VOV4.K’ho- Ală ngai pa do, ală cau lơi kờñ gơboh Dà Làc, kờñ dà tơlir dờng ơning ơnàng bơh ală bă brê nho dê ndrờm ngoh rơngăc ngan tŭ gĭt jơnau geh gĭt nđờ rơhiang tờm chi nho tàm bă brê rcang gàr bồ tô dà gơtìp cau ờ niam mus kơl jơh dùl ròt lơh gơ pừ sơrlồng sơrlàng. Kwang atbồ, gơnoar atbồ tiah do mờ ală anih lơh broă geh gơnoar càr Lâm Đồng dê kung gơ lơh nisơna ngan mơkung pơlai soh ngan sơl tŭ gĭt gơlik geh broă do. Do geh sền là dơ̆ mus kơl brê dờng ngan rlau jơh bơh lài tus tŭ do gơlik geh tàm ƀòn dờng Dà Làc dê. Cau mus kơl brê do khin bơrnañ, bơcrì bơcrà ngan mờ sền ờ sơ̆p adat boh lam.

Tiah mus kơl brê nho gơ pừ dùl ròt tàm tiểu khu 144B, sơnah ƀòn 8, ƀòn dờng Dà Làc, càr Lâm Đồng

Bơh gùng dờng 27C, lòt gan brê jat tiah đah tô pơgap 3 kơi sồ hơ̆ sồng tus tiah gơlik geh mus kơl brê kơn jơ̆ ngan do là lô A, lô B, bơnah 15, tiểu khu 144B, sơnah ƀòn 8, ƀòn dờng Dà Làc, càr Lâm Đồng dê. Do là bă brê rcang gàr bồ tô dà ơm tàm tiah rềp nhàr đah kơnhoàl Lạc Dương mờ Dà Làc, bơnah brê do bơh Mpồl atbồ brê Lâm Viên dê atbồ. Gĭt nđờ rơhiang tờm nho 3 nha gơtìp òt gơ pừ sơrlồng sơrlàng tàm kơh bơnơm jơnhoa, gùt dar geh glòm bơh dà tơlir ơning ơnàng bơh ală bă brê nho gơs mờ niam ngan. Tàm do, bơdìh mờ broă òt gơ pừ dùl ròt jat broă lơh tơn jơh tơn ală tờm chi nho dờng- dềt, cau koh kơl tờm chi jat tơl mpồl tờm nho dềt ơm rah rài tàm uă tiah.

Trung tá Phạm Thị Thu Hiền, Đội Kảñ sát lùp khàu cau lơh tìs bè lơh sa, mờ gơnoar broă Kwang àng ƀòn dờng Dà Làc, cau tàm mpồl bơh mpồl lòt sền tiah koh kơl brê dê neh đơs dờng ngan là, broă lơh mus kơl brê do là khin bơrnañ ngan, cau ngui măy òt ià tê nàng koh kơl dùl ròt. Mờ khà rlau 400 tờm chi nho gơtìp koh kơl gơ pừ bè do den ờ gơtùi mìng geh lơh tàm dùl ngai ờ. Trung tá Phạm Thị Thu Hiền đơs: Tiah đah đơm ne den pa òt ngai òr, ngai nao lơm, ai tiah do den digơlan òt jŏ rlau dùl ết tài bơh nha tờm nho neh ñòp pàl. Hơ̆ là pal òt uă ngai ngan, òt sùm tàm tiah do, pơgap bơh 2 tus 3 ngai den òt dùl dơ̆.

Tiah mus kơl brê nho gơ pừ dùl ròt tàm tiểu khu 144B, sơnah ƀòn 8, ƀòn dờng Dà Làc, càr Lâm Đồng

Bơdìh mờ bơta khin bơrnañ, bơcrì bơcrà mờ sền ờsơ̆p adat boh lam, ală cau do lơh broă lơh tìs mus kơl brê gam là ală cau lơh broă ờs mờng, geh uă bơta mờng chài tàm broă òt chi brê. Cơng tàng sền gŏ bơta do, hơ̆ là ală tiah òt nggu tờm nho dê geh lơh mhar ngan, koh ring mờ song ndrờm bal; tờm nho gơ pừ bơh uă gah tàm rơndap rơndồl bal mơya mờ ờ gŏ lơh gơ kwă, rơndap tăp sèng ngan bè cau lơh broă sa tơnhào phan lơh geh bơh suơn sre dê.

Bơdìh hơ̆, tiah chi brê gơtìp òt ơm di mờ tiah nhàr bơh tiah rềp nhàr bal gơwèt bơnah brê bơh Mpồl atbồ brê Lâm Viên dê at bồ. Broă do mìng geh ală cau gĭt wă ngan, kuèng ngan ù tiah tàm do halà geh bơta dong kờl, yal tơngĭt bơh ală cau tàm gah lơh broă sền gàr brê bơnơm dê hơ̆ sồng gơtùi gĭt bơta do.

Tài bơh tiah mus kơl brê ơm ngài tiah ơm kis mờ tàm bơta ơnàng, den tus ndrim ngai 18/05, ală anih lơh broă geh gơnoar kung gam pơn jat tai lòt sền tiah gơbàn mus kơl, kờp sền khà chi brê gơtìp òt halà kờp sền bơta hoàc huơr. Jat ồng Lê Thái Sơn, at bồ ing Hạt Kiểm lâm ƀòn dờng Dà Làc yal, tiah brê gơtìp mus kơl ơm tàm dơlam brê ngan, broă lòt rê nàng koh kơl mờ pơndiang dơm chi là kal ke ngan gơlik geh, den tàng jơnau kờñ mus kơl brê kal ke ngan nàng sền gĭt. Ồng Lê Thái Sơn đơs: Tiah gơtìp mus kơl là tiah ù tiah kal ke mờ ngòt rngơ̆t ngan, ơm tàm nggùl brê, ờ geh gùng mŭt, ờ rềp mờ tiah cau lơh mìr. Tơnơ̆ tŭ sền gŏ tiah brê gơbàn mus kơl, den mpồl lơh broă geh gơnoar bơh ƀòn dờng Dà Làc dê lơh ngan lùp khàu, jòi kŭp cau lơh tìs.

Tiah mus kơl brê nho gơ pừ dùl ròt tàm tiểu khu 144B, sơnah ƀòn 8, ƀòn dờng Dà Làc, càr Lâm Đồng

Tàm tŭ hơ̆, ồng Nguyễn Văn Sơn, Phó Củ tịc Ủy ƀan Ñân zân ƀòn dờng Dà Làc đơs là, do là dơ̆ òt tơm chi nho dờng ngan rlau jơh bơh lài tus tŭ do gơlik geh tàm ù tiah do dê. Tiah do kơh bơnơm kal ke, ngòt rơngơ̆t, lòt rê kal ke, geh sền là tiah ết geh bơta pơhìn mus kơl brê. Den tàng tŭ dơ̆ mus kơl brê gơlik geh neh lơh kwang đơng lam, gơnoar atbồ tiah do dê nisơna ngan. Mờ do kung là jơnau tờm gơ lam tus broă geh sền gŏ lơyài mờ ờ di tŭ. Kung jat ồng Sơn yal, bơdìh mờ ală tờm chi brê gơtìp koh kơl gơ pừ gam geh rlau 100 tờm chi nho ndai tàm tiah do gơtìp cau trah nggu mờ tuh dà sơnơm khih lơh tờm chi in chơ̆t rơ hời. Tŭ do broă do gam geh anih lơh broă geh gơnoar mhar ngan lùp khàu mờ lơh loh. Ồng Nguyễn Văn Sơn đơs: Jơnau đơs bơh chờm là tiah do ờ geh bơta pơhìn mus kơl uă den khà lòt sền geh gơmù tĕ. Den tàng ờ sền gĭt do là tiah tờm den hơ̆ sồng lơyài sền gĭt. Ai jơnau kờñ mus kơl brê den sùm tus tiah mus kơl là sền gĭt mơ tơn. Mơya gơwèt mờ dơ̆ mus kơl brê do den kung gam ờ hềt sền gĭt sơl. Ƀòn dờng gam sồr anih lơh broă Kwang àng mờ ală gah sơnah lơh broă tơrgùm lùp khàu, pal jòi gŏ cau lơh tìs koh kơl brê do nàng lơh glài kràñ. Mơkung pal sền gĭt jơnau kờñ mus kơl brê do sơl.

Tềng đap bơta kơn jơ̆ ngan bơh dơ̆ mus kơl brê do dê, ngai 17/05, Ủy ƀan Ñân zân càr Lâm Đồng geh sră nggal sồr ală anih lơh broă geh gơnoar mhar lùp khàu lơh glài krañ mờ yal loh làng dơ̆ mus kơl brê tìs mờ adat boh lam do. Bal mờ hơ̆, bơdìh mờ jơnau sồr mpồl cau tờm brê mhar lơh broă rơndap lơh tam wơl brê, lơh niam wơl brê tơn tàm bă brê gơtìp mus kơl, Ủy ƀan Ñân zân càr Lâm Đồng gam sồr Củ tịc Ủy ƀan Ñân zân ƀòn dờng Dà Làc lam lơh glài sền tìs di is nàng lơh loh kơnòl bơh ală anih lơh broă, mpồl lơh broă mờ cau dùl nă să is geh gơrềng nàng lơh glài jat jơnau sồr.

Cau mblàng K’Hạnh