Cribơyai EATOF nam do gơ jat bal mờ dơ̆ tơngkah kir sơnrai 20 nam ngai crơng gơs EATOF. Pơrjum dờng Cribơyai nhơl chờ ală tiah Đông Á là mpồl nhơl chờ geh crơng gơs bơh nam 1999 tàm càr Gangwon, lơgar Hàn Quôk. Tŭ do, cribơyai EATOF geh 10 lơgar geh jơng geh càr Cát Lâm (lơgar Lo), Cebu (Philippines), Gangwon (Hàn Quôk), Luang Prabang (lơgar Lào), Quảng Ninh (lơgar Việt Nam), Siem Reap (lơgar Campuchia), Sarawak (lơgar Malaysia), Tottori (lơgar Nhờk), Tuv (lơgar Mông Cổ) mờ Yogyakarta (lơgar Indonesia).

Ồng Kim Jin Tae, kwang atbồ càr Gangwon, lơgar Hàn Quôk đơs tơngkah kir sơnrai 20 nam ngai crơng gơs EATOF

Jơnau kờñ bơh Cribơyai dê là bal mờ gơp lơh broă bal bơtàu tơnguh gah lơh sa mờ măi mok nhơl chờ kơ̆ kơljap tàm tiah do. Pơrjum dờng EATOF nam do geh tơngume “Bơta bơtàu tơnguh wơl bơh nhơl chờ tiah Đông Á dê tàm tơngai bè ờs pa” gơ jat bal mờ tơngkah kir sơnrai 20 nam ngai crơng gơs Cribơyai EATOF bal mờ ròt ală broă lơh geh kuơ ngan kờñ đơs nền mờ lơh niam rlau tai bơta git gơp lơh broă bal, lơh bơyô đah ală càr geh jơng tàm EATOF.