Rlau 1 nhai tơnơ̆ tŭ mut lơh Festival bơkàu Dà Làc dơ̆ 9 nam 2022, khà nac rê tus ƀòn dờng ngai sơlơ gal. Tàm ƀòn bơkàu Đa Thiện, dùl tàm 5 ƀòn tam bơkàu bơh jŏ bơh ƀòn dờng Dà Làc dê, khà nac nhơl chờ geh mut tàm suơn sền uă bơta bơkàu lì, bal mờ cau lơh broă sa tam, sơngka sền gàr bơkàu. Bi Trần Thanh Trà, tus bơh ƀòn dờng Hồ Chí Minh đơs bè bơta sền git ngan ngồn niam ngan he dê: “Gŏ dùl nùs nhơm niam ngan, do ngan là ƀòn dờng bơh bơta kờñ gơboh mờ là ƀòn dờng rbô bơkàu. Pal đơs là, tơl bơta bơkàu là dùl bơta niam krơi is… mờ jơh ală ndrờm hàng niam, lì niam ngan”.

Bal mờ ƀòn bơkàu Đa Thiện, ală ƀòn bơkàu Xuân Thành, Vạn Thành, Thái Phiên, Hà Đông bơh ƀòn dờng Dà Làc dê kung ràng uă ngan bơta bơkàu niam, gàr ală bơta pal geh nàng drơng nac nhơl chờ in. Ồng Vũ Anh Dũng, ơm tàm ƀòn bơkàu Hà Đông, sơnah ƀòn 8, ƀòn dờng Dà Làc pà git, làng bol tàm do neh lơh niam wơl gùng lòt, lơh niam wơl ală anih tus sền gơ jat bal mờ bơkàu tiơng pơn rơ: “Ƀòn tam bơkàu bol hi dê neh lơh ală anih nhơl chờ ai nac in tus sền. Tŭ geh nac tus den bol hi geh cau pơlam lòt tus tơl anih jat jơnau sồr bơh nac dê. Hơ̆ là nac kờñ tus suơn bơkàu kúk den bol hi lam tus suơn bơkàu kúk, ală suơn bơkàu ly, bơkàu hồng kung ndrờm geh cau lam lòt mờ pơlam jơh nùs ngan nac nhơl chờ in. Pal đơs là, nùs nhơm làng bol dê chờ hờp ngan tŭ pờ ală anih nhơl chờ tàm ƀòn bơkàu bè do”.

Tŭ tus mờ ală ƀòn bơkàu, nac nhơl chờ gơtùi sền git dùl ngai lơh cau lơh broă sa, jòi git bè bơta chài tam, sơngka sền gàr ală bơta bơkàu, kơnuh, plai đo krơi is bơh Dà Làc dê, pik is ală plai zơu tơi dum pơrhê, gơ rờm bal mờ rài kis bơh cau Dà Làc dê. Bơdìh mờ ală anih bơh ƀòn bơkàu lơh, tiah do gam geh uă ngan anih nhơl chờ lòt sền broă lơh sa suơn sre bơh ală kông ty, mpồl lơh sa kă bro nhơl chờ lơh broă tàm càr. Jat ồng Nguyễn Hùng Vỹ, ơm tàm ƀòn bơkàu Vạn Thành đơs, broă ai ală ƀòn bơkàu bơh yau, ală anih nhơl chờ lòt sền broă lơh sa suơn sre drơng nac nhơl chờ in neh lơh gơlik tàm bơta kơp kơnờm pa niam ngan ai làng bol tàm ƀòn lơgar in. Tài bơh ală phan lơh gơs niam ngan bơh să tờm làng bol lơh broă sa lơh gơlik den geh uă cau jòi git mờ lòt tus, bơh hơ̆ tơnguh mat kă bro, bơta kuơ lơh geh phan bơh suơn sre mờ cèng wơl priă jền lơh geh kơ̆ kơljap rlau. Bơdìh hơ̆ tai, uă nac nhơl chờ sĕ còp kung geh dong uă bơta broă drơng ala ndai bơtàu tơnguh. Ồng Nguyễn Hùng Vỹ đơs:  “Nhơl chờ lòt sền broă lơh sa suơn sre tàm ƀòn bơkàu Vạn Thành den gam bơtàu tơnguh niam ngan, cèng wơl cồng nha lơh sa dờng ngan. Ƀòn dờng kung gam pơn jờng, lơh gơlik bơta ƀuơn nàng làng bol ƀòn bơkàu kung bè ală mpồl lơh sa kă bro tàm ƀòn bơtàu tơnguh jat gùng dà nhơl chờ lòt sền broă lơh sa suơn sre. Ờ mìng pơgồp bal nhơl chờ mờ gam lơh gơlik phan kă bro, rơndap broă do añ gŏ geh cồng nha ngan”.

Jat ồng Tôn Thiện San, Củ tịc Ủy ƀan Ñân zân ƀòn dờng Dà Làc pà git, tàm Festival bơkàu Dà Làc dơ̆ 9 mờ sa tềp bơhiàn yau do, ƀòn dờng bơyai lơh broă lơh “Dà Làc – Nhờl chờ ală ƀòn bơkàu” nàng kờñ yal tơnggit kah yau mòn gơs, bơta niam ù tiah, kòn bơnus bơh ală ƀòn bơkàu bơh yau tus mờ nac nhơl chờ. Do kung là tŭ nàng pơn jờng, hòi jà ală mpồl lơh sa kă bro, làng bol tàm ală ƀòn bơkàu pơn jat tai chồl pràn tàm pơrlòng lơh sa, bơcri priă bơtàu tơnguh lơh sa suơn sre gơ jat bal mờ bơtàu tơnguh broă drơng ala, nhơl chờ. Ồng Tôn Thiện San pà git, bè jŏ jòng, ƀòn dờng geh rơndap ù tiah bơtàu tơnguh ring niam broă lơh nhơl chờ do nàng tơnguh cồng nha lơh sa mpồl bơtiàn: “Ală ƀòn bơkàu lơh broă mìng là bơta sơn đờm, bol hi gam lam lơh rơndap ù tiah wơl ală ƀòn bơkàu, tŭ rơndap ù tiah geh ring bal den geh lam lơh bơt bơtàu wơl ală ƀòn bơkàu gơ in niam rlau. Bol hi geh lơh ală broă lơh gơ wèt tàm tơl ƀòn bơkàu geh ală phan mùl màl nàng ngui niam bơta ƀuơn bơh ƀòn bơkàu hơ̆ dê. Tềng đap mat, ală ƀòn bơkàu kung gam geh phan, pơn yơu bè ƀòn bơkàu Vạn Thành tŭ do geh gal ngan nac mờ gơtùi mut sền tàm trồ mang. Bơdìh mờ ală mpồl lơh sa kă bro neh bơcri priă, den ƀòn dờng geh dong kờl mblàng yal jơnau, dong kờl tai priă jền nàng crap tai ssèng gơs ală gơl gùng bơkàu gơtùi mut sền tàm trồ mang”.

Mờ ală gùng dà ai tơlik lài tàm broă rơndap ù tiah, mờ kung chồl pràn ngui khoa họk kỹ thuật tàm broă lơh sa suơn sre, pin dờn là ală ƀòn bơkàu bơh yau bơh ƀòn dờng Dà Làc dê geh pơn jat tai bơtàu tơnguh pràn kơldang mờ kơ̆ kơljap, lơh niam rlau tai ai tiah rbô bơkàu in.