Nđờ mang do, uă ƀòn làng bol ơm kis tàm ƀòn dờng Đà Nẵng sùm àng đèng. Tàm sơnah ƀòn Hòa Hải, quận Ngũ Hành Sơn, git nđờ jơt nă cau geh cau lơh phan, cau ling, kông chức, viên chức, ală cau kra rlau 70 sơnam neh tă pơgồp is mbar, khoah tơlir nàng klơm mbar jòng, mbar lơm pòng pơyua ai làng bol tiah gơtìp trồ tiah lơh aniai tàm tiah đah tô dà lơgar in. Tơl nơm mbar lơm mpòng là klơm jơh nùs nhơm đềt mềr làng bol dê pơyua ai làng bol tiah đah tô dà lơgar in.

Àng drim gờñ ngai do, mò Trần Thị Thương, hìu bơnhă tac phan tàm drà sơn rờp Hoà Cường neh sang tĕ broă tac bro, lòt blơi 50 kĭ mbar mờ khoah tơlir nàng tơl nă cau bal mờ gơp klơm. Mò yal: “Klo yal tàm rơdiô, añ gŏ jê nùs ngan, mơya he ờ gơtùi dong uă bè ală cau ndai, den tàng añ tă pơgồp dồ êt mbar klơm. Dùl pơnai tŭ jơlgoh ndrờm mờ dùl kơldung tŭ hờm. Bơh mang òr tus tŭ do añ kơlôi uă ngan, àng drim do añ lòt do nàng thàn gơm bañ, pơyua tàm tơngai tơn. He jê nùs ngan, tài là cau dùl lơgar bal den tàng nđàc sơnggit ngan”.

Ală ngai do, hìu ồng Nguyễn Thành Long, cau tàm mpồl rơndeh kong goa dềt Đà Nẵng tàm sơnah ƀòn Hòa Hải, quận Ngũ Hành Sơn gơ gơs là anih nàng làng bol bal mờ gơp klơm, gơm mbar pơyua ai tiah đah tô dà lơgar in. Jơh gùt mang mờ ngai, tềng bơdìh hìu, bơnhă ồs tŭ lơi kung hơng lơm. Jơh gùt mang làng bol tàm ƀòn ơm sền glah ƀañ. Ồng Đặng Tâm bulah neh rlau 70 sơnam ơm tàm quận Ngũ Hành Sơn kung gam ngar mang nàng sền glah mbar jòng nàng thàn àng drim gờñ jun pơndiang dong kờl làng bol tàm tiah đah tô dà lơgar: “Añ bulah neh dờng sơnam mơya kung lơh ngan klơm mbar lơm pòng bal mờ oh mi tàm do nàng pơyua dong làng bol gơtìp càl rbut dờng, dà tih lơh aniai tàm ală càr tiah đah tô dà lơgar. Bol hi tus bal klơm mbar bơh mang òr tus tŭ do, lơh tus 11, 12 jơ mang hơ̆ sồng rê, ngai do bol hi kung gam lơh tai sơl”.

Hìu tac dà kơphe bơh ồng Nguyễn Thành Long dê kung gơ gơs là anih nàng làng bol in tus pơyua phan dong kờl ai làng bol tiah dà tih lơh aniai tàm tiah đah tô dà lơgar in. Ồng Long đơs là, uă nam do, pah tŭ Đà Nẵng halà làng bol tiah tàm gùl lơgar gơtìp trồ tiah lơh aniai ndrờm dờp geh bơta dong kờl bơh làng bol gùt lơgar dê. Tŭ do, làng bol ală càr tiah đah tô dà lơgar gơtìp kal ke, làng bol kung tă pơgồp is, tam pà bal bơta kal ke. Ndrờm là cau dùl dà lơgar bal, cau lơi kung jê nùs mờ kơp kờñ geh tam pà bal kal ke mờ làng bol tiah đah tô dà lơgar tŭ do: “Ngai òr neh klơm geh 1 rbô nơm mbar, ngai do klơm tai 1 rbô nơm nàng jun pơndiang tus tiah đah tô dà lơgar dong kờl làng bol. Oh mi tus bal tàm uă mpồl, tơl nă cau dong kờl dùl êt. Làng bol, oh mi kung tă pơgồp priă nàng blơi phan nàng klơm, tàm ngai hìng bol hi rơp lòt tus càr Yên Bái. Tus bal lơh broă do bol hi kung hòi jà jơh thôn, ƀòn mờ tổ zân phố mờ oh mi cau ùr tàm sơnah ƀòn Hòa Hải, quận Ngũ Hành Sơn. Bol hi ờ hềt ơm, mờ gam pơn jat tai klơm, gơm mbar gùt mang in. Priă tă lơh den cau lơi geh bơta lơi den tă pơgồp bơta hơ̆, pơn yơu bè dà hùc, ƀung mi, bañ bùñ, phan ngui sa pal geh, bol hi cih jơh mờ jun pơndiang tus ală càr đah tô dà lơgar in. Bol hi kung gam klơm mbar lơm pòng tus àng drim ngai hìng”.

Ală ngai do, bàr, pe anih lơh ƀañ tàm ƀòn dờng Đà Nẵng lơh lài ƀañ nàng dong làng bol tiah đah tô dà lơgar. Gơnoar atbồ ală càr, ƀòn dờng tiah tàm gùl lơgar neh hòi jà làng bol tă pơgồp, dong kờl làng bol tiah đah tô dà lơgar gơtìp hoàc huơr tài bơh trồ tiah lơh aniai. Ală mpồl lơh broă dong kờl is neh lòt gùng tus bal tàm broă lơh dong kờl rềs àr mờ wàs kloh niam tơnơ̆ càl rbut dờng lơh aniai. Ală rơndeh bơh tiah tàm gùl lơgar tàm jat gơp lòt tus tiah đah tô dà lơgar cèng bal mờ phan ngui sa pal geh, phan sa mờ bềng lìu nùs nhơm đềt mềr bơh  cau tiah tàm gùl dà lơgar dê wèt hờ làng bol tiah trồ tiah lơh aniai tàm tiah đah tô dà lơgar, dong khi mhar gàr bè ờs wơl rài kis.