VOV4.K’ho- Mang ngai 04/8, tàm Hìu đơs crih ƀòn dờng Hồ Chí Minh geh lơh Dơ̆ sơn đờm mut lơh pơrlòng Pờ tơlik jơnau đơs gùt lơgar dơ̆ 15 nam 2022 mờ tơngume “Rơcang lài tam gơl- Gơ dờp bal sơrlèt gan”. Bơh rlau 500 jơnau cih tus bal pơrlòng, Mpồl bơyai lơh neh rơ wah 203 jơnau cih mut tàm dar dut ndơl tàm ală bơta bơh jơnau cih lơyah, lùp jơnau, jơnau yal, Pờ tơlik tơn.

Đơs đơng lam, ồng Nguyễn Trọng Nghĩa, Ƀí thư Đảng dà lơgar, Kwang atbồ Ƀan Tuyên giáo dà lơgar đơs là, pơrlòng geh bơyai lơh tàm tŭ tơngai jơh gùt Đảng, gùt làng bol mờ gùt ling klàng he gam lơh ngan pơn đơl pràn tàm pơrlòng, lơh ngan lơh jat geh cồng nha Nghị quyết pơrjum dờng cau ala mat gùt lơgar dơ̆ 13 bơh Đảng dê; dùl nùs bal, pơgồp bal bơta pràn lam lơh jat ală gùng dà, broă lơh bơh Đảng mờ dà lơgar dê nàng kờñ bơtàu tơnguh wơl mờ bơtàu tơnguh lơh sa- mpồl bơtiàn tơnơ̆ kòp Kovid-19.

Kwang atbồ Ƀan Tuyên giáo dà lơgar ồng Nguyễn Trọng Nghĩa đơs đơng lam

Ồng Nguyễn Trọng Nghĩa sồr Anih jơnau đơs Việt Nam đơs is, gah Pờ tơlik jơnau đơs Việt Nam đơs bal mờ ală cau lơh Ƀău Pờ tơlik jơnau đơs gùt lơgar pal kah nền jơnau bơto tơngkah bơh Củ tịc Hồ Chí Minh dê. Pờ tơlik jơnau đơs Việt Nam pal gơ gơs là gah cribơyai mpồl bơtiàn mờ jơnau kờñ bơt bơtàu broă lơh dipal, geh bơta pràn kis tàm bơta geh ngan, pơgồp bơnah tàm broă gàr kơ̆ kơljap cíñ trị mpồl bơtiàn mờ bơtàu tơnguh dà lơgar, rề ơnàng làng bol lơh tờm, tơnguh pràn jak đơng lam bồ bơh Đảng, atbồ bơh dà lơgar dê gơ wèt tus mờ mpồl bơtiàn.

Cau mblàng K’Duẩn