Rlau 2 nhai tơnơ̆ dơ̆ rềs àr rơndeh continer (kon tai nơ) tơm tàm ală hìu kềng gah drà 312, xã Dăk R’la, kơnhoàl Dăk Mil, càr Dăk Nông, ùr bơkàu ồng Hoàng Văn Tuấn trờn ơm tàm suơn mìr bơt hìu. Bơta jê sồt roh jơh 2 nă kòn tài bơh rềs àr gùng lòt kung gam bè ờs sùm.

Ồng đơs:“Chơ̆t dồ dơ̆ 2 nă kòn den kal ke ngan nàng gơtùi hŭi mơ ờ. Tŭ do lơh hìu ơm tàm do nàng ơm ing, hơđang ne jê sồt muăt jrùm gơ tơngòr sùm, ờ gơtùi ơm. Bàr pe nă cau tàm ƀòn đơs là sồr lơh hìu tàm đah ngkời nàng ơm, mơya đah ngkời kung bè tàm bă ù tiah hơ̆ sơl. Mù ơm tàm do mờ sền tiah lơi kung gŏ ală kòn lơm”.

Rềs àr gùng lòt ờ mìng lơh uă cau chơ̆t màng kis lơm mờ cau pròc mhàm jê sồt muăt jrùm gĭt lơh, mờ cau lơh gơlik bơta rềs àr hơ̆ kung kong mờ bơta gơ tơngòr sơl, geh tŭ gơtìp lơh glài bơh dà lơgar dê tai. Bi Nguyễn Văn Chí, ơm xã Dăk Búk So, kơnhoàl Tuy Đức, càr Dăk Nông wờl să ngan: 3 nam ơm jàm neh jơh, mơya dơ̆ rềs àr den kung gam gơ tơngòr sùm. Mang 15/3/2021, bi măi rơndeh dờng lòt pơndiang phan, tài bơh măi răt ir mờ ờ gŏ sền nền gùng lòt den neh lơh gơbàn dơ̆ rềs àr lơh 2 nă kơnòm bơsram đì rơndeh măi đèng chơ̆t. Bi Chí pà gĭt: “Añ pa lik bơh hìu jàm rê wơl tàm ƀòn lơgar. Tŭ ơm tàm hìu jàm añ sùm gơ tơngòr ngan bè dơ̆ rềs àr lơh sau kơnòm bơsram chơ̆t. Dilah tŭ hơ̆ añ ờ gơ jă gơ jal ir măi răt, khat dồ ntoăt, rềs àr neh ờ gơlik geh. Tŭ do lik jàm añ kung ờ khin măi rơndeh dờng tai, digơlan añ tam gơl lòt lơh broă lơh hìu halà lòt lơh cau lơh phan tàm tiah lơh sa mờ măi mok Bình Dương halà Sài Gòn”.

Jat Mpồl Sền gàr lơngăp lơngai  lòt rê tàm gùng càr Dăk Nông dê yal, 3 nam rê wơl hơ ndo, bơta rềs àr gùng lòt tàm ù tiah càr dê gơmù. Mơya, khà dơ̆ rềs àr gùng lòt kơn jơ̆ mờ kơn jơ̆ uă ngan den sơlơ tơnguh tai. Jơnau tờm uă ngan tài bơh tìs bơh cau măi rơndeh mờ dùl bơnah bơh phan bơna bơt bơtàu gùng lòt rê ờ hềt lơh tơl làm. Ồng Nguyễn Nhân Bản– Kwang atbồ Sở Gùng lòt Jun pơndiang phan, Phó Kwang atbồ Mpồl Sền gàr Lơngăp lơngai lòt rê tàm gùng càr Dăk Nông pà gĭt, bàr pe broă lơh tờm nàng kờñ tơrmù ƀà ală dơ̆ rềs àr: “Mpồl Lơngăp lơngai gùng lòt càr neh sồr ală anih lơh  broă geh gơnoar là cau tàm mpồl lam lơh ală broă lơh mblàng yal, yal tơngĭt adat boh lam bè lơngap lơngai lòt rê tàm gùng nàng kờñ tơnguh uă bơta gĭt wă bơh cau lòt rê tàm gùng dê; sơlơ tơnguh tai lòt sền, gròi sền lơh glài kràñ ală cau lơh tìs. Sùm kờp sền, lơh niam wơl gùng lòt, is ồn là bơsong ală tiah sùm gơtìp rềs àr, ală tiah geh pơhìn gơtìp rềs àr. Tơnguh uă bơta niam bơto bơtê, sền sơ wì, pà sră măi rơndeh, sền gròi rơndeh dờng, sơlơ tơnguh tai broă lơh pơgồp bal lơh niam broă lơh gàr niam rơndăp tăp sèng lơngăp lơngai gùng lòt”.

Rềs àr gùng lòt là broă jê nùs jê tồr ngan bơh jơh gùt mpồl bơtiàn dê, tài bơh ală bơta gơ lời wơl bơh gơ dê kơn jơ̆ kơn jŭt ngan mờ jŏ jòng ngan. Nàng tơrmù ƀà rềs àr gùng lòt, bal mờ ală broă lơh bơh anih lơh broă geh gơnoar dê, tơl nă cau pal tơnguh uă bơta gĭt wă lơh jat adat boh lam tŭ lòt rê tàm gùng. Bơh hơ̆, sền gàr is să tờm mờ pơgồp bơnah lơh tơrmù ƀà ală bơta jê sồt muăt jrùm, roh rui tài bơh rềs àr gùng lòt.