Ală ngai do, tàm tiah lơh gùng rơndeh ntoăt jờl Khánh Hoà – Buôn Ma Thuột gơl lòt gan xã Ea Knuếc, kơnhoàl Krông Păc, càr Dăk Lăk, geh git nđờ jơ̆t nơm măi mok mờ uă cau lơh broă geh tam pà lơh uă mpồl dềt nàng lơh gùng lòt. Ồng Hồ Văn Anh, cau neh rơlao 20 nam kis mờ broă măi rơndeh chŏ ù pơn ring lơh gùng gơwèt Kông ty TNHH An Nguyên Dăk Lăk, do là kông ty gam lơh gơl gùng rơndeh ntoăt jờl yal, să tờm ờ kah loh do là satềp dơ̆ lơi pal wă rò satềp ngài hìu mờ cau pròc mhàm. Satềp do, ồng mờ ală cau lơh broă bal kung geh kông ty bơyai lơh satềp tơn tàm tiah lơh broă. Tàm tiah hìu ơm bal, kwang đơng lam kông ty neh pơdơng plai chi, geh bơkào mai, đào mờ geh tơl mbar, ƀañ kèo mờ phan sa kung ndrờm bè tàm hìu nàng ală cau in wă rò nam pa… Ồng Hồ Văn Anh đơs: “Kông ty hơ mờ mpồl cau tờm bơcri priă pal gàr di tơngai lơh gơs rơndăp broă, den tàng lài mờ Satềp neh pơrjum ală oh mi tàm tiah lơh broă gùng rơndeh ntoăt jờl. Kwang đơng lam kông ty ai tơngai lơh Satềp tàm nùs nhơm oh mi dan ơm wơl nàng lơh broă. Bol añ pơrjum ală cau bal mờ ring bal mờ cau tàm hìu nhă geh dan ơm wơl lơh broă tàm ală ngai satềp, hơ̆ là bơh ngai do 26 nhai 12 jăt tơngai he tus ngai 6 Satềp, mìng ơm tàm ngai 01 Satềp mơ”.

Kông ty TNHH An Nguyên Dăk Lăk gam lơh gơl broă lơh sồ 03 bơh Kơi sồ 101+ 500 tus Kơi sồ 108+00. Ồng Lê Quốc Thắng, Phó kwang atbồ drơng broă lơh Kông ty TNHH An Nguyên pà git, tŭ dờp ù tiah bơh UɃÑZ kơnhoàl Krông Păc tàm quý IV nam 2023, mpồl lơh sa kă bro neh tơrgùm uă rơndeh lơh broă, măi mok, phan lơh broă bal mờ cau lơh broă nàng lơh rơndăp broă. Tŭ do geh di pơgăp 30 nơm rơndeh ală bơta, tàm hơ̆ geh măi chŏ ù, măi cò ù, rơndeh pơn diang, măi jă ù mờ di pơgăp geh bơh 40 tus 45 nă cau lơh broă geh tam pà lơh 2 dơ̆ tàm 1 ngai mang, bơyai lơh cò pơn ring ù mờ lơh ală ñjrong bơnàng broă lơh. Tàm Satềp nam pa Giáp Thìn 2024 pa do, nàng gàr di mờ tơngai geh ai den tàng mpồl lơh sa kă bro kung gam bơyai lơh bè ờs tàm ală ngai satềp, ală broă dong kờl, drơng gàr cau lơh broă in neh geh kông ty lơh tơl. Ồng Lê Quốc Thắng đơs: “Bơh ngai 26 nhai 12 jăt tơngai he tus ngai 6 Satềp, bơdìh mờ broă dong kờl geh kờp jăt dà lơgar tàm tŭ lơh broă ngai ơm rơlô Satềp, kông ty bơtơl tơl nă cau lơh broă 1 tơlăk đong tàm 1 ngai 1 nă cau. Do là priă tă nàng lam sồr cau lơh broă, ală cau tài kông ty den kông ty kung tài ală cau in sơl”.

Rơndăp broă lơh gùng rơndeh ntoăt jờl Khánh Hoà – Buôn Ma Thuột jòng di pơgăp 117,5 kơ sồ tơrbŏ càr Khánh Hoà mờ càr Dăk Lăk. Kờp jơh khà priă bơcri lơh rơndăp broă là 21 rơbô 935 tơmàn đong bơh kes priă. Rơndăp broă lơh geh tam pà 3 bơnah broă, tàm hơ̆ geh, bơnah broă sồ 01 geh càr Khánh Hoà lơh tờm bơcri priă; bơnah broă sồ 02 geh Ƀộ Giao thông Vận tải lơh; gam wơl bơnah broă sồ 03 geh càr Dăk Lăk lơh. Khà broă do geh càr Dăk Lăk jào Mpồl atbồ Rơndăp broă bơcri priă lơh gùng mờ lơh sa suơn sre bơtàu tơnguh ƀòn lơgar càr lơh tờm bơcri priă lơh.

Ồng Đặng Thọ Dần, Phó Kwang atbồ Cơl dŭ lơh broă Gùng lòt gơwèt Mpồl Atbồ rơndăp broă lơh gùng, do là cau tus bal jăt sền lơh khà broă sồ 03 pà git, tŭ do ală mpồl lơh broă gam mhar lơh ală bơnah broă bè cò, chŏ pơn ring ù, jă ù lơh bơnàng gùng lòt, lơh ală ñjong bơnàng rơbàng tàm ù gờl tiă gan croh dà… Tàm Satềp nam pa Giáp Thìn 2024 pa do, ală mpồl lơh broă ndrờm dan lơh broă tàm ală ngai satềp, Mpồl atbồ neh sồr cau tờm mpồl lơh sa kă bro bơdìh mờ broă gàr di jăt mờ tơngai geh ai, bơta kơl jăp lơh broă, den pal sền gròi nền nòn tus mờ broă dong kờl ai cau lơh broă tus bal lơh rơndăp broă di jăt mờ kơrnoăt geh ai. Ồng Đặng Thọ Dần đơs: “Tŭ do, tơnơ̆ mờ tŭ neh geh ù lơh den ală cau tờm bơcri priă neh tơrgùm mhar nàng cò, pơn ring ù lơh gùng tàm dơlam is tàm gơl gùng drơng lơh rơndăp broă lơh gùng. Bè khà broă sồ 01 den neh geh 100% neh geh gùng drơng tàm broă lơh. Gam khà broă sồ 02 den kung neh lơh gơs rơlao 70%. Khà broă sồ 03 neh lơh gơs gùng mờ gam geh cau tờm bơcri priă ai lơh broă uă”.

Jăt rơndăp ù tiah tus nam 2030, wèt tus nam 2050, gùng rơndeh ntoăt jờl do geh là gùng tờm nàng lơh gơs dùl tàm 5 tiah lơh sa Tây Nguyên dê, mờ gơnoar broă geh ai lài là broă lơh drơng ala, lòt nhơl mờ pơn diang phan kă bro. Geh lơh bơh nhai 6 nam 2023, tŭ do gùng rơndeh ntoăt jờl Buôn Ma Thuột – Khánh Hoà neh gŏ rùp rài. Ală rơndăp broă lơh gùng lòt tàm dơlam is tiah Tây Nguyên, ală rơndăp broă lơh gùng geh nùs nhơm tơrbŏ bal tiah geh lơh pràn kơl dang, gam rơhời geh tơrbŏ bal mờ ală tiah lơh sa bơh tơl càr, bơh tơl tiah mờ geh bal bơh tiah tàm gùl lơgar mờ Tây Nguyên dê, ai geh tai bơta pràn nàng bơtàu tơnguh lơh sa mpồl bơtiàn.