Pin dờn tàm ồi àu kòn cau K’Ho dê, oh Sruk Đan bơsram ơdŭ 9, Hìu bơsram Pe kâp Kòn cau ơm sa tơn tàm Hìu bơsram Kâp bàr kơnhoàl Dam Rong, càr Lâm Đồng, pà gĭt: Nam bơsram do oh geh guh ơdŭ 9, den tàng hìu bơsram sồr tơrgùm tàm nam bơsram pa gờñ rlau, bơh ngai 22/08. Ală bơyô dùl ơdŭ bal lòt tơrgùm tam klăc bal uă ngan. Nam do, là nam bơsram lồi kâp rao den tàng bol oh rơcăng lài uă ngan tàm broă bơsram. Mŭt tàm nam bơsram pa, phan bơna bơh hìu bơsram dê niam ngan, sàng goh, hìu bơsram ơdŭ bơsram geh bơcri priă lơh niam lơh pa wơl, oh chờ hờp ngan. Nam lài, broă bơsram bơh oh dê kung jak đau sơl, den tàng tàm nam bơsram pa nam do, oh geh pơđơl pràn lơh ngan tơryăng tàm broă bơsram nàng lơh geh cồng nha jơnhoa ngan rlau jơh nàng ờ lơh roh bơta gơn kơnờm bơh mè bèp dê neh ròng siam, sền gàr ai lòt bơsram tus gùng tus dà.  

Kơnhoàl Dam Rong là tiah kal ke ngan rlau jơh bơh càr Lâm Đồng dê, bal mờ khà làng bol jơi bơtiàn dùl êt nă cau geh pơgăp 70% khà kờp làng bol. Ală nam do, Đảng mờ Dà lơgar neh sền gròi dong kờl kơlôi rơcăng ai broă lơh bơto bơtê tàm tiah do in. Bal mờ phan bơna, hìu bơsram cơldŭ bơsram geh bơcri priă lơh niam wơl, lơh pa, kơnòm bơsram jơi bơtiàn dùl êt nă cau tàm do kung geh dờp lèng wil tơl ală broă dong kờl bơh Đảng mờ Dà lơgar dê. Kwơmàng, bơta gĭt wă bơh làng bol dê tàm broă kơlôi rơcăng ai oh kòn in lòt bơsram kung geh tơnguh tai uă ngan. Tàm ngai Sơnđờm mŭt nam bơsram pa, mè Nhi jun kòn lòt bơsram nàng pơnjờng kòn he dê lơh geh cồng nha jơnhoa tàm broă bơsram. Mè Nhi, đơs: Tŭ mŭt bơsram ơdŭ 6, hìu bơsram Kòn cau ơm sa tơn tàm hìu bơsram kơnhoàl, geh hìu bơsram bơto pơlam là oh lơi bơsram jak rơ̆p geh dùl bơnah priă dong kờl bơsram geh ai lòt bơsram tàm lơgar ndai. Bơta kơ̆p kờñ ngan bơh sau dê là lơh ngan bơsram gơ in jak ngan nàng ai geh bơnah priă dong kờl bơsram hơ̆ mờ lòt bơsram tàm lơgar Nhờk. Bè hơ̆ den tàng pal tơryăng bơsram mờ jơh nùs lơh ngan, nàng tơnơ̆ tŭ pơrlòng gơkờn kâp pe, sau dờp geh bơnah priă dong kờl bơsram hơ̆. Hìu bơnhă añ kung ai tơl bơta uă ngan ai kòn in, bơdìh mờ priă tềm pềr, hìu bơnhă kung lòt lèng càn tai nàng tơl priă ai kòn in lòt bơsram tàm lơgar Nhờk mơkung bơsram mờ tàp lơh broă tơn.

Jơnau kờñ bơh mè Nhi dê là ờ gŏ di mìng bơcri ai kòn in bơsram jak tàm lơgar lơm mờ pal geh lòt bơsram tàm lơgar jak chài tai. Hìu bơnhă geh 3 nă kòn, kòn tơnhoa bơsram jak nàng 2 nă oh hền in đòm jăt. Mè Nhi, đơs: Tơnơ̆ bi ùr là kòn tơnhoa, hìu bơnhă kung gam 2 nă oh tai kung gam lòt bơsram. Bàr nă kòn tơnơ̆ den hiù bơnhă kung sồr ală kòn lơh ngan pơn jăt tai lòt bơsram đòm krơh bi dê. Mŭt tàm bồ nam bơsram pa, hìu bơnhă blơi sră măi sră cih àu mpha pa, blơi rơndeh coh nàng lòt bơsram tài bơh hìu bơsram ơm ngài mờ hìu kung rlau dùl kơi sồ sơl. Dùl bơnah bơh bơta lơh ngan pơđơl pràn hàm kờñ bơsram bơh kòn dê, hìu bơnhă den ai tơl bơta jơh pràn ngan rlau jơh dilah gơtùi. Đơs bal ală kòn hìu bi dê ndrờm hàm kờñ ngan bơsram mờ bơsram jak sơl, den tàng añ kung rà muh rà mat ngan mờ lơh ngan ai tơl bơta ai ală kòn in lòt bơsram sră.

Tàm gùl bơta tơlir niam bơh brê bơnơm dê, Hìu bơsram Pe kâp Kòn cau ơm sa tơn tàm hìu bơsram Kâp bàr kơnhoàl Dam Rong, càr Lâm Đồng mpờl gŏ mờ rùp dà pa àng sơrdah, wă rò sơnam pa 2023- 2024. Klau pơgru Nguyễn Hữu Hanh, Phó Kwang ătbồ Hìu bơsram Pe kâp Kòn cau ơm sa tơn tàm hìu bơsram Kâp bàr kơnhoàl Dam Rong, pà gĭt, bulah ơm tàm tiah sar lơgar ngài, mơya phan bơna hìu bơsram kung gam niam ngan sơl, gàr niam broă bơto mờ bơsram. Nam bơsram pa nam do, bơh priă Broă lơh jơnau kờñ dà logar bơtàu tơnguh lơh sa- mpồl bơtiàn tiah làng bol jơi bơtiàn dùl êt nă cau mờ tiah kơh bơnơm tơngai bơh nam 2021- 2030, hìu bơsram neh geh lơh niam rlau, bơh cơldŭ bơsram tus tiah ơm sa bĭc tơn. Klau pơgru Nguyễn Hữu Hanh, đơs: Tŭ do phan bơna hìu bơsram dê neh geh bơcri priă lơh niam wơl uă ngan. Ală gah cơldŭ bơsram geh sơng dà, dă găc bơkàu, găc kơlik hìu sàng goh; drơng ai broă lơh bơto bơsram in. Tiah ơm sa bĭc bơh kơnòm bơsram dê kung geh sơng wơl, dă găc kơlik hìu, gàr niam ngan rlau jơh bơta ơm kis sàu sa ơm bĭc bơh kơnòm bơsram dê.