Nam bơsram 2022- 2023, Hìu bơsram kâp 2 xã Đăk Mar, kơnhoàl Đăk Hà geh 673 nă kơnòm bơsram, tàm hơ̆ 312 nă kơnòm bơsram là oh kòn làng bol jơi bơtiàn kòn cau dùl êt nă cau. Ùr pơgru Phạm Thị Kim Hồng, Phó Kwang atbồ Hìu bơsram pà git, bal mờ hìu bơsram tờm, hìu bơsram gam geh hìu bơsram dơ̆ 2 tàm thôn Kon Gung- Đăk Mút ngài rlau 11 kơi sồ. Tàm hìu bơsram do geh 7 ơdŭ bal mờ 230 nă kơnòm bơsram, jơh ală là oh kòn làng bol kòn cau Bahnar mờ Sơdàng. Nàng broă bơto bơtê mờ bơsram lơh geh cồng nha ngan ngồn, Mpồl đơng pơlam hìu bơsram kâp 2 xã Đăk Mar neh tam pà kơnòl ai 7 nă pơgru là đảng viên in atbồ ală ơdŭ mờ ală pơgru neh ngui niam gơnoar broă cau pơgru làng bol: “Ci ƀộ hìu bơsram jàu ai đảng viên in atbồ ală ơdŭ mờ lòt tus tơl thôn drơng broă mpồl hìu bơnhă nàng jat sền kơnòm bơsram, git bơta geh ngan tàm ơdŭ bơsram bơh ală oh dê nàng geh broă lơh mblàng yal, hòi jà. Lơh jat kơnòl broă bơto bơtê mờ cau bơsram geh kal ke lơi den geh yal tơn mờ ală đảng viên kong kơnòl tờm. Bơdìh hơ̆ tai, kung jàu ai Đảng viên kong kơnòl pơgồp bal mờ ală cau atbồ thôn nàng hòi jà kơnòm bơsram lòt bơsram”.

Mùl màl ai gŏ broă bơto bơtê mờ bơsram tàm hìu bơsram tiah tờm kung bè hìu bơsram thôn Kon Gung- Đăk Mut bơh hìu bơsram kâp 2 xã Đăk Mar, kơnhoàl Đăk Hà dê niam ngan. Hìu bơsram sàng goh, niam bơnĕ mờ rềp mềr bè lơh gơlik tai bơta niam tàm tơl jơnau bơto bơtê bơh cau pơgru dê kung bè broă cih dờp jơnau git wă bơh ală kơnòm bơsram dê. Gơ wèt mờ làng bol jơi bơtiàn kòn cau dùl êt nă cau tàm do, rùp să cau pơgru gơ gơs rềp mềr ngan, mờng kwèng ngan. Làng bol sùm tàm đơs mờ gơp là să tờm gam kơlôi rơcang bè broă bơsram sră bơh oh kòn he dê ndrờm bè ală cau pơgru. Bơh ală broă lơh ngan ngồn bơh cau pơgru dê neh geh bơta gơ hòi gơ jà dong làng bol tam gơl bơta kơlôi sơnơng sền dờng màng rlau broă bơsram sră bơh oh kòn he dê. Bi Y Thoan, làng bol ƀòn Kon Gung geh kòn gam bơsram ơdŭ 6 yal bè bơta ki ngàm he dê: “Cau pơgru tàm do jơh nùs ngan mờ kơnòm bơsram, sùm lòt bal mờ kơnòm bơsram. Kơnòm bơsram lơi bơsram ờ git gam bơto bơtơl is tai. Pơgru jơh nùs ngan, tus tàm hìu bơto tơngkah. Mè bèp lơi ờ hềt wă gam pơlam mè bèp in bè bơta chài tàm rài kis, bơta chài pơlam tàp oh kòn he dê. Kơnòm bơsram hàm nhơl ờ bài bơsram den pơgru tus tàm hìu, geh tŭ jơh bal mè bèp ờ gròi sền mơya pơgru kung nggui tềng hơ̆ nàng tơngkah mè bèp in iat. Pơgru uă dơ̆ tus den tàng kòn añ dê kung tam gơl, tŭ do lòt bơsram bè ờs wơl”.

Bơh bơta jơh nùs tàm broă lơh ờs mờng bơh mpồl cau pơgru hìu bơsram kâp 2 xã Đăk Mar dê, khà tryăng tryồng lòt bơsram bơh kơnòm bơsram dê sùm geh rlau 90%. Cồng nha do digơlan là bè ờs gơ wèt mờ ală hìu bơsram tàm tiah ƀuơn ƀuài, mơya gơ wèt mờ dùl hìu bơsram geh khà kơnòm bơsram jơi bơtiàn kòn cau dùl êt nă cau mờr 47% là dùl bơta kuơmàng ngan. Ờ mìng bơto bơtê jơnau git wă tàm să, ală pơgru gam pơlam, bơto tơngkah kơnòm bơsram he dê git bè bơta chài tàm rài kis, ai tai ală oh in bơta pràn nàng brồ guh. Oh Y Kim Lan, kơnòm bơsram ơdŭ 7C, bơsram tàm hìu bơsram thôn Kon Gung- Đăk Mút pà git: “Ală pơgru sùm sền gròi tus bol oh, rềp mềr mờ bol oh. Pơgru tàm do sơrmah sơrmài ngan, bơto bơtê bol oh jơh nùs ngan. Oh kờñ ngan hìu bơsram do, do là hìu dơ̆ 2 oh dê. Pơgru kung bè mè bèp dơ̆ 2 bol oh dê. Oh geh pơn đơl pràn bơsram jak nàng kah ưn ngài pơgru neh bơto bơtê oh”.

Bal mờ broă lơh “bơto cau”, 42 nă pơgru hìu bơsram kâp 2 xã Đăk Mar gam geh ală tă pơgồp kuơmàng ngan gơ wèt mờ gơnoar atbồ mờ làng bol tàm ƀòn lơgar tàm broă lam lơh broă lơh jơnau kờñ dà lơgar bơt bơtàu ƀòn lơgar pa.

Git nền làng bol là cau tờm tàm broă bơt bơtàu ƀòn lơgar pa, ală nam do hìu bơsram kâp 2 xã Đăk Mar neh lam lơh niam broă ai tơlik lài gùng dà bơsram mờ broă lơh ai ală kơnòm bơsram in, ngan là kơnòm bơsram tàm 3 ƀòn jơi bơtiàn kòn cau dùl êt nă cau Kon Gung, Đăk Mút mờ Kon Klốc.

Tŭ kơnòm bơsram mut ơdŭ 9, ală pơgru atbồ ơdŭ bơsram pơgồp mờ pơgru bơto ală môn bơsram lam lơh sac rơ wah dong kơnòm bơsram sền sơ wì is pràn jak he dê nàng git là geh pơn jat tai bơsram guh kâp 3 halà bơsram broă lơh. Hìu bơsram kâp 2 xã Đăk Mar tơlik jơnau kờñ mblàng yal, hòi jà rlau 80% kơnòm bơsram jơi bơtiàn kòn cau dùl êt nă cau jơh bơsram kâp 2 pơn jat tai guh bơsram kâp 3 mờ lòt bơsram broă lơh nàng lơh gơlik mpồl cau lơh broă geh bơta niam ai xã in. Ồng Lê Xuân Hưng, Ƀí thư Đảng ủy xã Đăk Mar cih dờp, đơs niam tă pơgồp bơh mpồl pơgru hìu bơsram kâp 2 xã Đăk Mar dê gơ wèt mờ broă lơh bơto bơsram mờ lam lơh broă lơh jơnau kờñ dà lơgar bơt bơtàu ƀòn lơgar pa bơh xã dê: “Ală pơgru ndrờm ngui niam nùs nhơm geh kơnòl, ngan là ală pơgru tàm ală hìu bơsram sơnĕ. Lài do, xã bơt bơtàu ƀòn lơgar pa, ală hìu bơsram neh geh ală tă pơgồp niam ngan, gàr bơta niam mờ khà kơnòm bơsram lòt bơsram. Do là dùl broă lơh bè bơto bơsram kuơmàng ngan. Kâp 2 lòt bơsram broă lơh bơsram tai kâp 3 den ală oh ndrờm lơh jat niam ngan, ờ geh bơta kơnòm bơsram ờ lòt bơsram broă lơh. Do là dùl broă bơto bơtê kwang bàng lơh broă là cau jơi bơtiàn kòn cau dùl êt nă cau ai xã in”.

Mờ ală tă pơgồp tàm broă lơh “bơto cau” kung bè bơt bơtàu ƀòn lơgar pa, sùm uă nam, hìu bơsram kâp 2 xã Đăk Mar geh khà jờng tàm pơrlòng: Mpồl pơn rơ gơguh jak, anih lơh broă niam chài… Ờ mìng gàr kơ̆ cồng nha xã tơl khà ƀòn lơgar pa, nam 2021 pa do, xã Đăk Mar, kơnhoàl Đăk Hà, càr Kon Tum kung neh tơl khà xã ƀòn lơgar pa gơguh jơnhua.