VOV4.K’ho- Drim do (07/6), Quôk hội pơn jat tai cribơyai tàm hìu pơrjum bè jơnau rơcang cih Nghị quyết bè lam lơh tơrlòng lài 2, 3 kơ cế, broă lơh krơi is bơtàu tơnguh càr Khánh Hòa. Iat sră yal, jơnau yal sền sơ wì bè broă ntrờn priă càn rê ai càn wơl, ala mat Cíñ phủ lơh gơs broă ai pà kes priă dà lơgar; cribơyai tàm hìu pơrjum bè broă ntrờn priă càn rê ai càn wơl, ala mat Cíñ phủ lơh gơs ai pà kes priă dà lơgar.

Mho do, sơn đờm 2 ngai mờ nggùl lùp mờ hơ jơnau lùp. Ƀộ trưởng Ƀộ Nông nghiệp mờ Phát triển Nông thôn ồng Lê Minh Hoan tus bal hơ jơnau lùp sơn rờp mờ mpồl broă bè lơh sa suơn sre. Lài hơ̆, tàm mho ngai 06/6, Quôk hội neh cribơyai bè tơn jơh broă lam lơh jat Nghị quyết sồ 66 bơh Quôk hội dê mờ lam lơh rơndap broă lơh gùng Hồ Chí Minh tơngai pơn jat tai. Tus tŭ do, rơndap broă neh 2 dơ̆ ờ lơh gơs tơngai hơ pơrgon, gam 171 kơi sồ ờ hềt geh bơcri priă lơh. Uă jơnau đơs sồr do là rơndap broă lơh kuơmàng dà lơgar dê, pal ai priă bơcri nàng lơh gơs rơndap broă, gàr niam bơta lơh sùm bơh tiah đah tô mut tàm tiah đah jum dà lơgar; sồr Cíñ phủ tă priă nàng lơh gơs ală gơl gam wơl nàng gùng Hồ Chí Minh geh ai lòt rê niam tàm tơngai tus.

Cau mblàng K’Duẩn