VOV4.K’ho- Tàm pơrjum dơ̆ 16, Ủy ƀan Thường vụ Quôk hội ai jơnau đơs tă pơgồp bè broă rcang bơyai lơh pơrjum dơ̆ 4 bơh Quôk hội dê. Ủy ƀan Thường vụ Quôk hội ring bal pơrjum dơ̆ 4, Quôk hội khoá 15 geh sơnđờm mŭt pơrjum tàm ngai 20/10 mờ tơn jơh tàm ngai 15/11. Kờp jơh tơngai pơrjum kờp dŭ lài là 21 ngai tàm nùs nhơm bơta niam geh lơh lài khà dùl, mơya tềm pềr uă ngan rlau jơh tŭ tơngai mờ pơrjum tơrgùm jơh tàm Hìu lơh broă Quôk hội dê.

Tổng thư kĭ, Củ ñiệm Cơl dŭ lơh broă Quôk hội ồng Bùi Văn Cường pà gĭt: Kờp dŭ Quôk hội rơndap lơh pơrjum lùp mờ hơ jơnau lùp tàm 2 ngai nggùl, bơh mho ngai 3 tus ngai 5 nhai 11 mờ lơh broă lơh kwang bàng bơh dơ̆ sơnrờp dơ̆ mŭt pơrjum tơn. Quôk hội kung lời 1 ngai nggùl ai dơ̆ cribơyai tàm Anih pơrjum bè ală bơta lơh sa, mpồl bơtiàn mờ priă jền, kes priă dà lơgar. Củ tịc Quôk hội ồng Vương Đình Huệ pà gĭt: dơ̆ cribơyai bè ală bơta lơh sa- mpồl bơtiàn mờ Jơnau rcang cih Adat ù tiah (tam gơl) geh jà kwang đơng lam bồ bơh 63 càr, ƀòn dờng tus bal, iăt, kơno jơnau cribơyai mờ geh tam pà gơs 2 dơ̆. Ủy ƀan Thường vụ Quôk hội sồr bañ sền ờ sơ̆p mờ ờ rcang sền ngăc mờ pal lơh niam broă lơh rcang sơndră kòp, gàr niam bơta sền gàr lơngap lơngai, ờdo ờdă ai pơrjum dơ̆ 4, Quôk hội khoá 15 in.

 VOV Tây Nguyên – Cau mblàng K’Hạnh