VOV4.K’ho- Drim do (10/10), tàm Hìu lơh broă Quôk hội, mut pơrjum dơ̆ 16 bơh Ủy ƀan Thường vụ Quôk hội khoă 15 dê. Geh lơh tàm 3 ngai, tàm pơrjum dơ̆ do, Ủy ƀan Thường vụ Quôk hội geh sền sơ wì, ai jơnau đơs bè ală tơngume kuơmàng geh yal Quôk hội in tàm pơrjum dơ̆ 4, Quôk hội khoă 15 kờp dŭ mut lơh tàm ngai 20/10 do.

Mut pơrjum dơ̆ 16 Ủy ƀan Thường vụ Quôk hội

Bè broă lơh bơt bơtàu adat boh lam, tàm dơ̆ pơrjum do, Ủy ƀan Thường vụ Quôk hội ai jơnau đơs bè jơnau rơcang cih Nghị quyết bơh Quôk hội dê bè lam lơh tơrlòng lài ai gơnoar rơ wah, ngui ƀàng sồ rơndeh oto bơh tàm pơrlòng giă. Ủy ƀan Thường vụ Quôk hội kung ai jơnau đơs tàm Jơnau rơcang cih jơnau yal tơrgùm jơh jơnau đơs, jơnau dan bơh cau tĕ khà mờ làng bol dê pơyua tus pơrjum dơ̆ 4 bơh Quôk hội dê; Jơnau yal cồng nha jat sền broă bơsong, hơ jơnau đơs, jơnau dan bơh cau tĕ khà dê pơyua tus pơrjum dơ̆ 3 bơh Quôk hội dê; Jơnau yal cồng nha wă làng bol, dờp, bơsong sră  pơyua làng bol dê mờ cồng nha jat sền broă bơsong yal yă, yal khài bơh làng bol dê pơyua tus Quôk hội nam 2022 mờ uă broă kuơmàng ndai.

VOV Tây Nguyên- Cau mblàng K’Duẩn