Geh mat tàm Anih tờm lơh sră nggal dà lơgar càr Dăk Lăk tàm ngai lơh broă sơn rờp tơnơ̆ ală ngai ơm rlô sa tềp bơhiàn yau Quý Mão, bi Trần Tuấn Song, ơm tàm xã Cư Êbur, ƀòn dờng Buôn Ma Thuột chờ hờp ngan tài ală sră nggal geh lơh sơrbac mhar tŭ bi lơh wơl sră pơ àr să tờm dê nàng rê wơl ƀòn dờng Hồ Chí Minh lơh broă: “Do là ngai lơh broă sơn rờp tơnơ̆ ală ngai ơm rlô sa tềp, añ lòt lơh sră pơ àr să tờm dê. Añ gŏ kwang bàng, viên chức sơrmah sơrmài, lơh broă niam ngan mờ làng bol, lơh gơs sră nggal sơrbac mhar ngan”.

Tàm ngai lơh broă sơn rờp tơnơ̆ ală ngai ơm rlô sa tềp bơhiàn yau, khà cau tus bơsong broă tàm Anih tờm lơh sră nggal dà lơgar càr Dăk Lăk ờ hềt uă. Bulah bè hơ̆, jơh ală kwang bàng, công chức, viên chức neh rê wơl lơh broă mờ nùs nhơm chờ hờp, rơcang drơng niam ngan rlau jơh jơnau kờñ bơh làng bol dê. Mò Đinh Thị Hương, cau lơh broă ờs mờng gah Ƀảo hiểm xã hội càr yal: “Jơh ală oh mi lơh broă bơh Anih tờm lơh sră nggal dà lơgar càr Dăk Lăk lòt lơh broă wil tơl mờ di tŭ jơ, nùs nhơm chờ hờp ngan. Jơh ală anih lơh broă tàm anih tờm do mờ anih lơh broă ƀảo hiểm xã hội mờ nùs nhơm drơng broă li ngan là nàng tơl nă cau in ndrờm chờ hờp, tŭ rê den khi kung niam nùs mờ anih tờm”.

Tàm Kụm lơh sa mờ măi mok Tân An, ƀòn dờng Buôn Ma Thuột, Kông ty Kổ phần Ban Mê Green Farm ai cau lik lơh broă nàng lơh sầu riêng, mrĕ nàng tac hờ lơgar ndai dơ̆ phan sơn rờp bơh nam pa dê tus drà kă bro lơgar Lo, lơgar Nhờk. Mò Nguyễn Thị Thái Thanh, Kwang atbồ Kông ty Kổ phần Ban Mê Green Farm pà git, tàm jơh gùt tơngai ơm rlô sa tềp pa do, ală broă lơh tac bro, tàm tơrbŏ mờ cau blơi phan dunia kung gam geh gàr bè ờs. Kơnờm bơh hơ̆, Kông ty sùm geh ală sră pơrgon blơi phan pa mờ ai cau lơh broă bồ nam mờ nùs nhơm duh hồl ngan: “Tŭ do, khà sră pơrgon blơi phan neh geh ai jơh gùt nam 2023 in, gơguh uă rlau 3 dơ pơndrờm mờ nam 2022, mờ ală phan bè sầu riêng, ƀơ, mrĕ mờ plai màk. Nàng geh tơl phan tac jat sră pơrgon tac phan hờ lơgar ndai bol hi sơn đờm ai cau lik lơh broă bơh ngai 6 sa tềp mờ sră pơrgon tac phan sơn rờp là sầu riêng mờ mrĕ”.

Tàm lŏ sre, suơn chi, tàm ală ngai do, làng bol lơh broă sa càr Dăk Lăk kung neh rê wơl mờ broă lơh sơngka sền gàr chi tam, phan ròng tơnơ̆ ală ngai ơm rlô sa tềp bơhiàn yau. Cau lơi kung kơp gơn lơh geh uă cồng nha tàm nam pa, kàl lơh sa tơnhàu geh uă, giă tac yòm đau mờ gơguh jơnhua. Bi Phan Quốc Thế ơm tàm xã Ea Kpam, kơnhoàl Cư Mgar, càr Dăk Lăk đơs: “Jat bè làng bol lơh kơphe den bồ nam pa kung là bồ kàl prang bè hơ̆ den tàng pal sền bơkàu kơphe neh gơtùi nàng ƀồm dà halà ờ hềt, klah ntê tơnơ̆ tŭ pik, ƀồm dà rơcang bồ kàl pa in. Bơta mờ làng bol lơh broă sa kơp kờñ ngan rlau jơh là mìu niam càl niam, giă priă tac yòm, ală nam rềp ndo giă lơyah den tàng làng bol kung kal ke”.

Ndrờm bè hơ̆ sơl, ală càr tàm tiah đah tô mat tơngai mut dà lơgar neh bơyai lơh uă broă lơh sơn đờm lik lơh broă bồ nam pa tàm nùs nhơm chờ hờp, duh hồl, lơh ngan dùl nam lơh geh uă cồng nha rlau. Bi Cà Thị Lê ơm tàm ƀòn Giảng Lắc, sơnah ƀòn Quyết Thắng, ƀòn dờng Sơn La pà git: Ngai bồ nam pa nam do, ală cau tàm hìu bơnhă bal mờ gơp bơyai lơh dus tờm tỏi mờ bơta kơp kờñ geh dùl nam mìu niam càol niam, tơl broă ring niam, ngan là gơtùi tac phan uă rlau nàng tơnguh priă jền lơh geh hìu bơnhă in: “Lik lơh broă bồ nam pa den nam do añ kơp kờñ kàl lơh sa tơnhàu geh uă, trồ tiah mìu nhàc niam, geh priă jền nàng hìu bơnhă in geh rài kis hờm ram”.

Tàm tŭ hơ̆, tàm Kông ty Kổ phần tàu sơdàng Sơn La, ngai lik lơh broă bồ nam pa bơh nam dê, nùs nhơm lơh broă neh duh hồl ngan tàm làm gùt ală tiah tam tàu bơh hìu măi mờ ală anih lơh sa dê. Jat broă rơndap lơh, kàl lơh sa 2022- 2023, Kông ty lơh ngan rề ơnàng bă ù tam tàu gơguh tus 9 rbô 500 lồ, khà tàu lơh geh rlau 600 rbô tấn, lơh gơlik geh 70 rbô tấn sơdàng. Ồng Bùi Minh Tuấn, kwang bàng Kông ty Kổ phần tàu sơdàng Sơn La pà git: Bơh àng drim ngai 3 sa tềp, bi bal mờ ală kwang bàng drơng broă tiah tam tàu bơh kông ty dê neh tus tơn tàm tiah lơh broă mblàng yal, hòi jà ală hìu bơnhă ai cau tơnhàu tàu jat broă rơndap lơh nàng geh 5 rbô tấn tàu lơh sơdàng ai hìu măi in lơh gơlik phan tàm 1 ngai, drơng ală broă lơh sa bơh ngai 4 sa tềp: “Nàng gàr niam ai broă rơndap lơh lơh sa bơh hìu măi dê in, bol hi mut mblàng yal, hòi jà làng bol koh ală tờm tàu neh di tơngai, tơl bơta niam mờ mblàng yal oh mi măi rơndeh pơndiang di khà kơn jơ̆, di jơnau cih bơh adat boh lam dê”.

Ai tàm ală càr Lào Cai, Yên Bái neh bơyai lơh dơ̆ lam lơh “Sa tềp tam chi sùm sùm kah ưn ngài Bác Hồ” mờ ală broă lơh tam chi pơn jat tai lơh jat rơndap broă lơh “Tam 1 tơmàn tờm chi tơngai bơh nam 2021 tus nam 2025” bơh Thủ tướng Cíñ phủ lam lơh kung neh geh lam lơh dùt ròt tàm jơh ală tiah bơh 2 càr dê.