VOV4.K’ho - Uă gah lơh sa tàm càr Dăk Lăk neh sơn đờm tơnguh bơtàu pràn kơl dang wơl tơnơ̆ mờ tơngai jŏ jòng gơrềng bơh kòp Kovid-19. Ală mpồl lơh sa kă bro tàm càr gam lơh ngan chồl pràn lơh sa kă bro tŭ kòp gơtờp ngai sơlơ geh kơrian. Uă bơta pràn pa gam geh ai tàm tơngai tơnguh lơh sa pa càr dê.

Tàm broă tam cah is mờ klơm phan neh geh lơh gơs bơh hìu măi bièr Sài Gòn Dăk Lăk – kông ty Kổ phần bièr Sài Gòn tiah tàm gùl lơgar, ală cau lơh broă gam mhar măi ală bơta rơndeh nàng rơndăp, ntrờn ală phan neh geh klơm gơs, cèng tus anih prăp phan kă bro. Ală mpồl rơndeh tàm tơrbŏ bal ntrờn tàm Hìu măi pà gŏ broă lơh tàm do neh brồ guh wơl tơnơ̆ mờ 2 nam gơtìp gơrềng bơh kòp Kovid-19.

Ală dơ̆ sa hờ bơdìh hìu geh bơyai lơh tàm tiah nhơl chờ, gam là broă rơwah bơh ală mpồl cau nhơl chờ dê tŭ tus tàm càr Dăk Lăk

Bi Lại Thế Nguyên, kông ñân lơh broă tàm hìu măi bièr Sài Gòn Dăk Lăk pà git, bơh tơnơ̆ mờ satềp nam 2022, ală broă lơh bơh hìu măi neh brồ guh wơl mờr 80% bơta pràn, kông ñân neh tus wơl lơh broă bè ờs mờ ală kwang bàng, kông ñân tàm kông ty gam lơh ngan tàm pơrlòng, lơh ngan lơh gơs mờ sơrlèt mờ rơndăp broă neh geh ai bơh Kông ty dê. “Oh mi kông ñân bal mờ ală kwang bàng, kông ñân, cau lơh broă tàm Kông ty lơh ngan jơh jăt niam kơnòl bơh Tổng Kông ty ai, kung bè khà geh bơh Kông ty dê. Lơh ngan tàm nam do geh lơh gơs kơnòl mờ geh khà niam rơlao mờ nam lài”.

Kông ty TNHH pơn diang phan rơndeh ôtô An Phước, càr Dăk Lăk kung neh sơrlèt mờ gơl gùng kal ke ngan, mờ 107 rơbô tấn phan kă bro neh geh pơn diang tàm 3 nhai bồ nam. Ồng Phạm Đông Thanh, Kwang atbồ Kông ty TNHH pơn diang ơtô An Phước, càr Dăk Lăk pà git: Tŭ do kông ty neh lơh geh 100% bơta pràn ngui bơh mpồl rơndeh dê. Bal mờ ală sră blơi tus bơh ală cau blơi ờs mờng, Kông ty neh dờp geh uă pang sră blơi phan tus bơh ală cau blơi geh bơta pràn ndai. Ồng Thanh đơs là, cồng nha do là tài geh kwang bàng đơng lam Kông ty neh bơsong niam jơnau ờ tơnguh khà priă pơn diang, mơya kung gam gàr niam khà priă geh bơh Kông ty dê tàm tŭ khà priă xăng jờu mờ uă bơta khà priă ndai gơguh sùm: “Bol añ ai geh gùng dà broă lơh, jòi uă cau geh phan nàng gơtùi ai phan nàng mpồl lơh sa kă bro in lơh broă bè ờs. Bơdìh hơ̆ tai, bol añ kung ai geh ală gùng dà broă lơh nàng tềm pềr xăng jờu, tàm hơ̆ bol añ lơh ngan pơgồp bal phan kă bro nàng pleh mờ broă lòt gời. Khà geh tơl phan lòt bàr đah geh lơh ngan geh tàm khà uă ngan nàng pleh mờ bơta hoàc huơr priă xăng jờu”.

                    Kông ty TNHH pơn diang ơtô An Phước, càr Dăk Lăk lơh broă jơh bơta pràn

Lòt gan ală ngai, nhai kal ke ngan, rài kis mpồl bơtiàn tàm càr Dăk Lăk tŭ do kung neh sơn đờm geh wơl. Bơta kal ke bơh kòp gơtờp neh ờ gam lơh aniai tŭ jơh ală kơnòm bơsram ndrờm tus lòt bơsram, ală hìu sơnơm ing neh lơh gơs kơnòl mờ rơhời tus bal mờ broă lơh tờm bơh ală hìu bơsram dê. Tàm nùs nhơm hơ̆, gah nhơl chờ geh pơn jăt tai bơta pràn nàng brồ guh wơl... Mò Nguyễn Thuỵ Phương Hiếu, Phó Kwang atbồ Sở Văn hoá, Thể thao mờ Zu lịc càr Dăk Lăk pà git, broă brồ guh wơl bơh gah nhơl chờ càr Dăk Lăk geh ai bơh tàm ală gùng dà broă lơh yal broă nhơl chờ càr dê ndrờm bal, geh cồng nha tàm ală anih yal tơngit. Ai bơh tàm broă pơgồp bal, pờ ơnàng ală broă lơh nhơl chờ mờ ai tàm ală broă lơh ngan tơnguh uă ngan bơta niam broă lơh drơng ala, lơh pa phan nhơl chờ bơh tơl mpồl lơh sa kă bro dê: “Añ lơh broă mblàng jơnau tàm 2 nam pa do geh uă ngan mờ pràn ngan, den tàng di gơlan là cau năc nhơl chờ neh sền gŏ rùp càr Dăk Lăk mờ cau nhơl chờ git geh rùp rài bơh añ dê nàng cau nhơl chờ geh tơl bơta nàng rơwah tus mờ càr Dăk Lăk, den tàng di tàm satềp mờ ngai ơm rơlô duh kah bơtau Hùng den cau năc tus gal ngan mờ tŭ do kung neh geh broă brồ guh wơl bè khà cau năc mờ ală mpồl lơh sa kă bro gam lơh ngan tàm broă jòi geh cau năc pơgồp bal mờ ală tiah. Nàng tơnguh rơhời khà cau năc dunia tus mờ càr Dăk Lăk den he lơh broă bal pràn mờ càr Khánh Hoà mờ ƀòn dờng Đà Nẵng”.

                           Cau năc nhơl chờ lơh ală broă lơh nhơl chờ tàm tiah nhơl chờ Ko Tam

Nàng lơh jăt jơnau kờñ brồ guh wơl lơh sa mpồl bơtiàn nam 2022-2023, pa do UɃÑZ càr Dăk Lăk neh tơlik broă brồ guh wơl mờ tơnguh bơtàu lơh sa mpồl bơtiàn nam 2022-2023, tàm hơ̆ geh wèt tus khà brồ guh mhar ală broă lơh sa, kă bro tàm càr, chồl pràn ală broă lơh gơguh lơh sa; ai lài ờ uă gah broă kwơ màng, gàr niam broă lơh jăt ală khà broă tơnguh bơtàu lơh sa mpồl bơtiàn neh geh ai. Ồng Nguyễn Đình Trung, Uỷ viên Đảng dà lơgar, Ƀí thư Tỉñ ủy Dăk Lăk pà git: “Càr gam bơyai lơh ai rơndăp broă càr kung bè ai rơndăp broă ngui ù, rơndăp broă tàm ală tiah tơnguh bơtàu. Gàr bơta niam, di pal mờ mùl màl tŭ cau bơcri priă tus mờ càr den ală cau do geh tơngu me nàng kơlôi sơnơng mờ geh sền mờ ai tơlik kơrnoăt bơcri priă. Bè broă dơ̆ bàr tai là pơgồp bal đah ală cau tàm broă lơh sa, do kung là kơnòl bơh càr dê, càr kung pal dờp lơh jăt broă pơgồp bal đah ală cau tàm ală broă lơh sa. Broă dơ̆ pe là broă tăc phan geh lơh bơh broă lơh sa kung bè broă pơgồp bal mờ tiah lơh sa mờ măi mŏk lơh gơs phan ngui sa mờ ală broă bơ̆t bơtàu broă lơh. Tàm bơta geh gơnoar kung bè gơnoar bơh càr dê, càr geh ai tơl bơta ƀuơn ngan”.

Di tàm dơ̆ tơnkah ngai tơnklàs đah jum dà lơgar mờ ngai dunia lơh broă, càr Dăk Lăk sơlơ dờp geh ală bơta tơngŏ niam bè broă lơh sa, cau năc nhơl chờ tus tơl hìu năc ơm, ală tiah nhơl, pơ-rài bồ tơngoh, tiah nhơl chờ. Ală tiah lơh sa mờ măi mŏk tàm càr gam pờ ơnàng mpồng nàng rò ală cau lơh broă; broă tăc phan mờ lơgar ndai pơn jăt tai gơguh pràn tơnơ̆ mờ tŭ neh lơh geh rơlao 1 tơmàn dolar Mỹ tàm nam 2021. Ală dòr bơnơm tam tờm plai gơ-àl, dòr plai jràng neh tus tàm kàl tơnhào mờ cồng nha geh uă bal mờ khà priă tăc geh niam, gam ai geh khà priă nàng dong kờl làng bol lơh broă sa iang nùs lơh sa... ală bơta tơngŏ niam hơ̆ gam pờ geh jơnau kơ̆p kờñ tus mờ broă brồ guh wơl, tơnguh bơtàu lơh sa càr Dăk Lăk dê.

Cau mblàng Ndong Brawl