VOV4.K’ho- Jăt jơnau ai bơh Ƀộ Giáo zụk mờ Đào tạo dê, bơh ngai do 04/05, kơnòm bơsram tàm jơh gùt lơgar sơnđờm cih mat dan pơrlòng jơh bơsram kâp pe nam 2022. Dơ̆ pơrlòng jơh bơsram kâp pe geh lơh tàm 2 ngai, hơ̆ là ngai 07 mờ ngai 08/07 nam 2022.

Do là nam sơnrờp, kơnòm bơsram ơdŭ 12 cih mat dan pơrlòng jơh bơsram kâp pe jăt broă lơh bơh tàm internet jơh lơm (ală nam kơnòm bơsram gơtùi sac rwah cih mat bơh tàm internet halà lơh sră cih mat tơn). Jăt mờ hơ̆, kơnòm bơsram gam bơsram ơdŭ 12, nam bơsram 2021- 2022 lơh jăt broă lơh cih mat dan pơrlòng jăt broă lơh bơh tàm internet bơh ngai do 04/05 tus 5 jiơ mho ngai 13/05 tàm Anih ătbồ pơrlòng tàm anih: https://thisinh.thitotnghiepthpt.edu.vn.

Ală cau pơrlòng khăt gơboh kung gam lơh sră cih mat dan pơrlòng geh lơh tơn mờ sră bè ală nam; anih cih mat dan pơrlòng bơh Sở Giáo zụk mờ Đào tạo ală càr mờ ƀòn dờng dê ai. Tŭ geh bơta lơi ờ hềt wă wờng, kơnòm bơsram pal lùp tơn mờ cau pơgru geh jàu kơnòl dong kờl bơh hìu bơsram dê halà lùp mờ sồ điện thoại dong kờl: 1800 8000 ñáñ sồ 2.

Cau mblàng Lơ Mu K’Yến