VOV4.K’ho- Ngai do 16/02, 51 càr mờ ƀòn dờng sơnđờm dơ̆ bơyai lơh jàu, dờp ling tàm jơh gùt lơgar, nam 2022 mờ nùs nhơm sơrbac mhar, ờdo ờdă, lơh jăt niam jơnau sồr rơcăng sơndră kòp.

Bulah broă lơh sac rwah mờ hòi làng bol lòt ling geh lơh tàm tơngai kòp Kovid-19 gơbàn kal ke, mơya ală tiah tàm gùt lơgar neh lơh sir 100% broă jàu sac rwah mờ hòi làng bol lòt ling nam 2022 mờ bơta niam uă, uă ngan ơruh pơnu gơ kờn sac rwah kơnòl broă  ling klàng lơh geh khà pràn kơldang să jan khà dùl, khà 2. Nàng sền gàr bơta niam sac rwah ling, Kục Bơta pràn ling klàng gơwèt Gah pơlam broă ling klàng Mpồl ling klàng làng bol Việt Nam neh lơh niam broă lơh tă pơgồp jơnau đơs, jơnau sồr, ală anih lơh broă, mpồl lơh broă, ală tiah gĭt nền broă gơlik geh, lam lơh jăt dùl ròt bal ală broă lơh, ngac ngar tàm tŭ đơng lam, jơh nùs lơh ngan ờ lời kòp bơtờp lơh gơrềng tus bơta niam sac rwah ling. Ai lài sac rwah ală ơruh pơnu geh să jan pràn kơldang niam. Jăt broă rơndăp lơh, broă lơh jàu ling geh lơh bơh ngai do 16/02 tus jơh ngai 20/02, lơh sir dơ̆ jàu ling tàm nam do.

Cau mblàng Lơ Mu K’Yến