VOV4.K’ho- Drim ngai 21/06, Thủ tướng Cíñ phủ ồng Phạm Minh Chính neh đơng lam Pơrjum yal rơndăp ù tiah mờ hòi jà bơcri priă tiah ring dà dờng Cửu Long tơngai bơh nam 2021- 2030 tàm ngai 21/06/2022 tàm ƀòn dờng Cần Thơ bal mờ bơta tus bal bơh ală ƀộ, ƀan, ngàñ kâp dà lơgar mờ ală càr, ƀòn dờng tàm tiah ring dà dờng Cửu Long, ƀòn dờng Hồ Chí Minh, ală cau bơcri priă, mpồl lơh sa kă bro, cau lơh broă bal bơtàu tơnguh, ală cau mờng chài tàm broă lơh mờ cau jak chài.

Pơrjum neh yal Broă lơh broă bơh Cíñ phủ dê bè gùng dà bơtàu tơnguh lơh sa- mpồl bơtiàn mờ sền gàr niam dà lơgar mờ bơta lơngăp lơngai tiah ring dà dờng Cửu Long lơh jăt Kơrnoăt sồ 13 bơh Ƀộ Cíñ trị dê; yal rơndăp ù tiah Tiah ring dà dờng Cửu Long jăt jơnau cih bơh Adat Rơndăp ù tiah dê; hòi jà bơcri priă ai tiah ring dà dờng Cửu Long in.

Tàm pơrjum, ală kwang bàng tơrgùm cribơyai tàm ală tơngume bè Rơndăp ù tiah Tiah ring dà dờng Cửu Long tơngai bơh nam 2021- 2030, gùng dà tus nam 2050. Thủ tướng Cíñ phủ ồng Phạm Minh Chính đơs sùm, pal ngui pràn kơldang ală bơta pràn tàm dơlam is, ngan là kòn bơnus, sồr pal bơtàu tơnguh mhar mờ kơ̆ kơl jăp, dipal mờ gơnoar broă, kơnòl broă jŏ jòng bơh tiah do dê; sền do là kơnòl broă sùm sùm, broă tờm, geh bơta kwơ dờng màng gơwèt mờ bơta bơtàu tơnguh bơh ală càr, ƀòn dờng tàm tiah do dê mờ bơh jơh gùt lơgar dê.

Cau mblàng Lơ Mu K’Yến