Mut tàm pang web dulich.daknong.gov.vn, ù tiah 3 gah bè tơnau dà Tào Dùng mpờl gŏ tơlir niam bè hòi jà nac nhơl chờ tus mờ Dăk Nông. Tàm pang web do, nac nhơl chờ gơtùi jòi git bè ală anih nhơl chờ tiơng pơn rơ bơh càr dê, geh yal jơnau tơnggit bè ală tour nhơl chờ, broă drơng ala ơm wơl, lòt nhơl, nhơl ñŏ lơh prài bồ tơngoh, phan sa… Do là dùl bơnah bơh ală broă lơh nhơl chờ ngac ngar càr Dăk Nông dê pa geh ai ngui tơrlòng lài bơh ngai 15/12/2022. Kờp dŭ tơnơ̆ 3 nhai lam lơh tơrlòng lài, bơh jơnau sền sơ wì, ai mờng chài mờ lơh sir, broă lơh do geh ai ngui ngan ngồn drơng broă ngui, bơtàu tơnguh nhơl chờ bơh càr dê; lơh niam ngan rlau jơh broă lơh atbồ, yal tơnggit, lòt sền ngan ngồn phan nhơl chờ. Nac nhơl chờ gơtùi cih mat lài bơh tàm internet, sền tour, ai tơlik jơnau bơceh pa lơh gơs tour tàm anih nhơl chờ ngac ngar do.

Lòt bal mờ gơnoar atbồ tàm ƀòn lơgar bơt bơtàu mờ bơtàu tơnguh ală broă lơh nhơl chờ ngac ngar là Sơnĕ Tập đoàn viễn thông ling klàng Viettel Dăk Nông. Ồng Nguyễn Anh Tuấn, Phó Kwang atbồ broă lơh kông nghệ thông tin Viettel Dăk Nông, pà git: “Anih do geh dong Sở Văn hóa- Thể thao mờ Zu lịc càr Dăk Nông yal tơnggit ală phan bơna niam chài, nhơl chờ càr dê. Gơ wèt mờ nac nhơl chờ geh jòi git, lòt sền niam chài nhơl chờ 3D mờ ngan ngồn, ờ ngan tŭ tus Dăk Nông”.

Bal mờ broă bơtàu tơnguh ală broă lơh nhơl chờ ngac ngar, càr Dăk Nông gam pơgồp bal mờ Viện Hàn lâm Khoa họk mờ Kông nghệ Việt Nam lam lơh lơh Sră wac sềr ù tiah nhơl chờ điện tử càr Dăk Nông. Do là càr sơn rờp tàm tiah Tây Nguyên lam lơh lơh sră wac sềr ù tiah điện tử nhơl chờ. Jat hơ̆, sră wac sềr ù tiah geh yal cau ngui in ală jơnau tơnggit bè ală anih nhơl chờ, tơrgùm pơlam broă drơng ala gùng lòt bè: rơndeh rơndồ lòt rê, ală anih ai ơpah rơndeh măi is, yal bè broă lơh chờ halà ală tour nhơl chờ tơrmù giă… Thạk sĩ Đào Thị Lưu, Viện Hàn lâm Khoa họk mờ Kông nghệ Việt Nam yal, sră wac sềr ù tiah nhơl chờ điện tử Dăk Nông bơceh dipal mờ bơta geh ngan càr dê, lam lơh niam ngan rlau jơh ală broă lơh drơng nac in: “Sră wac sềr ù tiah nhơl chờ điện tử bơh càr Dăk Nông dê den bol hi ngui ứng zụng rùp vệ tiñ Sentinel geh yal 5 ngai 1 dơ̆, bơh hơ̆ dong jat sền bơta tam gơl bơh ù tiah mờ bol he ờ duh pal lòt tus tàm ù tiah ngan ngồn. Bol he mìng sền tàm rùp hơ̆ nàng gơtùi gŏ bơta tam gơl bơta geh ngan dê nàng ai tơlik jơnau tơngkah, jơnau đơs lài mờ geh ală broă lơh nàng bơsong di tŭ. Mờ sră wac sềr ù tiah geh tai bơnah tă pơgồp jơnau đơs nàng nac nhơl chờ in gơtùi ai tơlik ală jơnau đơs, jơnau hơ wơl”.

Ngui bơta ƀuơn bè Kông viên điạ cất gùt plai ù UNESCO, tus tŭ do, Ủy ƀan Ñân zân càr Dăk Nông neh rơndap ù tiah mờ tă priă lơh 44 anih tus jat 3 tơngume tờm, geh: “Jơnau đơs pơnđik jòng bơh ồs mờ dà dê”, “Jơnau tàm bơrlŭ bơh càl pa dê” mờ “Sap mpong ntas bơh plai ù”. Jat broă rơndap lơh lam lơh tam gơl sồ tàm gah nhơl chờ bơh nam 2020 tus nam 2025, càr Dăk Nông ai lài ngui măi mok pa ngan rlau jơh nàng tơnguh cồng nha broă lơh atbồ, yal tơnggit nhơl chờ, lơh gơlik bơta gơ hòi gơ jà gơ wèt mờ nac nhơl chờ mờ ală mpồl lơh sa kă bro, cau bơcri priă. Mò Khúc Thị Thoi, Phó kwang atbồ Sở Văn hóa- Thể thao mờ Zu lịc càr Dăk Nông pà git: “Bol hi neh dan jơnau đơs bơh Ủy ƀan Ñân zân càr dê nàng bơt bơtàu broă rơndap lơh bơtàu tơnguh rơndap broă lơh nhơl chờ do tàm tơngai bơh nam 2022 tus nam 2025. Mùl màl rơhời lơh phần mềm geh ală app tàm điện thoại ngac ngar, tơnơ̆ hơ̆ geh tơrgùm jơh ală bơta kuơ nhơl chờ, anih ơm wơl nhơl chờ, ală phan nhơl chờ, tiah nhơl ñŏ lơh prài bồ tơngoh… lơh gơs khà kờp bal tàm gùt càr bè gah nhơl chờ”.

Mờ uă ù tiah niam tiơng pơn rơ, tiah tềl kah yau niam chài krơi is, geh Kông viên địa cất gùt plai ù UNESCO Dăk Nông- ù tiah bơh ală sap ntas dê, Dăk Nông gơ hòi gơ jà nac nhơl chờ tus sền, jòi git ală ù tiah pa. Ngui bơta pràn, bơta ƀuơn hơ̆, càr tơlik jơnau kờñ tus nam 2025 geh êt ngan rlau jơh 1 tiah nhơl chờ tơl khà kâp dà lơgar mờ 5 tiah, anih nhơl chờ kâp càr rlau hơ đang. Kơp kơnờm mờ ală broă lơh pa tàm broă ngui kông nghệ sồ, nhơl chờ Dăk Nông geh bơta bơtàu tơnguh pràn, là anih tus ring niam, gơ hòi gơ jà nac nhơl chờ tàm lơgar mờ bơdìh lơgar.