Ơ ồng, Nghị quyết sồ 23 bơh Ƀộ Cíñ trị dê gam pờ geh tŭ niam tơnguh bơtàu ai tiah Tây Nguyên in. Mờ bơta geh krơi is bơh càr Dăk Lăk dê, nghị quyết geh ai tus bơta gơn kơnờm tơnguh bơtàu bè lơi?

Ồng Nguyễn Đình Trung: “Gơtùi đơs Nghị quyết sồ 23 bơh Ƀộ Cíñ trị ai geh là 1 broă lơh gơguh pràn kwơ màng tàm broă tơnguh bơtàu lơh sa mpồl bơtiàn, sền gàr niam bơta lơngăp lơngai dà lơgar tàm tiah Tây Nguyên đơs bal mờ càr Dăk Lăk đơs is. Bal mờ broă lơh lơh broă pa geh Cíñ phủ ai tơlik lơh tàm hơ̆ lơh mùl màl jơh gơs 23 kơnòl, 9 rơndăp broă bơcri priă bè broă lơh gùng lòt tơrbŏ bal tiah Tây Nguyên dê. Càr Dăk Lăk là càr tàm tiah Tây Nguyên mờ geh gơnoar broă là tiah tờm tiah do dê. Do geh là ală bơta tờm lài ngan kwơ màng pờ geh uă bơta niam pa ai càr Dăk Lăk in gơtùi ngui, lơh geh cồng nha rơlao ală bơta pràn, sơrlèt mờ kal ke, bơta lòng ai geh broă tam gơl pa, pràn kơl dang tàm broă tơnguh bơtàu lơh sa, gàr niam bơta lơngăp lơngai dà lơgar.

Càr Dăk Lăk git nền ờ uă bơta kal ke tàm broă lơh jăt hơ̆ là: bơta tàm pơrlòng uă bơh broă tơrgùm bal lơh sa tàm drà kă bro phan geh lơh bơh broă lơh sa suơn sre. Dơ̆ bàr, mpồl cau lơh broă b lah gal, mơya khà cau lơh broă geh bơta niam ờ hềt uă. Broă dơ̆ pe, càr Dăk Lăk gam là càr rơƀah ờ hềt tơl pràn tàm pơn ring is kes priă, khà hìu rơƀah tàm tiah làng bol kòn cau, tiah kal ke gam uă lơh gơguh ală bơta ờ niam tàm rài kis mpồl bơtiàn...”.

Bè hơ̆, càr geh gùng dà bè lơi nàng sơrlèt mờ ală kal ke hơ̆, ngui geh bơta pràn bơh càr dê nàng lơh geh cồng nha nghị quyết, ơ ồng?

Ồng Nguyễn Đình Trung: “Càr git nền mhar lơh mờ lam lơh jăt uă broă lơh bơh càr dê nàng lơh jăt nghị quyết bơh Ƀộ Cíñ trị, lơh jăt broă lơh, lơh broă bơh Cíñ phủ dê. Dơ̆ bàr, lơh gơs broă lơh, yal, kĭ mờ lơh geh cồng nha broă rơndăp lơh càr Dăk Lăk tơngai bơh nam 2021 tus 2030 mờ wèt tus nam 2050. Gàr geh bơta niam mờ rơndăp ù tiah tơrgùm bal dà lơgar dê, rơndăp ù tiah gah dà lơgar mờ rơndăp ù tiah tàm tiah Tây Nguyên dê. Dơ̆ pe, pơn jăt tai lơh niam rơlao tai ală bơta geh tŭ do. Kwơ màng ai tàm 4 bơta tờm hơ̆ là: Tơnguh bơtàu ală phan geh lơh bơh broă lơh sa suơn sre, brê bơnơm geh kwơ uă; Tơnguh bơtàu broă lơh sa mờ măi mŏk lơh gơs phan ngui sa bơh phan lơh sa suơn sre, brê bơnơm, phan tàm dà mờ năng lượng geh lơh wơl uă; tơnguh bơtàu lơh sa ƀòn drà, broă lơh bơtơ̆t rơbòng dà, tơnguh bơtàu broă lơh logistic jăt tàm bơnàng jă sồ, lơh sa sồ, mpồl bơtiàn sồ. Tàm hơ̆ tơnguh bơtàu ƀòn dờng Buôn Ma Thuột gơs tiah tờm Tây Nguyên dê jăt jơnau đơs pơn dŭt sồ 67 bơh Ƀộ Cíñ trị dê. Mờ càr geh lơh jăt nền nòn, ai geh nùs nhơm ring bal uă tàm ală kấp ală gah lơh broă bè broă lơh jal mhar tàm broă chồl pràn broă lơh tơrbŏ bal tiah, ai geh bơta ring bal nàng bơsong ală tiah kal ke, tơnguh uă bơta pràn tàm pơrlòng, ngui uă ngan bơta pràn bơh tiah do dê. Lơh geh cồng nha ală broă lơh dong kờl rài kis lơh sa mpồl bơtiàn, drơng rài kis làng bol in. Tàm hơ̆ uă ngan là làng bol ală kòn cau sền gàr niam dà lơgar sền gàr bơta lơngăp lơngai tàm càr”.

Tàm uă gah broă tơnguh bơtàu Tây Nguyên dê, lơh jăt ală rơndăp broă là kwơ màng ngan. Mơya tàm uă tiah tàm do, ală rơndăp broă lơh dờng neh gơtìp uă kal ke. Tàm càr Dăk Lăk broă do bè lơi mờ lơh bè lơi nàng lơh geh “jòng pơrgan geh niam” tàm broă lơh jăt ală rơndăp broă, lơh pràn broă tơnguh bơtàu, lơh geh bơta gơguh jăk jăt jơnau kờñ tàm Nghị quyết sồ 23 dê?

Ồng Nguyễn Đình Trung: “Nàng lơh rơlao tai cồng nha priă bơcri mờ tơnguh uă rơlao tai cồng nha ală rơndăp broă pơgồp bal tàm broă lơh geh cồng nha Nghị quyết bơh Ƀộ Cíñ trị, càr Dăk Lăk hơ geh tơnguh uă rơlao tai kơnòl, ai geh nùs nhơm ring bal uă tàm broă lơh jăt; ai loh kơnòl bơh tơl anih lơh broă, tơl mpồl lơh broă tàm broă lơh jăt. Rơcang lài nền nòn jơh nùs tàm broă lơh jăt ală kơnòl bơh càr dê. Mờ pơn jăt tai pơgồp bal nền nòn mờ ală anih lơh broă dà lơgar, ală càr tàm tiah do nàng lơh ală rơndăp broă. Tàm broă hòi jà priă bơcri mờ lơh ală rơndăp broă pal sền kwơ ală broă lơh geh cồng nha ală priă bơcri gùt mpồl bơtiàn nàng bơcri priă lơh phan bơna lơh sa mpồl bơtiàn tờm. Pơn jăt tai lơh gơs kơrnoăt nàng hòi jà broă bơcri priă, lơh pràn broă lơh niam sră nggal, lơh niam tiah bơcri priă, tơnguh broă atbồ dà lơgar bè bơcri priă bơ̆t bơtàu. Lơh jăt nền nòn broă lùp sền, sền gròi, jăt sền gơwèt mờ ală broă bơcri priă. Mờ rơndăp săp sèng jăt bơta geh ai lài ală rơndăp broă nàng ai geh priă jền bơcri priă jơh gờñ ai broă lơh bơ̆t bơtàu ngui geh cồng nha, pơgồp bal tàm broă lơh gơs ală jơnau kờñ tơnguh bơtàu lơh sa mpồl bơtiàn neh geh ai, bơh tŭ hơ̆ pơgồp bal tàm broă tơnguh bơtàu bal tiah Tây Nguyên mờ gùt lơgar”.

Ơi, dan ưn ngài ồng!