Jăt mờ hơ̆, nam 2023 tềm pềr priă tă, priă dà lơgar geh 83 rơbô tơmàn đong. Ƀộ trưởng Ƀộ Tài cíñ ồng Hồ Đức Phớc pà git, nam 2023 tơmŭt tàm kes priă Dà lơgar geh 1 rơbô 754 tơmàn đong. Tă bơh Kes priă Dà lơgar kờp dŭ geh 2 rơbô 109 tơmàn đong, ndrờm mờ 101,6% kờp dŭ lài, gơguh mờr 74 rơbô tơmàn đong. Kờp jơh priă tềm pềr priă tă, priă dà lơgar nam 2023 là 83 rơbô tơmàn đong.

Broă atbồ, blơi phan bơnah dà lơgar tàm ală ƀộ, gah lơh broă dà lơgar mờ ală càr, ƀòn dờng pơn jăt tai tam gơl, gàr niam, tềm pềr. Nam 2023 Ƀộ Tài cíñ neh kĭ pa gùng dà broă rơndăp tăp sèng wơl, bơsong gơwèt mờ 379 hìu, ù bơh mpồl ƀộ, anih lơh broă dà lơgar. Nam 2024, Thủ tướng Cíñ phủ neh ai lơh jăt Broă lơh tơrgùm bal bè broă lơh jăt broă tềm pềr, kơrian hoàc huơr mờ 9 kơnòl broă tờm mờ 5 mpồl broă lơh, sồr ală ƀộ, gah lơh broă dà lơgar, ală càr, ƀòn dờng lơh broă rơndăp lơh ală jơnau kờñ, broă jàu tềm pềr tàm tơl gah broă. Pơn jăt tai sền wơl, dan tam gơl ală adăt boh lam, sră nggal adăt boh lam gơrềng tus mờ broă lơh jăt tềm pềr, kơrian hoàc huơr  gàr niam broă ndrờm bal, ring bal jơh adăt boh lam, tơmù bơta gơtìp tàm bơrlŭ bal. Ngai do (21/05), Quốk hội cri bơyai bè ală adăt gùng lòt ù gờl, pơrlòng giă jơtài phan bơna mờ pơn jăt tai sền wơl, lơh nền broă kwang bàng.