Tàm dơ̆ lơh broă, ală kwang bàng tă pơgồp jơnau đơs geh ngan, nàng kờñ pơgồp bơnah tàm broă lơh bơt bơtàu Sră nggal Pơrjum dờng dơ̆ 14, tàm hơ̆ tơrgùm uă ngan tàm jơnau đơs dồ ết bè bơta bơtàu tơnguh lơh sa- mpồl bơtiàn bơh bồ tơngai lơh  broă tus tŭ do; lơh loh tơngai bơtàu tơnguh pa, tŭ tơngai niam, bơta lòng mờ ală broă geh ai; gĭt nền pơlam gùng dà kwơ màng bơtàu tơnguh tàm tơngai pa.

Đơs tàm pơrjum, ồng Nguyễn Xuân Thắng đơs sùm, tàm tơngai tus, bal mờ broă tơrgùm lơh jat kràñ cê jơh nùs, geh cồng nha rlau tai kơnòl broă kơlôi sơnơng, đơs mờ Đảng bè gùng dà broă lơh bơtàu tơnguh lơh sa- mpồl bơtiàn, Mpồl lơh sa Dà lơgar pal pơn jat tai rcang lài, lài ngan lùp lăp bal, tă pơgồp jơnau đơs ai broă lơh jơnau rcang cih ală Sră nggal yal tàm pơrjum dờng dơ̆ 14 bơh Đảng dê.