Do là dơ̆ 2, dơ̆ pơrjum lơh pơnyơu “Quôk hội kơnòm dềt” geh bơyai lơh. Dơ̆ pơrjum lơh pơnyơu “Quôk hội kơnòm dềt” nam do geh bơta tus bal bơh 306 nă cau ala măt là ală oh tàm mpồl kơnòm dềt pơnrơ jak bơh 63 càr, ƀòn dờng tàm jơh gùt lơgar dê. Ală cau ala măt geh săc rwah bơh Mpồl duh broă kơnòm dềt ală kâp neh lơh gơnoar broă tìp măt cau tĕ khà, iăt kơno jơnau đơs bơh cau tĕ khà dê bơh kâp hơđơm.

Tus bal dơ̆ pơrjum lơh pơnyơu, kơnòm dềt geh lơh pơgăp cau ala măt Quôk hội mờ ală gơnoar broă đơng lam bồ tờm ngan Quôk hội, Cíñ phủ dê tus bal dơ̆ pơrjum Quôk hội dê nàng cribơyai bè bàr tơngume: Rơcăng lài kơryan tam lơh tam pờng tàm hìu bơsram mờ Rơcăng lài kơryan bơta aniai bơh jràu dê, phan lơh gơdan, ngan là tàm tiah hìu bơsram. Bal mờ dơ̆ cribơyai geh lơh tàm mho do, kung rơ̆p geh lơh dơ̆ lùp mờ hơ jơnau lùp lơh pơnyơu bè 2 tơngume do tàm Hìu pơrjum Diên Hồng gơ wèt Hìu Quôk hội dê geh lơh tàm drim ngai hìng 29/09, rơ̆p geh bơta tus bal bơh Củ tịc Quôk hội ồng Trần Thanh Mẫn dê bal mờ kwang đơng lam bồ ală Ƀộ, mpồl, gah broă dà lơgar dê.