Là mpồl lơh sa kă bro sơn đờm mut lơh broă tàm tiah mìng lơh broă sa suơn sre bơh kơnhoàl Krông Ana, càr Dăk Lăk dê, tơnơ̆ 5 nam lơh broă, Kông ty Kổ phần Êđê Café neh tam geh 100 lồ kơphe, lơh broă tàm pơdar bơh tam tus lơh gơlik phan mờ tac phan lơh gơs tus tê cau ngui.

Bal mờ drà kă bro tàm lơgar, Kông ty neh tac kơphe tus ală lơgar Malaysia, Singapore mờ Mông Cổ. Bi Y Khoan Niê Kđăm, Kwang atbồ Cơldŭ kă bro Kông ty Kổ phần Êđê café pà git, Kông ty neh ngui uă ngan rlau jơh bơta pràn bơh ală pang mạng xã hội nàng tac kơphe ƀòk mờ kơphe klài lề bơh mpồl lơh sa kă bro dê: “Ală pang mạng xã hội dong mpồl lơh sa kă bro in niam ngan, kơnờm geh internet, kơnờm geh ală pang mạng xã hội den Êđê café sùm jòi ală cau blơi tàm hơ̆. Jơnau đơs bol hi dê là ờ git den bơsram, jơh ală ndrờm geh tàm Google, bơh ờ git rơcang, lơh video bè lơi, halà bơsram bè ală jơnau yal bè lơi den he bơsram is mờ cih is jơnau rơcang lơh he in. Tŭ hơ̆ den hơ̆ sồng geh bơta bơceh pa bơh tơl nă cau dê”.

Gờñ đal git tŭ niam bơtàu tơnguh kă bro tàm măi mok sồ, bơh nam 2019, mpồl lơh broă bal Lơh sa suơn sre HeNa tàm kơnhoàl Ea H’leo mờ Cư Mgar neh lơh pang web is, lơh ală fanpage tàm mạng xã hội mờ tac phan tàm ală anih kă bro điện tử.

Bi Tống Thị Hoài Thương, Kwang atbồ Mpồl lơh broă bal Lơh sa suơn sre HeNa pà git, broă sơlơ tơnguh broă lơh jòi drà kă bro tàm ală pang web neh dong Mpồl lơh broă bal tơnguh priă jền lơh geh uă dơ̆ pơn drờm mờ tac phan tơn: “Bol oh neh tac geh phan bơna tus ală lơgar bè Malaysia, Đài Loan, New Zealand mờ Australia bơh pang mạng xã hội. HeNa kung ngui tai bơta kuơ đo was bè jơnau yal cau blơi, bơh hơ̆ den HeNa neh ngui tai ală broă rơndap lơh yal tơnggit kờñ di tàm jơnau kờñ cau blơi dê den he rơp geh tai uă sră dan blơi phan mờ gơtùi wèt tus uă cau blơi dờng he dê”.

Tus nhai 6 nam 2024, càr Dăk Lăk geh rlau 1 rbô 700 phan geh tac tàm anih kă bro điện tử. Khà broă kă bro điện tử bơh ală anih lơh sa kă bro tàm càr dê tŭ do ơm dơ̆ 5 tàm gùt lơgar. Ồng Lưu Văn Khôi, Kwang atbồ Sở Kông thương càr Dăk Lăk đơs nền, tàm tơngai tus, ală anih lơh broă geh gơnoar rơp dong kờl bè gùng dà broă lơh, tàm tơrbŏ bal mờ bơto pơlam nàng tơnguh pràn jak tac phan tàm ală anih kă bro điện tử ai ală mpồl lơh sa kă bro, mpồl lơh broă bal in: “Nàng dong kờl ală mpồl lơh sa kă bro, mpồl lơh broă bal in tơnguh pràn jak, yal tơnggit hòi jà tac phan lơh gơs tàm càr, Sở Kông thương neh tă pơgồp jơnau đơs ai Anih duh broă làng bol càr in geh ală broă lơh dong kờl ai ală Mpồl lơh broă bal, Mpồl lơh sa kă bro in bè ală broă lơh hòi jà kă bro hơ̆ sồng lơh mat kă bro. Bơdìh hơ̆ tai, bol hi kung pơgồp bal mờ Kụk kă bro điện tử lơh sa sồ nàng pờ ală ơdŭ bơto pơlam, bơto ală jơnau git wă, bơta chài nàng rơhời tơnguh pràn jak yal tơnggit phan lơh gơs”.

Tiến sĩ ồng Nguyễn Ngọc Tuyên, Kwang atbồ Viện Lơh sa mờ atbồ Tây Nguyên đơs là, broă kă bro điện tử neh bơtàu tơnguh mhar mờ pràn ngan tàm tơngai rềp ndo. Jơnau kờñ blơi phan bơh làng bol dê kung neh tam gơl jat gùng dà pa, ngui măi mok. Bulah bè hơ̆, nàng kă bro tàm điện tử bơtàu tơnguh, ồng Tuyên đơs là, mpồl lơh sa kă bro tàm càr Dăk Lăk pal git loh gah lơh phan, jơnau kờñ ngui sa, bơta pràn kă bro nàng sac rơ wah ală phan geh jơnau kờñ uă mờ dipal mờ broă kă bro. Bal mờ hơ̆, sùm sền gròi tus bơta niam phan bơna, lơh jat ală jơnau sồr mờ lơh jat jơnau cih adat boh lam dê gơ wèt mờ phan geh tac tàm drà kă bro wèt tus: “Dan đơs nền là, kờñ tơnguh pràn jak tac phan den cau tờm pal tơnguh jơnau git wă he dê. Dơ̆ 2 là tơrgùm bơto bơtê mpồl cau tac phan mờ ngui tŭ niam măi mok nàng lơh niam broă do tàm tơngai tŭ do. Ngan ngồn den bol he mut tàm ală siêu thị, drà ờs mờng den geh tŭ rơp lơh gơ rềng uă tus priă tă lơh, bè hơ̆ den tàng dilah ngui măi mok den rơp tềm pềr priă tă lơh niam rlau”.

Tơrmù priă tac phan, drà kă bro geh rề ơnàng… Ală bơta ƀuơn bơh kă bro điệnt ử dê gam geh ală mpồl lơh sa kă bro tàm càr Dăk Lăk ngui geh cồng nha. Bơta do pơgồp bơnah tơnguh priă jền lơh geh, ai uă gah lơh phan pràn ngan bơh càr dê mut uă rlau tai tàm drà kă bro ală lơgar.