Tơnơ̆ 15 nam lơh jat Jơnau sồr bơh Ƀan Ƀí thư Đảng Dà lơgar dê bè lơh pràn broă lơh Bảo hiểm Y tế tàm bơta pa, tus tŭ do khà cau blơi Bảo hiểm Y tế càr Kon Tum lơh geh rlau 93%. Tàm hơ̆, khà cau blơi Bảo hiểm Y tế hìu bơnhă geh mờr 16%; rlau 85% khà kờp làng bol tàm càr geh lơh, atbồ sră nggal pràn kơl dang să jan điện tử tàm Hìu sơnơm mờ 100% hìu sơnơm xã lơh jat broă kham, sơm kòp Bảo hiểm Y tế.

Đơs tàm dơ̆ lòt sền, ồng Vũ Thanh Mai, Phó Kwang atbồ Ƀan Tuyên giáo Dà lơgar đơs là, bơdìh mờ dong kờl bơh Dà lơgar dê, nàng gàr kơ̆ mờ pơn jat tai tơnguh uă khà cau blơi Bảo hiểm Y tế, càr Kon Tum pal lơh pràn yal tơngĭt, mblàng yal bè broă dong kờl mờ bơta kwơ bơh Bảo hiểm Y tế dê; bơtàu tơnguh broă lơh gah lơh sơnơm dê tàm ƀòn lơgar, ngan là tơrgùm tơnguh uă bơta niam kham, sơm kòp, lơh geh ală bơta ƀuơn ai cau kòp in geh tus kham, dờp geh ală bơta dong kờl bơh ală drơng broă gah lơh sơnơm dê.