VOV4.K’ho- Bal mờ kơnòl broă sền gàr gùng tiah nhàr lơgar jòng rlau 141 kơi sồ rềp nhàr mờ càr Mondulkiri, lơgar Campuchia, mpồl ling sền gàr tiah nhàr lơgar càr Dăk Nông neh geh uă broă lơh mpồl bơtiàn geh kwơ ngan. Ờ mìng tus bal bơt bơtàu anih lơh broă cíñ trị tàm 7 xã tiah nhàr lơgar, dong làng bol bơtàu tơnguh lơh sa- mpồl bơtiàn, mpồl ling sền gàr tiah nhàr lơgar Dăk Nông gam lơh broă lơh lơh broă mờ lơgar ndai, pơgồp bơnah bơt bơtàu bơta gĭt gơ̆p lơh bơyô bal, lơh broă bal đah 2 lơgar dê.

Mho jơla, mat tơngai neh ñơ̆p ngkời bơnơm đah tiah nhàr lơgar Campuchia, Đại úy Tôn Đức Thái- Cíñ trị viên phó Kwang atbồ Pôs đồng ling sền gàr tiah nhàr lơgar Mpồng tiah nhàr lơgar Thuận An (Mpồl ling sền gàr tiah nhàr lơgar càr Dăk Nông) bal mờ bàr pe nă cau ling lòt sền wơl dŭt ndơ̆l 2 broă lơh Hìu ơm “Tam klăc dờng” nàng di tŭ jàu pà tàm nhai 6 nam 2022 do in. Hơ̆ là phan pà bơh Mpồl ling Sền gàr tiah nhàr lơgar càr Dăk Nông mờ Ủy ƀan Mặt trận dà lơgar càr dê lời ai mờ pà hìu bơnhă ồng Y Sa Ly Môn mờ hìu bơnhă mò H’Piơk- 2 hìu bơnhă rƀah, kòn cau M’nông dê ơm tàm ƀòn Sar Pa, xã Thuận An, kơnhoàl Dăk Mil. Bal mờ priă tă 100 tơlak đong bơh 2 mpồl dong kờl, kwang bàng, cau ling Pôs đồng ling sền gàr tiah nhàr lơgar Mpồng tiah nhàr lơgar Thuận An, Kes priă cau rƀah xã Thuận An gam dong kờl 15 tơlak đong mờ tus bal ngai lơh broă nàng dong 2 hìu bơnhă lơh hìu ơm. Đại úy Tôn Đức Thái pà gĭt, bơdìh mờ broă bơ̆t hìu, mpồl ling gam geh uă broă lơh ndai geh kwơ ngan.

Đại úy Tôn Đức Thái đơs: Kwơ màng, tàm ală nam pa do, lơh jat gùng dà broă lơh bơh Mpồl ling sền gàr tiah nhàr lơgar, mpồl ling neh dờp dong kờl uă kơnòm bơsram tàm ù tiah do dê. Mờ bơta tă pơgồp mờ priă nhai bơh kwang bàng, cau ling dê nàng dong kờl ală kơnòm bơsram, tàm hơ̆ dờp ròng siam 1 nă kơnòm dềt mờ dong kờl 6 nă oh. Mpồl ling kung pơgồp bal mờ ală ƀan, ngàñ, mpồl cau lam lơh jat ală broă lơh dong làng bol tơn jơh jơgloh tơrmù rƀah, pơn yơu bè broă lơh “sơntìl kơn rồ me ai cau rƀah in”, “ròng be tàm pơdar”, lơh geh ală bơta ai làng bol in bơtàu tơnguh lơh sa, kơ̆ kơljap rài kis, brồ guh lik klàs rƀah.

Mpồl ling sền gàr tiah nhàr lơgar pơgồp bal mờ gơnoar atbồ tiah do dê jàu hìu ơm nùs nhơm ai hìu bơnhă mò H' Piơk (rùp Phan Tân - băo Dăk Nông)

Lơh jat kơnòl broă lơh broă tàm tiah do dê, tàm ală nam do, Pôs đồng ling sền gàr tiah nhàr lơgar Mpồng nhàr lơgar Thuận An neh lam lơh broă lơh bơt bơtàu ală anih lơh broă cíñ trị tàm ală tiah, pơgồp bơnah bơt bơtàu ală ci ƀộ, mpồl atbồ is ală thôn, ƀòn kơ̆ kơljap, pràn kơl dang, sơlơ bơtàu tơnguh lơh sa- mpồl bơtiàn. Ngan là, Pôs đồng neh ai dùl nă kwang bàng tus bal tàm kấp ủy, tŭ do là Kwang atbồ Mpồl lơh broă kơrnoat boh lam Hội đồng Ñân zân xã Thuận An; 10 nă đảng viên tus bal pơrjum tàm ală ci ƀộ thôn, ƀòn, 37 nă kwang bàng drơng broă ală hìu bơnhă làng bol.

Thượng tá Phan Quốc Tuấn– Kwang atbồ Pôs đồng ling sền gàr tiah nhàr lơgar Mpồng nhàr lơgar Thuận An pà gĭt, tàm ală nam do, mpồl ling sùm sền gròi tus broă cribơyai mờ làng bol. Rcang tă pơgồp jơnau đơs ai kấp ủy, gơnoar atbồ ală tiah, lam  ală mpồl lơh broă bơh Huyện Ủy, Ủy ƀan Ñân zân kơnhoàl Dăk Mil, bal mờ ală mpồl kwang àng, ling klàng, ling sền gàr tiah nhàr lơgar... còp mờ pà phan ai làng bol mờ mpồl ling sền gàr tiah nhàr lơgar càr Mondulkiri, lơgar Campuchia in. Pa do, mpồl kwang bàng kơnhoàl Dăk Mil bal mờ mpồl ling sền gàr tiah nhàr lơgar neh tus còp mờ gờm chờ bơhiàn yau Chol Chham Thmay tàm kơnhoàl Pechr Chenda, càr Mondulkiri. Pôs đồng sùm lơh geh ală bơta ai làng bol tàm tiah nhàr lơgar in, uă ngan là tàm 2 ƀòn Sar pa mờ Bu Dăk, xã Thuận An lòt rê còp cau pròc mhàm bal tàm xã Bu Sa Ra, kơnhoàl Pechr Chenda, càr Mondulkiri, lơgar Campuchia dê.

Thượng ta Phan Quốc Tuấn đơs: Mìng is tàm ù tiah xã Thuận An geh rlau 150 hìu bơnhă geh bơta gĭt gơ̆p pròc mhàm bal, jơi bơtiàn mờ đah ne. Làng bol sùm lòt rê bal, he lòt tàm lơgar gơ̆p bơyô mờ kung bè gơ̆p bơyô đah ne tus lơgar he tàm ală dơ̆ lơh chờ, sa tềp ală hìu bơnhă dê. Mpồl ling kung ai tơl ală bơta ƀuơn, bơto pơlam, mblàng yal nàng làng bol in lòt rê jat di mờ jơnau sồr bơh adat boh lam dê; lơh geh bơta gĭt gơ̆p niam đah làng bol 2 tiah nhàr lơgar dê. Bơh hơ̆ kung lơh niam broă lơh atbồ sền gàr tiah nhàr lơgar. Bơh làng bol, bol añ kung gĭt uă jơnau yal drơng tàm broă atbồ sền gàr tiah nhàr lơgar bơh mpồl ling dê.

Càr Dăk Nông geh gùng nhàr lơgar jòng rlau 141 kơi sồ rềp nhàr bal mờ càr Mondulkiri, lơgar Campuchia. Ù tiah lơh pôs đồng bơh Mpồl ling sền gàr tiah nhàr lơgar dê jòng rlau 7 xã tiah nhàr lơgar, mờ 31 jơi bơtiàn làng bol kòn cau oh mi ơm kis bal gơwèt 4 kơnhoàl rềp nhàr mờ ù tiah 4 xã bơh 2 kơnhoàl Pechr Chenda mờ Ô Răng gơwèt càr Mondulkiri, lơgar Campuchia dê.

Gah đơng lam Mpồl ling sền gàr tiah nhàr lơgar càr Dăk Nông sùm rcang cribơyai mờ Tỉñ ủy, Ủy ƀan Ñân zân lơh jat niam broă lơh lơh broă mờ lơgar ndai làng bol, lơh broă mờ lơgar ndai sền gàr dà lơgar. Tơngai kòp Kovid-19 gơlik geh kal ke, càr Dăk Nông neh lam uă mpồl tus còp, pà phan, tàm hơ̆ geh phan ngui sa, sơnơm tơmba rcang sơndră kòp Kovid-19. Pa do ngan, tơnơ̆ tŭ bơta kòp neh geh gròi sền, uă mpồl lơh broă càr Dăk Nông neh tus còp càr Mondulkiri mờ gờm chờ sa tềp bơhiàn yau Chol Chham Thmay. Jat Đại tá Phan Qúy Vỹ- Phó Cíñ ủy Gah đơng lam mpồl ling sền gàr tiah nhàr lơgar càr Dăk Nông yal, broă lơh lơh broă mờ lơgar ndai neh pơgồp bơnah kwơ màng tàm broă bơt bơtàu bơta gĭt gơ̆p lơh bơyô bal, lơh broă bal đah 2 lơgar dê đơs bal mờ 2 càr Dăk Nông mờ Mondulkiri đơs is; ngan là lơh niam ngan nùs nhơm tam klăc bal làng bol 2 lơgar dê tàm gơl gùng tiah nhàr lơgar. 

Đại tá Phan Qúy Vỹ đơs: Tŭ do gam lam lơh jat broă lơh lơh oh mi bal đah ală Pôs đồng ling sền gàr tiah nhàr lơgar mờ ală mpồl ling phàu crong lơgar Campuchia dê, mờ gam hòi jà lơh oh mi đah ală ƀòn 2 gah tiah nhàr lơgar dê. Tỉñ ủy neh sồr mờ Ủy ƀan Ñân zân càr kung neh geh broă rơndap lơh, ală kơnhoàl tiah nhàr lơgar mờ ală pôs đồng ling sền gàr tiah nhàr lơgar gam lam lơh jat. Bơh hơ̆, sơlơ tơnguh tai bơta tam klăc lơh bơyô bal lơgar rềp bal bơh làng bol 2 gah tiah nhàr lơgar dê. Mờ bơh hơ̆ kung kĭ hơ broă lơh dong kờl đah lơgar bơyô dê bè bơtàu tơnguh lơh sa, niam chài, bơto bơtê. Pơn yơu bè “Dong kờl mờ oh tus hìu bơsram”, Mpồl ling sền gàr tiah nhàr lơgar càr Dăk Nông dong kờl 12 kơnòm dềt tàm lơgar Campuchia, pah nhai tơl nă kơnòm geh dong kờl 500 rơbô đong, mờ ròng ală kơnòm bơsram tus jơh kấp pe. Bơh dơ̆  lơh oh mi bal geh bơto bơtê bơhiàn bơh yau, tơrgùm bal pràn, dùl nùs bal 2 gah  sền gàr gơnoar tờm sền gàr bơta lơngap lơngai tiah nhàr lơgar bơh dà lơgar dê ring lơngai, gĭt gơ̆p lơh bơyô, lơh broă bal bơtàu tơnguh.

Cau cih Quốc Học – Y Sưng- Cau mblàng K’Hạnh