VOV4.K’ho- Ngai 04/8, tàm ƀòn dờng Hồ Chí Minh, mut lơh dar dut ndơl dơ̆ pơrlòng pờ tơlik jơnau đơs gùt lơgar dơ̆ 15 nam 2022. Ồng Đồng Mạnh Hùng, Kwang atbồ Mpồl gơnoar cih sền sơ wì jơnau đơs, Kwang Gơnoar cih dơ̆ pơrlòng pờ tơlik jơnau đơs gùt lơgar dơ̆ 15 pà git, do là dơ̆ pơrlòng geh khà ală tiah tus bal uă ngan rlau jơh, geh 63 càr, ƀòn dờng mờ uă mpồl lơh ƀău bơh Anih jơnau đơs Việt Nam dê. Do kung là nam geh khà jơnau sră ƀău tus bal pơrlòng uă ngan rlau jơh, bal mờ rlau 500 jơnau sră ƀău. Ală jơnau sră ƀău mut tàm dar dut ndơl geh đơs niam ngan, neh đơs bè rài kis tŭ do dê. Pơn rơ là ală broă gơ rềng tus broă ai Nghị quyết pơrjum dờng Đảng gùt lơgar dơ̆ 13 ngui ngan ngồn tàm rài kis, broă sơndră kòp Kovid-19, ală broă bơtàu tơnguh wơl mờ bơtàu tơnguh lơh sa. Kuơmàng geh uă jơnau sră ƀău đơs bè krơh cau niam, broă niam. Do là ală cồng nha bơh sơn rờp bơh dơ̆ pơrlòng pờ tơlik jơnau đơs gùt lơgar dơ̆ do dê. Bơta pa tàm dơ̆ pơrlòng pờ tơlik jơnau đơs nam do là Mpồl bơyai lơh neh lơh nền bơyai lơh pơrlòng mờ jàu khà jờng sap đơs niam, kờñ git gŏ mờ jờng rơ ală cau đơs, cau pơ lam jơnau đơs geh sap đơs, geh bơta chài pơ lam jơnau đơs jak ngan; jàu khà jờng ai 2 bơta: Bơta chài lơh gơs jơnau đơs niam ngan mờ bơta Ngui bơnàng jă sồ.

Tàm ală broă lơh bơh pơrlòng pờ tơlik jơnau đơs gùt lơgar dơ̆ 15, tàm Anih jơnau đơs Làng bol ƀòn dờng Hồ Chí Minh gam geh bơyai lơh ràng tơlik rùp “Cồng nha lơh sa mpồl bơtiàn ƀòn dờng Hồ Chí Minh” mờ “Cồng nha tơnguh bơtàu bơh Anih jơnau đơs Làng bol ƀòn dờng”. Ràng tơlik “Ƀòn dờng Hồ Chí Minh nhăp nhar-tơnguh bơtàu-nùs nhơm niam” ràng tơlik 60 pang rùp bal mờ uă broă lơh sa geh pơnrơ, yal tơrgùm bal  ală broă tơnguh bơtàu lơh sa. Cíñ trị, bơta chài rơgơi, mpồl bơtiàn bơh ƀòn dờng dê tàm ală nam pa do. Ràng tơlik rùp “Cồng nha tơnguh bơtàu bơh Anih jơnau đơs Làng bol ƀòn dờng Hồ Chí Minh” yal tus mờ cau sền ală pang sră, rùp, phan geh pơnrơ ngan tàm broă crơng gơs mờ tơnguh bơtàu Anih jơnau đơs Làng bol ƀòn dờng Hồ Chí Minh dê tàm rơlao 40 nam do. Tàm hơ̆ geh ală broă lơh geh ai tơngŏ Anih jơnau đơs Làng bol ƀòn dờng Hồ Chí Minh bè: jơnau đơs crih làn sóng xanh, jơnau đơs cải lương Bông lúa vàng; Pơrlòng rơndeh coh Nam Kỳ Khởi Nghĩa,... Tàm bơnah ràng tơlik do, gam geh uă phan, phan lời wơl, măi mŏk lơh broă bơh cau ai tơngit jơnau đơs, cau sền sơwì jơnau đơs tàm Anih jơnau đơs Làng bol ƀòn dờng Hồ Chí Minh (VOH) bơh ală rài.

Cau mblàng K’Duẩn mờ Ndong Brawl