Nhơl chờ lơgar he mùl màl pờ mpồng wơl jơh bơh ngai 15 nhai 03 năm 2022 mờ brồ guh mhar tàm ală tiah geh bơta nhơl chờ tờm. Jăt jơnau yal bơh Ƀộ Văn hoá Thể thao mờ Zu lịc yal, tàm nam 2022 pa do neh geh rơlao 3 tơlăk 500 rơbô nă cau năc bơh dunia tus tàm lơgar Việt Nam; cau năc tàm lơgar kờp dŭ geh 101 tơlăk nă (sơrlèt mờr 2 dơ̆ pơn ndrờm mờ jơnau kờp dŭ bơh bồ nam). Nam 2023, gah Nhơl chờ Việt Nam ai geh jơnau kờñ lơh ngan geh wă 110 tơlăk nă cau năc nhơl chờ, tàm hơ̆ geh di pơgăp 8 tơlăk nă cau năc tus bơh dunia, cau năc nhơl chờ tàm lơgar geh di pơgăp 102 tơlăk nă, kờp priă geh bơh cau năc nhơl chờ di pơgăp 650 rơbô tơmàn đong. Gah nhơl chờ geh tơrgùm tàm ală kơnòl tờm bè lơh jăt jơnau yal “Ai broă rơndăp ù tiah nhơl chờ Việt Nam tơngai bơh nam 2021 tus 2030, wèt tus nam 2045”, Lơh jăt broă lơh marketing nhơl chờ Việt Nam tus nam 2030, Rơndăp broă “Ngui kông nghệ bơh broă lơh sa mờ măi mŏk 4.0 nàng tơnguh bơtàu nhơl chờ ngăc ngar, lơh pràn nhơl chờ gơs gah lơh sa tờm”, Rơndăp broă tơnguh bơtàu nhơl chờ mpồl bơtiàn Việt Nam...

Tơnơ̆ tơngai kòp Kovid-19, nam 2022 gah nhơl chờ càr Kon Tum bơtàu tơnguh wơl pràn kơl dang, jơh gùt càr neh wă 1 tơlak 100 rơbô nă cau lòt nhơl. Kờp jơh priă lơh geh bơh broă drơng broă ala nhơl chờ geh rlau 265 tơmàn đong, gơguh rlau 3 dơ̆ pơndrờm bal dùl tŭ mờ nam lài.

Nam pa 2023, càr Kon Tum pơnđơl pràn lơh ngan wă 1 tơlak 300 rơbô nă năc lòt nhơl tus mờ càr. Là cau sơnrờp ơm tàm ƀòn Kon Pring, thị trấn Măng Đen, kơnhoàl Kon Plông tus bal lơh nhơl chờ mpồl bơtiàn, bi Y Lim pà gĭt, ală broă lơh niam chài rơgơi bơh kơnhoàl dê bơyai lơh tàm nam 2022, bè Dơ̆ lơh chờ bơkào anh đào; Dơ̆ lơh chờ Sa tềp Dà lơgar; Broă lơh ràng tơlik phan soh kòn cau Tây Nguyên... neh gơ hòi gơ jà gĭt nđờ jơ̆t rbô năc lòt nhơl tus mờ kơnhoàl. Bi Y Lim chờ hờp tềng đap cồng nha lơh broă kă bro nhơl chờ mpồl bơtiàn tàm nam bơh hìu bơnhă dê mờ geh uă bơta kơ̆p gơn tàm nam pa 2023. Bi Y Lim đơs: “Añ sùm sền gròi broă prap gàr mờ ngui niam bơhiàn niam bơnĕ niam chài bơh yau bơh jơi bơtiàn kòn cau he dê pơgồp bal mờ nhơl chờ mpồl bơtiàn, ƀañ lời bơhiàn niam bơnĕ niam chài gơtìp roh tĕ. Añ mblàng loh ai làng bol in wă tàm bơta là broă lơh nhơl chờ lơh geh priă jền mbè lơi, lơh sre, lơh mìr lơh geh priă jền bè lơi. Bơh hơ̆, gơtùi tàm pơndrờm bè broă priă lơh geh kờp bal tàm nam, lơh sa suơn sre kờp ngan là kal ke mờ kờp jơh priă lơh geh ờ uă ngan, lơh nhơl chờ den tàm 1 nhai gơtùi jòi geh bơh 10 tus 20 tơlak đong. Làng bol he pal pơn jat tai lùp bơsram broă lơh nhơl chờ, gĭt kờp kơlôi rcang,  lơh ală broă lơh geh kwơ bè lơh ai să tờm mờ hìu bơnhă in. Den tàng, làng bol he pal pơnđơl pràn lơh ngan nhơl chờ nàng bơtàu tơnguh lơh sa hìu bơnhă dong lơh muh mat thôn, ƀòn ngai sơlơ bơtàu tơnguh.

Tơnao dà Ayun Hạ tàm xã Chư A Thai, kơnhoàl Ayun Pa ờ mìng là broă lơh bơtơ̆t rơbòng dà dờng drơng tàm broă lơh sa suơn sre, ròng phan tàm dà, mờ do gam là tiah nhơl chờ niam bơnĕ ngan gơwèt mờ cau năc dê. Mờ măt dà ơnàng rơlao 37 kơi sồ vuông, tơnao dà A Yun Hạ niam bơnĕ ngan tàm tŭ bồ kàl prang, kung là dơ̆ satềp. tơnao dà A Yun Hạ geh bơta bơnĕ mờ lơngăp lơngai ngan bơh bàr gah ù gờl geh càl khồm mrềt niam bơh ală dòr tờm chi brê tơlir crư. Lŏ Villa, kòn cau Jarai, kis tàm xã Ia Sol, kơnhoàl Phú Thiện, càr Gia Lai pơnyờ să ngan bè ù tiah niam bơnĕ do bơh ƀòn lơgar dê. Lŏ pà git, tŭ tus tơnao dà A Yun Hạ, cau năc gơtùi sền ù tiah niam bơnĕ mờ lơh ală broă chờ hờp ngan. “Tŭ was plung tàm tơnao dà, sền ù tiah niam, tờm chi dờng gùt dar tơnao dà niam bơnĕ ngan, bơta tơlir bơh nha chi, dà sàng bè măt mèo. Cau năc tus nhơl sền gơtùi jòi blơi ka tàm tơnao, tàm hơ̆ geh uă ngan bơta ka bơkah. Was plung tàm tơnao dà sền gròi ù tiah mờ dà sàng, trồ tiah mrềt niam gơboh ngan. Dà bơh tơnao dà Ayun Hạ lam tus ală rơbòng dà, lam dà tus làng bol in lơh sre kòi 2 kàl. Dà bơh tơnao dà Ayun Hạ dong kờl làng bol lơh broă sa ală kơnhoàl Phú Thiện, thị xã Ayun Pa, geh tŭ tus tàm ờ uă xã tàm kơnhoàl Krông Pa kung gam geh bơta kwơ bơh dà do sơl. Càr Gia Lai kung gam jòi priă nàng bơcri tai, lơh niam, kơl jăp bơtơ̆t dơng dà Ayun Hạ nàng pờ ơnàng ală broă nhơl chờ brê bơnơm nàng ai geh bơta niam làng bol in geh bơta pràn tơnguh bơtàu lơh sa”.