VOV4.K’ho- Mho ngai 15/07, Hội đồng Ñân zân ƀòn dờng Hà Nội neh geh sră hòi jà tơrgùm pơrjum dơ̆ 8, Hội đồng Ñân zân ƀòn dờng khoă 16, tơngai lơh broă bơh nam 2021- 2026 nàng sền sơ wì, lơh nền bàr pe tơngume gơwèt gơnap gơnoar. Pơrjum geh bơyai lơh tàm mho ngai 22/07 tus, nàng sền sơ wì, pồ gơnoar broă Củ tịc Ủy ƀan Ñân zân ƀòn dờng Hà Nội.

Lài hơ̆, Ƀộ Cíñ trị neh geh Quyết địñ sồ 567 ngai 14/07 sồr mut bal tàm Ƀan Cấp hàñ, Ƀan Thường vụ mờ at gơnoar broă Phó Ƀí thư Thàñ ủy Hà Nội tơngai lơh broă bơh nam 2020-2025. Jat hơ̆, Ƀộ Cíñ trị sồr ồng Trần Sỹ Thanh, Ủy viên Đảng dà lơgar, Ƀí thư Mpồl đơng lam Đảng Kiểm toán Dà lơgar, Tổng Kiểm toán Dà lơgar tơn jơh at gơnoar broă Ƀí thư Mpồl đơng lam Đảng Kiểm toán dà lơgar, nàng sồr mut bal tàm Ƀan Cấp hàñ, Ƀan Thường vụ Thàñ ủy, at gơnoar broă Phó Ƀí thư Thàñ ủy Hà Nội tơngai lơh broă bơh nam 2020- 2025, mơkung yal tơngĭt ồng Trần Sỹ Thanh nàng Hội đồng Ñân zân ƀòn dờng Hà Nội in pồ at gơnoar broă Củ tịc Ủy ƀan Ñân zân ƀòn dờng Hà Nội tơngai lơh broă bơh nam 2021- 2026.

Cau mblàng K’Hạnh