Xã Ea Bung là xã geh ù tiah dờng ơnàng ngan rlau jơh kơnhoàl Ea Súp mờ mờr 30 rbô lồ. Jơh gùt xã geh 1 rbô 60 hìu bơnhă làng bol, mờ 4 rbô 78 nă cau gơ wèt ală kòn cau Tày, Nùng, Mường Thái, Rơđê, Jrai, H’Mông, Chứt mờ Yoan. Jơh ală thôn ndrờm neh lơh broă lơh Mpồl atbồ is sền gàr lơngăp lơngai dà lơgar, bal mờ mpồl lơh broă geh gơnoar bơt bơtàu mpồl sền gàr tiah nhàr dà lơgar jơh gùt làng bol, sền gàr kơ̆ gơnoar tờm lơngăp lơngai tiah nhàr dà lơgar. Ală pôs ling sền gàr tiah nhàr dà lơgar Dăk Ruê, Yok Bruê kung rơcang lài tă pơgồp jơnau đơs, dong kờl bơtàu tơnguh lơh sa – mpồl bơtiàn, ngan là broă lơh bơt bơtàu ƀòn lơgar pa, dong kờl ală hìu bơnhă kal ke…

Tàm ngai lơh chờ neh geh lơh ală broă lơh niam chài, tàp pràn să jan mờ kham sơm kòp, pà sơnơm ờ sa priă ai làng bol in, bơh Hìu sơnơm Hùng Vương, Nhân Ái ƀòn dờng Hồ Chí Minh pơgồp bal mờ cơldŭ kham ling klàng làng bol lam lơh. Di dơ̆ do, Gah đơng lam mpồl ling sền gàr tiah nhàr dà lơgar, Mpồl ling sền gàr tiah nhàr dà lơgar càr Dăk Lăk, Ủy ƀan Ñân zân kơnhoàl Ea Súp… neh jàu pà gai lòng kir sơnrai ai 10 nă cau dồ nă să mờ mpồl bal in pà phan ƀàn ai git nđờ jơt nă cau dùl nă să, mpồl bal neh geh cồng nha jak ngan tàm srơh “Jơh gùt làng bol tus bal sền gàr tiah nhàr dà lơgar”.