VOV4.K’ho- Nhai ơruh pơnu nam 2022 geh tơngu me “ Cau kơnòm să bơceh lơh”. Bal mờ gùt lơgar, cau kơnòm să ală tiah tàm Tây Nguyên gam geh uă broă lơh mùl màl, wèt tus tàm ală ƀòn.

“Nhai ơruh pơnu” nam do geh Tỉñ Đoàn Dăk Lăk bơyai oơh lik lơh broă tàm xã Drai Bhăng, kơnhoàl Cư̆ Kuiñ. Tàm dơ̆ lam sồr, Tỉñ Đoàn Dăk Lăk neh jào pà broă lơh sòl àng gùng ƀòn tàm xã Ea Tiêu mờ broă lơh “Krơh sòl 3 niam” tàm hìu bơsram kấp 3 Y Jút. Bơcri priă 150 tơlăk đong nàng bơsong broă lơh ai ơruh pơnu tàm kơnhoàl Cư̆ Kuiñ in. Jào 1 hìu dong kờl mờ jào 40 pò phan (tơl pò phan geh 300 rơbô đong), 20 nơm rơndeh coh ai ală hìu nhă gơtìp kal ke mờ kơnờm bơsram sơrlèt mờ kal ke bơsram jăk in. Huyện Đoàn Cư̆ Kuiñ kung jào 1 nơm hìu dong kờl ai hìu rơƀah, 1 broă lơh ƀlàng coh plai kơnòm dềt mờ mŭt lơh 1 ƀlàng nhơl bơlai.

Lŏ H Giang Niê, Ƀí thư Tỉñ Đoàn Dăk Lăk pà git, mơ tơngu me kờñ ai geh nùs nhơm pơrlòng niam, chờ gờm ală bră lơh cíñ trị dờng tàm nam, tàm bơta gơtìp gơrềng bơh kòp gơtờp, cau kơnòm să càr Dăk Lăk neh ai geh ală khà broă mùl màl pơgồp bal mờ bơta kờñ mùl màl tàm ƀòn lơgar, ndrờm bal lơh ală broă lơh neh geh ai mờ gàr niam ờ do ờ dă tàm broă rơcang sơndră mờ kòp gơtờp.

“Tơngu me bơh nhai ơruh pơnu nam do là “Cau kơnòm să bơceh lơh”, gơs mpồl bơceh lơh di gơlan geh bal uă bơta, tàm hơ̆ geh broă bơceh lơh tàm mpồl ală broă lơh, uă ngan là bơceh lơh tàm broă gơdờp ndrờm bal mờ kòp gơtờp mờ bơyai lơh geh cồng nha pơrjum dờng đoàn tơngai bơh nam 2022 tus 2027. Gơwèt mờ ală kấp ƀộ đoàn pal tam klăc bal, dùl nùs hòi jà ală bơta pràn nàng pơgồp bal dong kờl mpồl đoàn kung bè đoàn viên ơruh pơnu, kơnòm pa tào tàm gùt càr mờ lơh ngan rơlao tai tàm broă lơh geh cồng nha 11 khà broă bơh nhai ơruh pơnu mờ ală khà broă bơh nam 2022”.

Tĩñ đoàn Dăk Lăk lam lơh ală broă ơruh pơnu

Tàm “Nhai ơruh pơnu”, cau kơnòm să càr Dăk Lăk lơh ngan lơh gơs 5 kơi sồ gùng ƀòn geh sòl àng; kham, sơm kòp, pà sơnơm ờ sa priă ai 2 rơbô nă làng bol in; lơh jăt 10 anih pơrjum, broă lơh ƀlàng nhơl ai kơnòm dềt tàm xã gơtìp kal ke in; lơh 5 nơm hìu nùs nhơm, hìu dong kờl, hìu chèo pơhê. Pơn jăt tai lòt bal mờ ơruh pơnu mŭt lơh broă, lam sồr crơng gơs bơh 1 tus 2 hợp ták xã, mpồl lơh broă bal ơruh pơnu; dong kờl ală rơndăp broă mŭt lơh broă bơh ơruh pơnu tàm càr dê.

Tàm thị trấn Plây Kần, kơnhoàl tiah nhàr dà lơgar Ngọc Hồi, Tỉñ đoàn Kon Tum kung neh bơyai lơh mŭt lơh Nhai ơruh pơnu mờ broă lơh “Nhai 3 tiah nhàr -dà lơgar añ”. Tơnơ̆ mờ tŭ pơrjum mŭt lơh, Tìñ đoàn Kon Tum neh jào pà 20 kơl dung phan ai ală hìu nhă kwang bàng, cau ling gam lơh broă tàm tiah nhàr dà lơgar mờ ơruh pơnu geh rài kis gơtìp kal ke in; jào pà sră Đoàn viên mờ Huy hiệu Đoàn ai 50 nă đoàn viên pa; yal 20 nă đoàn viên jăk chài ai kấp ủy đảng in sền, bơsram bơtơl jơnau mŭt đảng…

Di tàm dơ̆ do Đoàn ơruh pơnu bal mờ Mpồl cau ùr Ƀộ Kwang àng jào pà 10 broă tơnguh bơtàu lơh sa, tàm hơ̆ geh 1 rơbô nơm iar sơntìl deh uă tăp ai 10 hìu geh sră dong kờl, hìu geh rài kis gơtìp kal ke, cau kơ đơng yàng tàm tiah kòn cau, tiah jăt yàng. Pà 3 nơm măi vi tính, 200 pò phan tàm hơ̆ geh (sră cih, gai cih) mờ lơh broă “Dà kloh ai oh in” tàm hìu bơsram kấp 1 xã Pờ Y, kơnhoàl Ngọc Hồi, càr Kon Tum in. Jào pà 6 nơm măi vi tính, 200 pò phan, tàm hơ̆ geh (sră cih, gai cih) ai 2 hìu bơsram tàm ƀòn Phu Cưa mờ pà 16 nơm măi vi tính ai 8 hìu lơh broă kwang àng ƀòn tàm càr Attapư, lơgar Lào.

Tàm càr Gia Lai “Nhai ơruh pơnu” nam do geh Tiñ Đoàn Gia Lai bơyai lơh mŭt lơh broă tàm xã Ia Trốk, kơnhoàl Ia Pa. Tàm pơrjum mŭt lơh “Tiah niam sền sră, boh bơr mờ pơrjum Đội” geh 50 tơlăk đong; pà jơnang lơh kir lài 2 hìu: “Chèo pơrhê” ai 2 nă kơnòm dềt geh rài kis gơtìp kal ke in. Bơdìh hơ̆ tai, mpồl lơh broă do kung neh bơyai lơh ală broă lơh tài mpồl bơtiàn in, bè: Pà rơlao 400 kơl dung mhàm dong kờl, dong kờl ngai lơh broă, lơh niam wơl gùng lòt tàm ƀòn, lơh mờ pà hìu nùs nhơm. Bi Đỗ Duy Nam, Phó Ƀí thư Tỉñ đoàn Gia Lai pà git, ală broă lơh Nhai ơruh pơnu nam 2022 neh geh lơh uă bơh xã, tơlik nùs nhơm lơh ngan bơh cau kơnòm să dê, lơh geh tơl bơnah broă geh cồng nha uă.

“Ƀan Thường vụ Tỉñ đoàn kung neh geh gùng dà broă lơh ai ală broă lơh, ală broă lơh, bơnah broă den neh đơng lam ai xã in jăt mờ tơl broă lơh, jăt mờ tơl bơnah broă nàng gàr niam bè khà kòn bơnus, rơcang tàm broă ai kwang bàng đoàn viên in tus bal. Lơh bè lơi ai broă lơh hơ̆ geh gàr di tơngai lơh gơs mờ lơh niam, tàm hơ̆ uă ngan là ală broă lam sồr chờ gờm nhai ơruh pơnu mờ kwơ màng là chờ gờm Pơrjum dờng Đoàn ală kấp”.

Jàu sră Đoàn mờ Gai lòng Đoàn ai đoàn viên pa in tàm Kon Tum

Mờ tơngu “Cau kơnòm să bơceh lơh”, “Nhai ơruh pơnu” nam do neh geh Đoàn ơruh Dà lơgar Hồ Chí Minh bơyai lơh mŭt lơh tàm càr Lơgar Hà Nội. Tàm do gam geh bơyai lơh ràng tơlik broă bơceh lơh “Bơta ngăc ngar kơnòm ơruh pơnu”; Mŭt lơh ờ uă broă lơh, bè Hìu chèo pơrhê mờ pà phan ai kơnòm bơsram geh rài kis gơtìp kal ke in; lik măt mpồl lơh broă 16 Mpồ tam gơl pa bơceh lơh… Kung tàm Nhai ơruh pơnu nam do in, Đoàn ơruh pơnu Dà lơgar Hồ Chí Minh geh bơyai lơh broă cri bơyai đah Ƀí thư dơ̆ 1 Đoàn ơruh pơnu Dà lơgar Hồ Chí Minh mờ đoàn viên, ơruh pơnu; broă lơh “Nhai pe tiah nhàr dà lơgar”, jào khà pơn jờng 10 nă ơruh pơnu gam kơnòm să Việt Nam geh pơnrơ jăk nam 2021 mờ broă Tơnkah 91 nam ngai crơng gơs Đoàn ơruh pơnu Dà lơgar Hồ Chí Minh, jào khà pơn jờng Lý Tự Trọng nam 2022.

Cau mblàng Ndong Brawl