Jat jơnau yal tàm dơ̆ lơh broă, tơnơ̆ 5 nam lam lơh, bơyai lam lơh jat, broă lơh atbồ Dà lơgar bè atbồ, sền gàr mờ bơtàu tơnguh brê geh lam lơh dùl ròt bal mờ geh cồng nha. Bơh nam  2017 tus tŭ do, ală anih lơh broă geh gơnoar neh sền gŏ, dờp mờ lơh sră nggal lơh glài rlau 6 rơbô 500 dơ̆ lơh tìs adat boh lam tàm gah broă brê bơnơm, tàm hơ̆, lơh glài mờ priă rlau 6 rơbô 100 dơ̆. Pơndrờm mờ tơngai bơh nam 2012-2016, khà dơ̆ lơh tìs gơmù rlau 44%. Broă lơh tam brê neh geh uă cồng nha niam, tơnơ̆ 5 nam, jơh gùt càr tam geh rlau 12 rơbô 400 lồ brê, tàm hơ̆ tam brê lơh sa rlau 10 rơbô 100 lồ, ai gam wơl là tam brê rcang gàr bồ tô dà, tam brê ngui kwơ màng.

Đơs tàm dơ̆ lơh broă, ồng Trần Tuấn Anh, Kwang atbồ Ƀan Kiñ tế dà lơgar sồr, Ƀan Thường vụ Tỉñ ủy Dăk Lăk pơn jat tai sơlơ tơnguh bơta đơng lam bồ bơh Đảng dê gơwèt mờ broă lơh atbồ, sền gàr mờ bơtàu tơnguh brê. Tàm hơ̆ pal sền gròi rlau tai tus gơnoar broă, kơnòl broă bơh cau atbồ tàm ală dơ̆ broă geh gơrềng tus broă lơh tìs adat boh lam bè brê. Càr Dăk Lăk pal lơh jat niam ngan broă kờp sền, sền sơ wì gơwèt mờ ală rơndap broă lơh lơh niam wơl brê geh is, tam gơl jơnau kờñ ngui ù brê. Bơdìh hơ̆, càr kung pal geh ală jơnau đơs kờp dŭ lài ală bơta, tàm tơngai tus sền gĭt ală bơta lòng mờ bơta pơhìn tàm broă atbồ, sền gàr mờ bơtàu tơnguh brê kơ̆ kơljap.