Ngai lồi poh, đảng viên ồng Y Bleng, kòn cau M’Nông, là dồ nă cau ling yau mờ là kra ƀòn bơh ƀòn 9, xã Dăk Drô, kơnhoàl Krông Nô dê bal mờ mpồl ătbồ is ƀòn lòt còp tai tơl hìu rƀah tàm ƀòn. Bơh hơ̆, ồng mờ mpồl ătbồ is ƀòn mblàng yal, hòi jà ală hìu lơh ngan lơh sa, tam gơl bồ tơngoh kơlôi sơnơng lơh sa. ỒngY Bleng pà gĭt, tàm ƀòn di 5 nă đảng viên, 5 hìu bơnhă pas sơm rơ̆p bal mờ gơ̆p dong kờl dồ hìu bơnhă rƀah. Khi jăt sền dong kờl ală hìu brồ guh, bơh broă dong kờl chi sơntìl, kòn sơntìl, gùng dà lơh sa…, tus dì broă jòi drà tăc phan lơh geh. Ală hìu rƀah geh ià tê, sơnio broă, lơh geh bơta gơn kơnờm bè phan bơna mơkung pơndờm pơnđiang bè nùs nhơm nàng brồ guh. Jơnau kờñ bơh ƀòn dê là tơnơ̆ pơgăp 3 nhai gơtùi dong kờl geh hìu bơnhă lik klàs rƀah dồ bă kơ̆ kơl jăp. Ồng Y Bleng yal: Oh mi kung pal tàm hòi jà gơ̆p bal, hòi jà làng bol ƀòn lơgar tam klăc bal, bơtàu tơnguh lơh sa. Ờ gŏ di là cau ling yau là dồ nă să he ờ, cau ling yau là pal hòi jà làng bol, kung pal lòt jăt sền hìu bơnhă rƀah, sùm bè hơ̆. Cau lơi hìu mờ kal ke den he kung tơrgùm tàm hòi jà gơ̆p, oh mi pas sơm geh phan bơna den dong kờl bal hìu bơnhă hơ̆.

Ngai 23/03 do, càr Dăk Nông bơyai lơh tơngkah kir sơnrai 20 nam ngai crơng gơs wơl càr, kung là ngai tơngkah kir sơnrai 49 nam tơngklàs Gia Nghĩa, càr Quảng Đức (yau). Sền gŏ bơta tam gơl uă ngan bơh ƀòn lơgar dê, bơh ƀòn dờng Gia Nghĩa dê, đảng viên ồng Điểu Đi, ơm tàm ƀòn Bu Păng 2, ngoh rơngăc kah wơl ală ngai lòt yal tơngĭt jơnau, hàu kơh hàu bơnơm, coah gùng brê dờng, gàr sùm yal tơngĭt jơnau ai mpồl kăc màng in tàm tiah pôs đồng tiah nhàr lơgar xã Quảng Trực, kơnhoàl Tuy Đức. Ồng yal, rài tam lơh gơtìp bol sò tơm tơn dùh ƀòm, mền, cui aniai cui rơcai ngan, mơya làng bol kung gam gàr wơl pèt ù, pèt tiah, ơm wơl tàm ƀòn, dồ nùs lòt jăt Đảng, jăt Kăc màng. Dà lơgar tơrgùm dùl, rài kis làng bol dê ngai sơlơ hờm ram, tiah nhàr lơgar tam gơl pah ngai, ồng Điểu Đi sơlơ pin dờn dòn kơnờm tàm bơta đơng lam bơh Đảng dê. Ồng Điểu Đi, đơs: Rài tam lơh den bal mờ kăc màng tam lơh sền gàr kơnhoàl ù tiah do. Neh tơngklàs den tơrgùm lơh sa, bơ̆t bơtàu ƀòn lơgar. Mờ gơnoar broă là đảng viên, cau geh bơngă pin dờn den bol hi kung pal hòi jà làng bol đòm jăt nùs nhơm, pơđơl pràn lơh sa, bơtàu tơnguh rài kis mờ sền gàr kơnhăp tiah nhàr lơgar do.

Pơñiờ să geh kis tàm ƀòn lơgar tờm Dăk Nia, ƀòn dờng Gia Nghĩa, tiah geh Tiah tềl lời wơl dà lơgar dờng màng là tiah tàm nam 1960 Mpồl B90 tàm tiah đah Tô mờ Mpồl C200 tàm tiah đah Jum ờ gơtùi tàm yal tơngĭt jơnau, nàng pờ gùng Hồ Chí Minh crih crài, ồng K’ Sung, Phó Ƀí thư Ci ƀộ, Kwang ătbồ ƀòn Ting Wel Dơm, sơlơ chờ hờp tŭ rài kis ƀòn lơgar ngai sơlơ bơtàu tơnguh. Ồng K’ Sung, đơs: Tàm rài tam lơh, gơ wèt mờ làng bol jơi bơtiàn ơm kis dồ bă tiah tàm do sùm pin dờn dòn kơnờm tàm Đảng. Tus dì tŭ do, làng bol kung gam sùm pin dờn dòn kơnờm tàm gùng dà bơh Đảng dê, adăt boh lam bơh Dà lơgar dê, sùm tam klăc bal nàng sền gàr ring lơngai tŭ do mờ sùm sùm tam klăc uă nàng bơ̆t bơtàu lơh sa ngai sơlơ brồ guh, rài kis ngai sơlơ gơguh uă, bơtàu tơnguh nàng làng bol pas sơm, dà lơgar pràn kơldang.

Ngui niam gơnoar broă bơh ală đảng viên dê, cau geh bơngă pin dờn dê tàm ƀòn lơgar ală jơi bơtiàn, bơh 20 nam crơng gơs wơl càr (tam cah bơh càr Dăk Lăk yau), càr Dăk Nông sùm gàr kơ̆ kơl jăp lơngăp lơngai cíñ trị, bơtàu tơnguh pràn kơldang lơh sa- mpồl bơtiàn. Nam 2020, càr Dăk Nông neh lik klàs bơh càr rƀah, mờ tŭ do gam pơđơl pràn gơgơs là càr bơtàu tơnguh đau bơh tiah Tây Nguyên dê.

Tềng đăp ală jơnau sồr pa bơh rài kis mùl màl, nam 2013, Tỉñ ủy càr Dăk Nông ai lơh jăt Broă rơndăp lơh sồ 05 bè bơ̆t bơtàu mpồl kwang bàng tờm tàm tiah jơi bơtiàn dồ êt nă cau. Tus tŭ do, mpồl cau do geh mờr 500 nă cau, geh bơto bơta gĭt wă bè gùng dà broă lơh bơh Đảng dê, adăt boh lam bơh Dà lơgar dê, bơta chài hòi jà làng bol tàm bơta pa. Bơh hơ̆, khi rơcăng lài, jơh nùs lơh niam broă jòi gĭt jơnau kơlôi sơnơng, bơta kơ̆p kờñ bơh làng bol dê nàng yal wơl di tŭ ală broă kal ke ngan bơh tiah he dê nàng geh gùng dà bơsong. Kung bơh bơta jơh nùs hòi jà bơh khi dê neh dong làng bol yờ tơnguh uă nùs nhơm rơcăng ngăc, kơrhia lài, tam dră mờ kơryan geh cồng nha ală jơnau đơs tìs ờ di, sơmờm broă jơi bơtiàn, broă jăt yàng. Uă dơ̆ broă tàm gơjrañ kwềng, tam đơs tam lah, tam pìt tam phà geh cah rña, bơsong tơn bơh ƀòn lơgar. Mờ ală cau do kung neh jơh nùs tus bal bơ̆t bơtàu ală srơh tàm pơrlòng kờñ gơboh dà lơgar, ală dơ̆ hòi jà tàm ƀòn lơgar bè jơh gùt làng bol tam klăc bơ̆t bơtàu ƀòn lơgar pa, tơrmù rƀah kơ̆ kơl jăp.

Ồng Hồ Văn Mười, Phó Ƀí thư Tỉñ ủy, Củ tịc Ủy ƀan Ñân zân càr Dăk Nông đơs nền, ngui niam gơnoar broă bơh ală đảng viên, cau geh bơngă pin dờn tàm tiah jơi bơtiàn dồ êt nă cau dê là kơnòl broă kwơmàng bơh ală kâp, ală gah broă lơh dê nàng càr bơtàu tơnguh. Ồng Hồ Văn Mười, đơs: Ală kâp ủy, gơnoar ătbồ ală tiah jơh nùs rơcăng lài lam lơh ală broă lơh nàng kờñ ngui niam gơnoar broă cau geh bơngă pin dờn, mpồl cau tờm dê, pơn jăt tai bơ̆t bơtàu, lơh kơ̆ kơl jăp wơl mờ pồ tơl mpồl cau geh bơngă pin dờn tàm tiah jơi bơtiàn dồ êt nă cau; pơn jăt tai bơ̆t bơtàu mờ rề ơnàng ală cau pơnrơ jak, broă pơnrơ jak tàm ală gah broă nàng pơgồp bơnah bơtàu tơnguh lơh sa, mpồl bơtiàn, sền gàr lơngăp lơngai dà lơgar tàm ală tiah pơgồp bơnah bơ̆t bơtàu ƀòn lơgar tờm Dăk Nông ngai sơlơ pas sơm niam bơnĕ.

Đơs di gơnoar broă bơh cau geh bơngă pin dờn dê tàm ƀòn lơgar jơi bơtiàn dồ êt nă cau dê, geh broă dong kờl dipal nàng gơtùi ngui uă ngan rlau jơh gơnoar broă “ală tờm chi jrê dờng bơh ƀòn lơgar dê”, neh pơgồp bơnah dong càr Dăk Nông gàr kơ̆ kơl jăp lơngăp lơngai cíñ trị, lơh geh ală cồng nha tàm bơtàu tơnguh lơh sa.