Ồng Phạm Thế Mãn, drơng broă Cơldŭ jak chài mờ lơh broă bal ală lơgar- Tiah sền gàr brê bơnơm Nam Nung pà gĭt, “Smart mobile Nam Nung” là phan ngui bơh dùl viện kơlôi sơnơng bè brê bơnơm tàm Hà Nội dê lơh is ai mpồl lơh broă in.

Phan ngui do jat tàm địñ vị vệ tiñ den gơtùi lơh broă tàm jơh ală bơta trồ tiah, ù tiah, di pal ngan mờ broă lơh sền gàr bê, prap gàr lila phan kis tàm brê. Ală jơnau ơn prap, rùp hin cih dờp tàm tŭ lòt sền bè li la ngan phan kis tàm brê, bè phan poan jơng, chi che kwơ ờ hoan geh ngan halà bè mus kơl dơm chi tìs mờ kơrnoăt boh lam, mus kơl brê, sơgràm ù brê... geh cih pơyoa is tus tàm măi tờm tàm anih lơh broă tŭ geh gùng pờ điện thoại dê. Jat tàm ală jơnau, rùp hin bơh mpồl, mpồl lòt sền dê pơyoa, kwang đơng lam bồ mpồl lơh broă gơtùi mhar ngan ai tơlik ală broă lơh di pal mờ ală bơta gơlik geh tàm bơta geh ngan. Mơkung, bơh phan ngui do sơl gơtùi gròi sền broă lơh bơh tơl nă kwang bàng, cau lơh broă dê. Ồng Phạm Thế Mãn đơs:“Bè phan ngui măi mok smart mobile den tàm do he gơtùi sền gĭt là oh mi khi lòt sền gàr brê mut jrô tus tàm tiah lơi, lòt bè lơi, lòt tus ală tiah lơi mờ dơ̆ lòt sền bơh oh mi dê ngan ngồn rlau tai. Mờ tàm tŭ lòt sền den gơtùi sền gŏ ală phan poan jơng, chi che kwơ ờ hoan geh den gơtùi cih wơl tàm măi bơh he dê”.

Ồng Phạm Trọng Thuỷ, Phó kwang atbồ Tiah Sền gàr brê bơnơm Nam Nung pà gĭt, mờ bă brê mờr 22 rơbô lồ, lă ơnàng tàm ù tiah 3 kơnhoàl Krông Nô, Dăk Glong mờ Dăk Song, tiah sền gàr geh rlau 120 jơi phan poan jơng, chi che kwơ ờ hoan geh ngan mat tàm sră pơr hê Việt Nam mờ tàm dunia dê. Bơta kơn jơ̆ tàm broă lơh sền gàr brê, prap gàr li la phan kis tàm brê ngai sơlơ gơguh tàm tŭ mpồl cau sền gàr ờ hoàn geh, sồr mpồl lơh broă pal geh ală tam gơl pa. Tiah sền gàr brê bơnơm Nam Nung neh ngui măi mok jat sền bơh ngài, măi mok par ờ geh cau măi, phan ngui tàm điện thoại ngăc ngar... nàng tơnguh uă cồng nha lơh broă sền gàr brê.

Ồng Phạm Trọng Thuỷ đơs nền, mờ bơta dong kờl uă ngan bơh măi mok dê, ală broă lơh lơh aniai tus tiah sền gàr brê rơ̆p mhar ngan gĭt gŏ mờ kơryan. Ồng Phạm Trọng Thuỷ, đơs: “Tiah sền gàr brê bơnơm Nam Nung neh ngui bơta chài măi mok tàm broă lơh atbồ, sền gàr brê bè ngui ală smart, dơ̆ 2 là ngui măi mok par ờ geh cau măi nàng drơng broă lơh jat sền, sền gĭt bơta gơlik geh tàm brê, dơ̆ 3 là ngui ală măi yal tơngĭt ồs sa brê. Bơh hơ̆, lơh geh ală bơta ƀuơn ngan ai mpồl atbồ, sền gàr brê, tơrmù tŭ tơngai lòt sền, sền gàr, ù tiah jat sền dờng ơnàng rlau. Tơrmù ƀà ală gơrềng tus ală jơi phan poan jơng, chi che kwơ ờ hoan geh ngan, kơryan lơh aniai tus bơta kwơ brê dê”.

Ngui măi mok drơng broă sền gàr brê, broă lơh cèng wơl cồng nha uă ngan neh geh Phó Thủ tướng Cíñ phủ ồng Trần Lưu Quang cih dờp, jờng rơ tŭ lòt sền tàm bàr pe tiah sền gàr brê bơnơm tàm tiah Tây Nguyên tàm nhai 5 pa do. Tàm pơrjum gùt lơgar bè broă lơh atbồ, sền gàr brê bơyai lơh tàm càr Kon Tum, Phó Thủ tướng ồng Trần Lưu Quang đơs sùm, do là broă lơh nàng gah lơh broă brê brơnơm jơh gùt lơgar in bơsram jat bal: “Ngui măi mok, flycam tus bal sền gàr brê, flycam par tềng hơđang sền gŏ ƀuơn ngan. Bơta dơ̆ 2 hơ̆ sồng niam ngan: tơl nă kwang bàng sền gàr brê, kwang bàng lòt sền gàr brê crăp dùl phần mềm tàm điện thoại at tê, tơl nă cau pal lòt tơl 120 kơi sồ dùl nhai, cau lơi lòt ờ tơl kờp bè ờ lơh sir broă jàu, ƀuơn ngan, dùl phần mềm dềt ngan crăp tàm điện thoại cau dồ nă să. Ală bơta, bồ tơngoh kơlôi sơnơng dềt ngan bè hơ̆ tơngkah ală kwang bàng in nàng lơh niam broă he dê, ala tài sồr pal geh uă cau, bol he tam gơl bồ tơngoh kơlôi sơnơng tĕ rơ̆p di pal ngan”.

Tàm tơngai brê gơtìp aniai ngai sơlơ rơlăc rơlèo ngan, mpồl sền gàr brê gam ờ hoan geh, den broă ngui măi mok, măi mok pa ngan ngồn là broă lơh geh cồng nha tàm broă atbồ sền gàr brê, prap gàr li la phan kis tàm brê, mờ di pal mờ broă lơh ờ gơtùi pleh klàs ngan tềng đap jơnau sồr tam gơl sồ bơh Dà lơgar dê