VOV4.K’ho- Tàm càr Dăk Lăk, mŭt tàm nam bơsram pa gam geh gĭt nđờ jơ̆t nă kơnòm bơsram, cau bơsram dờng bơh lơgar Lào tus jat bơsram. Nam bơsram do, geh mờr 60 nă cau bơsram dờng- kơnòm bơsram lơgar Lào gam bơsram tàm ală hìu bơsram tàm ù tiah càr Dăk Lăk dê. Mờ bơta sền gròi, dong kờl bơh gơnoar atbồ mờ ală mpồl lơh broă, hìu bơsram, ală kơnòm bơsram gam geh lơh ngan bơsram sră nàng lơh geh bơta kơ̆p kờñ bơh să tờm dê gơ gơs bơta geh ngan.

Cau bơsram dờng oh Thidphaphone Duangphachanh (25 sơnam, ƀòn tờm ơm tàm càr Attapeu, lơgar Lào) gam bơsram tàm khoa Y, Hìu bơsram Đại học Tây Nguyên, ƀòn dờng Buôn Ma Thuột, càr Dăk Lăk, pà gĭt: bơh lồi nam 2017, oh tus bơsram gah Y Đa khoa jat gah bơsram pà priă bơsram làm jơh. 

Cau bơsram dờng oh Thidphaphone Duangphachanh gam bơsram tàm hìu bơsram Đại học Tây Nguyên

Mờr 6 nam bơsram sră tàm do, sơr lèt gan ală bơta kal ke, ờ hềt kwèng, krơi is bè bơhiàn, tơm bơh bơr, mờ bơta dong kờl bơh hìu bơsram, cau pơgru mờ gơ̆p bơyô, Thidphaphone neh rơ hời gơ dờp mờ tiah ơm kis pa, lơh geh cồng nha uă tàm broă bơsram sră, hời rơ hời lơh jat jơnau kơ̆p kờñ lơh ƀák sỹ.

Cau bơsram dờng oh Thidphaphone Duangphachanh, đơs: Rơwah bơsram gah Y là tài bơh kờñ, tài bơh bơsram Y là nàng in gĭt, nàng sền gàr cau kòp mờ sơm kòp. Ngan ngồn bơsram Y là kal ke rau mơya mờ jơnau đơs là kal ke ngan sơl, mờ ờhoan gĭt wă ngan tai, sồr pal jak bè gah ờs mờng tai, tài bơh pal bơsram bơta gĭt wă uă ngan. Oh kờp dŭ geh rê wơl tàm lơgar Lào nàng lơh broă, nàng drơng broă làng bol in.

Ai oh Chansida Inthakhong (18 sơnam, ƀòm tờm ơm tàm càr Sê Kông, lơgar Lào) gam bơsram tàm Hìu bơsram kấp pe Dân tộc Nội trú Tây Nguyên (gơwèt Ƀộ Quốc phòng) tàm ƀòn dờng Buôn Ma Thuột den pà gĭt: mờr 4 nam ơm tàm Dăk Lăk, oh neh kwèng mờ rài kis pah ngai tàm Hìu bơsram jat kơrnoat mpồl ling klàng dê. Oh Chansida Inthakhong, đơs: Ơm kis tàm hìu bơsram là jat kơrnoat bơh ling klàng dê, bè tŭ tơngai den niam ngan. Lài do kung kal ke ngan mơya hìu bơsram sền gròi, bè broă bơsram sră, sào sa, cĭt vaccine tŭ kòp Kovid-19 bơtờp uă, niam uă ngan. Gơwèt mờ oh là dùl nă cau ơm ngài mờ hìu bơnhă tus bơsram tàm lơgar Việt Nam, hìu bơsram hơ̆ oh gơ lơh bè hìu bơnhă sơl, sền gròi tus mờ oh, ală gơ̆p bơyô kung rềp mềr, sùm dong kờl oh tàm tơl broă.

Mpồl gĭt gơ̆p lơh bơyô bal Việt Nam mờ Lào càr Dăk Lăk pà phan ai kơnòm bơsram Lào gam bơsram tàm Hìu bơsram kấp pe Dân tộc Nội trú Tây Nguyên

Lơh jat broă lơh lơh oh mi bal mờ jơnau ring bal pơgồp bal broă lơh đah càr Dăk Lăk mờ ală càr tiah đah Jum lơgar Lào dê, bơh nam 2018 tus tŭ do, neh geh gĭt nđờ rơhiang nă kơnòm bơsram, cau bơsram dờng lơgar Lào tus bơsram tàm Hìu bơsram Đại họk Tây Nguyên mờ Hìu bơsram kấp pe Dân tộc Nội trú Tây Nguyên jat gah geh pà priă bơsram bơh uă gah krơi is. Tàm tơngai bơsram sră, ală cau bơsram bơh lơgar Lào geh dong kờl bè: ơm tàm tiah ơm kĭ túc xã ờ sa priă, pà priă ngui sa pah nhai, tus bal wă sa tềp bơhiàn yau Bunpimay bơh lơgar Lào dê tàm Buôn Đôn, tìp mat lơh kuèng ală rơnàng cau bơsram lơgar Lào tàm Dăk Lăk.

Ồng Nguyễn Ngọc Phan, Kwang atbồ Hìu bơsram kấp pe Dân tộc Nội trú Tây Nguyên pà gĭt, nam bơsram do hìu bơsram geh 45 nă cau bơsram lơgar Lào gam jat bơsram. Bal mờ broă pà priă bơsram bơh dà lơgar dê pà, hìu bơsram kung lơh ngan hòi jà ală bơta pràn bơh mpồl bơtiàn dê lơh bal nàng tơnguh uă cồng nha bơto bơtê ai ală kơnòm in. Ồng Nguyễn Ngọc Phan, đơs: Jơh priă tă bơto bơtê ală oh dê in là bơh hìu bơsram, mờ bơta pràn bơh hìu bơsram dê tơn, bơh kwang bàng, cau pơgru hìu bơsram nàng sơm bat tê bal bơt bơtàu mpồl cau lơh broă bơtàu tơnguh ai mpồl cau lơh broă tàm tiah 3 mum in bơtàu tơnguh kung bè là bơta gĭt gơ̆p đah 2 lơgar. Tàm tơngai tus den bol añ geh lơh ngan bal mờ càr Sê Kông kung bè ală càr tiah đah Jum lơgar Lào dê lơh gah bơta pràn, bơtàu tơnguh lơh tàm geh broă bơto bơtê ngai sơlơh niam rlau tai.

Jat ồng Lê Văn Nghĩa, Củ tịc Mpồl gĭt gơ̆p lơh broă Việt Nam mờ Lào càr Dăk Lăk đơs, ngui niam bơta gĭt gơ̆p niam bơnĕ, tam klăc bal dờng màng đah 2 lơgar Việt Nam mờ Lào, Dăk Lăk sền gĭt dùl tàm ală kơnòl broă tờm là lơh niam broă lơh bơto bơtê ală kơnòm bơsram, cau bơsram dờng Lào tus bơsram sră tàm càr dê. Tỉñ hội Dăk Lăk neh pơgồp bal dong kờl, jat sền broă lơh bơto bơtê, lơh ală bơta niam ngan rlau jơh ai mờr 60 nă cau bơsram lơgar Lào gam jat bơsram tàm ală hìu bơsram tàm ù tiah càr Dăk Lăk dê. Ngui niam ală cồng nha neh lơh geh, 2 Tỉñ hội geh pơn jat tai lơh jat ngan ngồn sră jơnau ring bal, geh ală broă lơh broă rơndap lơh lơh broă lơh làng bơh 2 gah dê. Lơh sùm broă yal tơngĭt jơnau, tàm yal bal mờ pơgồp bal niam nàng lam lơh jat niam broă lơh bơto bơtê, tàm pơgơl cau bơsram.

Ồng Lê Văn Nghĩa, đơs: Bol añ dong kờl, ai tơl bơta bè kòn bơnus, phan bơna, lơh geh ală bơta niam ngan rlau jơh nàng sền gròi bơto bơtê, bơsram tàp ală sau lơgar Lào tàm càr in. Bol añ neh dan gùng dà broă lơh bơh Thường trựk Tỉñ ủy, đơng lam mờ sồr lơh broă lơh lơh oh mi bal đah làng bol càr Dăk Lăk mờ ală kơnòm bơsram nàng jat tàm bơnàng jă hơ̆ ală kơnòm bơsram iang nùs bơsram sră. Bol añ geh pơn jat tai hòi jà mpồl bơtiàn lơh bal khà priă tă nàng dong kờl lơh jat jơnau ring bal pơgồp bal lơh broă bơh 2 Tỉñ hội Dăk Lăk mờ Sê Kông dê. 2 Tỉñ hội geh pơn jat tai pơgồp bal jat sền, gròi sền geh cồng nha broă sền gròi, bơto bơtê bơh hìu bơsram kấp pe Dân tộc Nội trú Tây Nguyên (gơwèt Ƀộ Quôk phòng dê) mờ hìu bơsram Đại học Tây Nguyên gơwèt mờ ală kơnòm bơsram, cau bơsram dờng bơh lơgar Lào dê gam bơsràm tàm 2 hìu bơsram do.

Nam bơsram pa 2022-2023 neh sơnđờm. Bal mờ cau bơsram Việt Nam, ală cau bơsram lơgar Lào gam bơsram sră tàm Dăk Lăk pơn jat gùng lòt ntoăt jat jơnau kơ̆p kờñ, pơnđơl pràn lơh ngan bơsram sră nàng rê wơl bơt bơtàu ƀòn lơgar tờm ngai sơlơ niam bơnĕ rlau tai.

Cau cih H’Xíu H’Môk- Cau mblàng K’Hạnh