VOV4.K’ho - Ngai òr (30/08), Tỉñ Đoàn Dăk Lăk bơyai lơh dơ̆ lơh broă Ngai chờ Añ gơboh dà lơgar añ nam 2022 mờ uă broă lơh geh niam.

                                                                      Dơ̆ cào kơ

                Rơlao 1 rơbô 500 nă ơruh pơnu lơh gơs rùp "Añ gơboh Việt Nam" tàm dơ̆ cào kơ

Ngai chờ Añ gơboh dà lơgar añ tàm càr Dăk Lăk nam do geh uă broă lơh bè pơrjum cri bơyai, cào kơ mờ lòt niam tàm Ƀlàng dờng ngai 10 nhai 3 ƀòn dờng Buôn Ma Thuột, bơyai lơh đơs crih tamya mờ pơrlòng ntoăt “Mobirun-Añ gơboh dà lơgar añ”, pơrjum cri bơyai Nùs nhơm kơ̆p kờñ ơruh pơnu; Pơrlòng lam sồr jơnau đơs crih kăc màng, ơruh pơnu đơs jơnau đơs pơn đik mờ teh phan đơs crih kòn cau; Dơ̆ tơnkah 66 nam ngai bơhiàn Mpồl tam klăc ơruh pơnu Việt Nam mờ pơn jờng ơruh pơnu geh pơbrơ jăk tàm ală gah broă. Broă lơh nàng chờ gờm cồng nha pơrjum dờng đoàn ală kấp mờ wèt tus Pơrjum dờng Đoàn gùt lơgar dơ̆ 12, chờ gờm Ngai sơn tờm dà lơgar ngai 02 nhai 9 mờ ală ngai kwơ màng dà lơgar dê. Tơl broă lơh ndrờm geh tơngu me mùl màl, bơh tŭ hơ̆ hòi jà ală đoàn viên ơruh pơnu tus bal, dờp bal uă, ai geh cồng nha tam klăc bal, tơrgùm bal ơruh pơnu tàm ală mpồl đoàn tàm càr dê.

Cau mblàng Ndong Brawl