây Ninh jun rê hờ Việt Nam bơh Mpồng nhàr lơgar dunia Mộc Bài, càr Tây Ninh mờ rê wơl hờ càr Kon Tum bơtòm tơrgùm măt bal mờ hìu bơnhă.

Cau mblàng Lơ Mu K’Yến