Tàm trồ tiah ờ hoan noăt tàm drim kàl prang Tây Ngyên dê, tàm ƀlàng Mpồl Pơlam tàp- Ntrờn làm bă tiah Mpồl ling sền gàr tiah nhàr lơgar càr Dăk Lăk tàm xã tiah nhàr lơgar Krông Na, kơnhoàl Buôn Đôn, gĭt nđờ jơ̆t nă ling pa jơh nùs ngan pơs wàs, tùng dơm chi lơh pơng gàr, jrong sơntơ̆p tàm tiah pơlam tàp; tàm anih pơrjum uă ling pa gam iăt kơno jơnau bơto cíñ trị, jơnau pal jat mờ sền gròi pràn kơl dang să jan. Ling nam sơnrờp Lê Thành Huy (18 sơnam), ơm tàm ƀòn dờng Buôn Ma Thuột, pa lòt ling nam 2024, đơs, ală ngai sơnrờp tàm mpồl ling, añ gơ lơh kwi kwơ, kah hìu ngan sơl, mơya geh kwang atbồ mờ cau ling bal sền gròi pơndờm pơnđiang, nùs nhơm neh chờ hờp rlau rcang mut tàm dơ̆ pơlam tàp. Ling nam sơnrờp Lê Thành Huy, đơs: “Mut tàm Mpồl Pơlam tàp- Trờn làm bă tiah, oh geh ală bi atbồ Tiểu đội, Trung đội pơndờm pơnđiang oh, bơto pơlam oh in broă ơm, sa sào, broă lơh tàm rài kis bè pìh phan, pơs hìu, klơ̆u phan, trŭ gơm phan sa, lơh jat jơnau pal jat... jat rùp rài bơh mpồl ling klàng dê. Tŭ do den pràn kơl dang să jan mờ nùs nhơm oh dê niam ngan, rcang mut tàm dơ̆ pơlam tàp ală jơnau bơsram, tàm hơ̆ geh: Ală kơrnoăt sồr mpồl ling, tàm võ, tam lơh tàm tiah tam lơh, cuh phàu bơh Mpồl dê ai”.

Ling nam sơnrờp Nguyễn Xuân Điền (24 sơnam), ơm tàm xã Ninh Diêm, thị xã Ninh Hòa, càr Khánh Hòa kung lòt ling tàm dơ̆ do mờ geh mut tàm Mpồl Pơlam tàp- Trờn làm bă tiah Mpồl ling sền gàr tiah nhàr lơgar càr Dăk Lăk đơs, bèp mờ bi klau kung neh là cau ling geh griăt. Pơn yờ să ngan bè bơhiàn bơh mpồl ling dê, bulah tàm là cau lơh broă gah lòt nhơl mờ priă nhai mờr 10 tơlak đong dùl nhai, bi kung cih is sră dan lòt ling. Ling nam sơnrờp Nguyễn Xuân Điền, đơs:“Mut tàm tơngai pơlam tàp tàm tơngai tus, oh rơ̆p rcang geh pràn kơl dang să jan mờ nùs nhơm niam ngan nàng lơh sir jơh ală jơnau bơsram bơh ală kwang bàng dê jàu. Kơ̆p kờñ bơh oh dê là rơ̆p pơnđơl pràn lơh ngan gơ gơs dùl nă cau ling Wa Hồ, pơnđơl pràn lơh ngan tă pơgồp dùl bơnah pràn kơl dang rơnàng kơnòm să dềt rơhền ai ƀòn lơgar, Dà lơgar in”.

Kàl sac rơwah ling nam 2024 do, Mpồl Pơlam tào- Trờn làm bă tiah Mpồl ling sền gàr tiah nhàr lơgar càr Dăk Lăk geh jàu jơnau kờñ pơlam tàp 109 nă ling pa, tàm hơ̆ geh 70 nă tàm càr Dăk Lăk, 120 nă tàm càr Khánh Hoà. Đại úy Lê Anh Vũ Niê K'đăm- Kwang atbồ Mpồl pà gĭt, jơh ală ling pa tàm dơ̆ dờp ling nam do geh đơs tơl nă ling să jan pràn kơl dang niam, bơsram gĭt wă uă rlau mờ ală nam lài, den tàng broă gĭt mờ ală jơnau bơto bơtê pơlam tàp rơ̆p niam rlau. Mpồl kung neh rcang niam ngan ală bơta ai dơ̆ pơlam tàp pa do in. Đại úy Lê Anh Vũ Niê K'đăm, đơs: “Ală tơngume pơlam tàp kwơ màng, bè: kơrnoat sồr mpồl ling, bơta chài tam lơh ling ù gờl, tơngume 3 dơ̆ ntas là AK-71, sang ƀồm 71, phan bơrtoh 71... ală tơngume do den mpồl ling neh rcang lài niam ngan. Bol añ neh tam pà, jàu kơnòl broă ai ală oh mi in cih jơnau bơto bơtê, lơh dơ̆ pơlam tàp nàng drơng broă niam ngan rlau jơh broă lơh pơlam tàp tàm ơdŭ. Bơdìh hơ̆, broă lơh rcang phan bơna bè tiah pơlam tàp, ƀlàng pơlam tàp kung neh rcang lài jơh lơm rao”.

Gùng lòt 47 nam dờng pràn bơtàu tơnguh, Mpồl Pơlam tàp- Trờn làm bă tiah Mpồl ling sền gàr tiah nhàr lơgar càr Dăk Lăk neh pơlam tàp 72 dơ̆, tàm jàu broă ai Mpồl ling sền gàr tiah nhàr lơgar ală càr: Dăk Lăk, Gia Lai, Kon Tum, Dăk Nông, Khánh Hòa, Bình Định mờ Quảng Ngãi, lơh jat kơnòl broă sền gàr lơngăp lơngai tiah nhàr lơgar bơh Dà lơgar dê. Bal mờ hơ̆, gĭt nđờ rơbô nă ling rcang lài lòt ling tàm ală tiah kung neh geh pơlam tàp, rcang lơh kơnòl broă sền gàr Dà lơgar.

Jat Thiếu tá Phạm Kiều Hưng- Phó Kwang atbồ Mpồl đơs, đòm jat niam bơhiàn bơh mpồl ling dê, tơngai sac rơwah ling nam 2024 do, nàng kờñ gàr niam ai ală ling pa gờñ mờng kwèng, tryang tryồng pơrlòng bơsram mờ pơlam tàp, Đảng ủy, Mpồl đơng lam Mpồl lơh Nghị quyết mìng dùl tơngume, lơh ală broă rơndăp lơh, lơh tơngume dờp, pơlam tàp ling pa, gàr niam jat jơnau đơs “Bơh sơnrờp, geh ngan, kơ̆ kơl jăp”. Thiếu tá Phạm Kiều Hưng đơs: "Jat broă tàm jàu kơnòl bơh Gah đơng lam Mpồl ling sền gàr tiah nhàr lơgar càr Dăk Lăk dê, bơh tơngai sơnrờp tơn den Đảng ủy, Mpồl đơng lam Mpồl neh sền gĭt do là kơnòl broă kwơ màng ngan mờ neh lam lơh kờp sền ală broă lơh rcang bè bồ tơngoh bơto bơtê bơh Đảng dê, phan bơna tiah ơm, sào sa, tiah ơm rlô mờ broă lơh dong kờl tiah pơlam tàp nàng pơlam tàp ling pa lơh geh cồng nha niam ngan rlau jơh”.

Trồ tiah càr Dăk Lăk pồ nam pa, bơkào gơ lì làm sre mìr, brê bơnơm, kung là tŭ kàl pràng gơ gơs duh trơ ồl ngan. Ală ling pa bơh Mpồl Pơlam tàp- Trờn làm bă tiah Mpồl ling sền gàr tiah nhàr lơgar càr Dăk Lăk rơ̆p sền gĭt ală bơta lòng sơnrờp tàm tiah pơlam tàp trồ tơngai duh bè ồs. Mơya mờ nùs nhơm jơh nùs ngan bơh rơnàng kơnòm să dê, do rơ̆p là ală bơta sền gĭt kờñ pal geh ngan nàng lơh geh nùs nhơm bơh cau ling sền gàr tiah nhàr lơgar dê, lơh tus lơh sir kơnòl broă sền gàr lơngap lơngai tiah nhàr lơgar bơh Dà lơgar dê tàm tơl ală tiah lơh broă.