Dùl ngai lồi nhai 9, rơndeh ôtô pơndiang bol añ lòt jat gùng lòt sền tiah nhàr lơgar tus tiah ơm gak, atbồ, sền gàr sồ 1 bơh Pôs đồng ling sền gàr tiah nhàr lơgar Ia Mơ dê. Lòt tàm gùl bơnơm jơnhoa tàm rơndăp rơndồl bơh brê bơnơm dê, sền sùm bơta tơlir niam ngan tềng đăp mat dê, añ gơ lơh bè huĭ jơh jơnau yal bơh Cíñ  trị viên ồng Nguyễn Đức Hùng dê bè tiah ơm gak geh sơnđan là 3 ờ: ờ geh gùng pờ điện thoại, ờ geh dà ngui sa, ờ geh ồs đèng. Wă bol añ là ală kwang bàng, cau ling neh geh ơm gak mờr 1 poh do. Muh mat cau lơi kung jù ràm, să jan pràn bè dùl gơl dơm chi tàm gùl brê Tây Nguyên dê. Trung tá ồng Rơ Lan Khúi, Kwang atbồ Mpồl Gròi sền sră nggal Pôs đồng ling sền gàr tiah nhàr lơgar Ia Mơ đơs là, tiah nhàr lơgar tàm kàl do, oh mi mpồl ling sền gàr tiah nhàr lơgar gam geh dà nàng ngui, tus kàl prang, bơta duh bè ồs gơ sòl tàm sàl lơh tơl nă cau tŭ lơi kung gơlik dà kơl hề gơ hòr sù jơh să jan. Trung tá ồng Rơ Lan Khúi đơs: “Tàm do anih ơm gak geh uă ngan kal ke, ồs đèng ờ geh, kàl mìu um dà dờng, dà croh. Kàl prang den sền gơlơh bè ờ geh dà ngui lơm. Kờñ hòi điện thoại pơ ùr, oh kòn in, lơh broă mờ pôs đồng ntoat tus sơnĕ 3 tiah kơi sồ 0 (ze rô) nàng hòi. Mờ oh mi kung  pơnđơl pràn lơh ngan lơm, kơnòl broă Đảng mờ Dà lơgar jàu den oh mi kung gam gĭt nền bồ tơngoh iang nùs nàng lơh broă”.

Gơwèt mờ kwang bàng, cau ling tàm anih ơm gak, dà kwơ rlau mờ biàng. Khi đơ tơl ntờc dà mìu gơ hòr tềng hơđang sơlo nàng ngui tàm broă trŭ gơm phan sa pah ngai in. Dà ờ hoan geh ngan, ồs đèng gam ờ tơl uă rlau tai. Jơh gùt tiah do mìng kơnờm tàm măi pờ ồs đèng mìng tơl ngui tàm broă pơrjum trồ mang lơm, geh tŭ pal ngui đèng pil tai. Ngài pơgap mờ do dùl ết, anih lơh broă geh rcang ală gùng che ồs đèng ngui năng lượng mat tơngai mơya gam tàm tơngai lơh niam wơl pơgap 2 nhai do.

"Sào sa tàm sàl, bĭc tàm brê” bòl glar kal ke ngan, mơya ală kwang bàng, cau ling Pôs đồng ling sền gàr tiah nhàr lơgar Ia Mơ sùm pơndờm pơnđiang bal mờ gơ̆p là: “Tàm phan bơna bơh cau ling dê ờ geh kal ke lơi mờ mìng geh nùs nhơm sơr lèt gan jơh ală bơta lơm”. Pah ngai, tơnơ̆ tŭ lơh jơh kơnòl broă lòt sền tiah nhàr lơgar; cau ling geh grăt tơlir den rê tus wơl tàm anih ơm nàng bơtàu tơnguh lơh sa, sơng ka sền gàr suơn tam biăp bơh he dê. Thiếu tá ồng Trần Văn Hạnh, lơh broă tàm Pôs đồng ling sền gàr tiah nhàr lơgar Ia Mơ đơs: “Lơh broă sa tàm do là tam biăp tàm kàl mìu. Kàl prang ờ gơtùi tam ờ. Ròng iar, ka, ròng be bơh Pôs đồng dê, añ sơng ka sền gàr lơm. Bè sào sa jat ală bơta kung lơh geh sơl”.

Tàm nggùl brê bơnơm nhòt ngan cau ờ mìng geh jơnau ntas bơh sềm hoăc, srah nting nrau lơm mờ gam geh tai jơnau ntas bơh mpồl iar dê nrau, là dà tơlir bơh suơn tam biăp lơpoan (geh tiah hòi là biăp nha lo brong), bơl hong. Mpồl gam ròng 1 mpồl be rlau 20 nơm nàng lơh geh tơl phan sa pah ngai ai mpồl ling in. Thượng tá ồng Nguyễn Đức Hùng, Cíñ trị viên Pôs đồng ling sền gàr tiah nhàr lơgar Ia Mơ, pà gĭt, Pôs đồng ling sền gàr tiah nhàr lơgar Ia Mơ atbồ, sền gàr 12,6 kơi sồ gùng tiah nhàr lơgar rềp nhàr bal mờ lơgar Campuchia. Gơl tiah nhàr lơgar bơh Pôs đồng dê drơng broă ờ hềt geh rwah nhàr ù tiah sơntơ̆p jrong nhàr lơgar den tàng kơnòl broă sền gàr gơnoar tờm ù tiah Dà lơgar dê kal ke uă ngan. Mơya mờ nùs nhơm sền gàr gơnoar tờm dà lơgar dờng màng, ờ gơtùi mut sơgràm, kwang bàng, cau ling Pôs đồng ling sền gàr tiah nhàr lơgar Ia Mơ sùm sền gĭt nùs nhơm, bồ tơngoh, kơ̆ dơn, sơr lèt gan kal ke nàng lơh sir jak ngan kơnòl broă geh jàu. Thượng tá ồng Nguyễn Đức Hùng đơs sùm:“Ală bơta ơm kis tàm anih ơm gak gam uă ngan kal ke, mơya 100% ờ geh dùl nă cau lơi ờ lơh jăt kơnòl broă geh jàu tàm ală anih ơm gak tiah nhàr lơgar dê. Đảng ủy, Mpồl đơng lam Pôs đồng sùm pơndờm pơnđiang, mờ  ala tàm pơdar kwang bàng tàm ală tiah kal ke, ờ lời oh mi lơi ơm jŏ ir”.

Bơh gĭt nđờ kàl prang kung bè kàl mìu, tiah nhàr lơgar Ia Mơ sùm geh ală cau ling sền gàr tiah lơgar ơm gak, sền gàr- khi bè dùl nơm khèl sền gàr bơta ring lơngai tiah mpồng mut nhàr lơgar bơh Dà lơgar dê.