VOV4.K’ho- Drim ngai 28/3, tàm hìu lơh broă Quôk hội, geh lơh pơrjum kwang bàng Quôk hội lơh broă sùm cribơyai bè 2, 3 rơndap lơh adat boh lam yal Quôk hội in tàm pơrjum dơ̆ 3, Quôk hội khóa 15. Pơrjum cribơyai, ai jơnau đơs bè 4 rơndap lơh adat, geh:  Adat tam gơl, bơ tơl 2, 3 bơta bơh Adat ngui phan lơh gơlik bơh bồ tơngoh jak; Adat tàm pơrlòng, pà khà jờng (tam gơl), Adat lơma (tam gơl) mờ Adat tac Ƀảo hiểm (tam gơl).

Củ tịc Quôk hội ồng Vương Đình Huệ pà git, mờ nùs nhơm rơcang lài nền nòn, bơh gờñ, bơh ngài, tơnơ̆ tŭ tơn jơh pơrjum dơ̆ 2, Ủy ƀan Thường vụ Quôk hội neh đơng lam ală anih đơng pơlam sền sơ wì pơgồp bal mờ anih rơcang cih mờ ală anih geh gơ rềng mhar tơrgùm, jơh nùs mblàng lơh loh, cih dờp jơnau đơs bơh ală kwang bàng Quôk hội dê. Broă rơcang lài nền nòn ală rơndap lơh adat boh lam lài mờ tŭ yal Quôk hội in ring bal nàng kờñ gàr bơta niam uă ngan rlau jơh ai ală rơndap lơh adat boh lam in, mờ kung gơtùi tềm pềr uă ngan rlau jơh tŭ tơngai pơrjum ngan ngồn bơh ală dơ̆ pơrjum Quôk hội dê.

Cau mblàng K’Duẩn