Nàng sa tềp bơhiàn yau dà lơgar dê nam pa Giáp Thìn 2024 “Jơh ală hìu ndrờm geh sa tềp, jơh ală cau ndrờm geh sa tềp”, càr Kon Tum lời uă bơta sền gròi dong kờl sa tềp ai ală hìu bơnhă cíñ săc, cau geh màng mờ kăc màng, cau dờng sơnam, hìu rƀah, hìu mờr ndrờm bè hìu rƀah, cau lơh broă geh rài kis kal ke ir, cau lơbơn ñâm ño, ƀươn gơtìp aniai tàm mpồl bơtiàn...Tàm hơ̆, càr lơh nền tă kes priă rlau 8 tơmàn đong dong kờl ai rlau 16 rbô 780 hìu bơnhă rƀah, hìu mờr ndrờm bè hìu rƀah in chờ hờp wă rò sơnam pa, sa tềp bal mờ khà dong kờl tơl hìu rƀah là 600 rbô đong, tơl hìu mờr ndrờm bè hìu rƀah là 300 rbô đong. Bal mờ hơ̆, Ủy ƀan Mặt trận dà lơgar Việt Nam mờ mpồl cau ală kâp kung hòi jà tă pơgồp gĭt nđờ jơ̆t rbô bơnah phan pà nàng sền gròi dong kờl sa tềp làng bol in. Ồng A Định, Ƀí thư Ci ƀộ mơkung là Kwang ătbồ thôn Đăk Bung, xã Đăk Rơ Nga, kơnhoàl Đăk Tô, pà gĭt: Ci ƀộ thôn Đăk Bung geh 14 nă đảng viên, nàng kờñ sa tềp tus mờ tơl nă cau, jơh ală hìu, ală đảng viên tàm Ci ƀộ geh jàu kơnòl jăt sền mpồl hìu bơnhă neh kờp sền, sền swì bơta geh ngan tàm rài kis bơh jơh 161 hìu bal mờ 885 nă cau bơh thôn dê nàng sền gròi dong kờl sa tềp ai tơl hìu làng bol in. Ồng A Định, đơs: Lài mờ sa tềp, bol hi neh kờp sền wơl ală hìu rƀah mờ ală hìu kal ke nàng dong kờl, dong làng bol geh dồ dơ̆ sa tềp ram mhŭ, chờ hờp chờ hờñ, cau lơi kung geh sa tềp lơm. Bol hi gŏ broă sền gàr brê geh kwơ ngan ai làng bol in, tài bơh să tờm làng bol geh dờp ală bơta dong kờl bơh broă sền gàr brê, làng bol geh tai bơta chờ hờp nàng sa tềp ram mhŭ rlau. Pah nam, Kông ty Trăc ñiệm Hữu hạn dồ nă să Lâm Nghiệp Đăk Tô neh pơgồp bal mờ thôn kờp sền wơl ală hìu rƀah, hìu kal ke nàng lơh sră cih mat dong kờl phe sa mờ ală phan bơna kờñ pal geh ndai ai làng bol in, Kông ty sền gròi ngan làng bol tàm dơ̆ sa tềp, dơ̆ lơh chờ, nam lơi kung pà lơm phan ai làng bol in.

Mờr 230 hìu bơnhă làng bol kòn cau Bahnar tàm ƀòn Dơk Rơng – ƀòn Ƀòn lơgar pa tàm xã Glar, kơnhoàl Đăk Đoa, càr Gia Lai wă rò nam pa 2024 bềng lìu bơta chờ hờp tŭ kàl lơh sa tơnhàu geh uă, giă tac phan bơh suơn sre gơguh jơnhua, ngan là kơphe. Jơh ală hìu bơnhă làng bol tàm ƀòn ndrờm geh suơn kơphe, tiêu, plai màk.. hìu lơi dùl êt den kung geh 2, 3 sào, ai hìu lơi uă den geh bơh 4 tus 5 lồ. Nam lài, mờr 20 hìu bơnhă làng bol lơh geh priă jền rlau 1 tơmàn đông bơh tờm kơphe mờ mìng kờp bơh pik tơnhàu jơh kơphe, làng bol tàm ƀòn neh blơi rlau 50 nơm rơndeh măi kas priă. Mut tàm nam do, làng bol ƀòn Dơk Rơng pin dờn lơh broă, lơh sa pơn jat tai lơh geh priă jền uă. Kra ƀòn ồng Vut đơs: Nam tus, làng bol rơp lơh ngan tam gơl bồ tơngoh kơlôi sơnơng bè bơta chài lơh broă, sơngka sền gàr chi tam, pal sơngka sền gàr gơ in niam nàng tờm kơphe lơh geh cồng nha tơnhàu uă. Làng bol chờ hờp ngan tŭ klo yal, tŭ do neh geh sơntìl kơphe pa ai cồng nha tơnhàu uă rlau, lài do là kơphe TR4 làng bol neh chờ hờp ngan, ai tŭ do geh tai sơntìl pa là kơphe nha pơ ò, kơphe tơlir lồl ai cồng nha tơnhàu uă ngan, kong jai mờ kòp tu sa aniai den tàng làng bol gam lơh ngan tam ală bơta sơntìl pa ngan do. Làng bol pin dờn ala sơntìl pa rơp lơh geh priă jền uă rlau, rài kis wil tơl rlau, bơtàu tơnguh rlau.

Thị xã An Khê là dùl thị xã neh geh Thủ tướng Cíñ phủ dờp là tiah lơh sir jơh kơnòl broă bơ̆t bơtàu ƀòn lơgar pa. Tơnơ̆ tŭ lơh sir jơh 19 broă jàu ƀòn lơgar pa, thị xã An Khê neh geh bơta tam gơl să bal mờ khà lơh tiah drà mhar, khà gơguh lơh sa uă, priă geh bơh lơh sa kờp bal tơngai bơh nam 2016- 2020 geh 12,75% dồ nam. Rơndăp tăp sèng lơh sa geh bơta tam gơl niam ngan. Ală tiah tềl lời wơl kah yau mờ bơhiàn niam chài sùm geh sền gàr mờ bơtàu tơnguh...Bi Hồ Văn Hay ơm tàm ƀòn Pơ Nang, xã Tú An, thị xã An Khê, càr Gia Lai, yal: Hìu bơnhă añ tàm hìu mìng tam chi tam, tam tàu, tam bùm blàng lơm. Mờ priă lơh geh bơh hìu bơnhă añ dê pah nam kung geh bơh 50 tus 60 tơlak đong sơl, tơl nàng ngui sa tàm hìu bơnhă, ròng kòn lòt bơsram tơl, đơs bal là kung tơl sơl ờ siău siar in, kis di tơl đau. Tàm nam tus, añ rơ̆p lơh ngan lơh sa pơđơl pràn lơh sa mờ mŭt tàm sơnam pa añ dan nting bơr gờm chờ kơ̆p kờñ jơh ală làng bol he geh bơta pràn lơh sa nàng klàs bơh rƀah mờ pơđơl pràn lơh ngan sền gàr niam chài ai làng bol ƀòn lơgar in.

Dăk Gằn là xã ngài gơ wèt kơnhoàl Dăk Mil, càr Dăk Nông. Sa tềp nam do, Đảng ủy, gơnoar atbồ mờ ală mpồl lơh broă cíñ trị, mpồl bơtiàn xã dê tơrgùm uă broă lơh hòi jà ală bơnah priă jền tă pơgồp nàng sền gròi sa tềp ai cau rƀah mờ làng bol jơi bơtiàn dồ êt nă cau tàm ƀòn lơgar in. Ồng Y Srao, Củ tịc Mpồl Cữ thập đỏ xã Dăk Gằn pà git, gùng dà xã dê là ờ lời hìu bơnhă làng bol lơi tài rài kis kal ke mờ ờ geh sa tềp: Mpồl Cữ thập đỏ xã pơgồp bal mờ kâp ủy, gơnoar atbồ mờ ală mpồl bal tơrgùm hòi jà, tă pơgồp nàng sền gròi sa tềp ai cau rƀah, ală hìu bơnhă geh sră dong kờl bơh dà lơgar mờ pà phan ai làng bol tàm ală ƀòn tàm xã in. Bol hi lơh ngan nàng làng bol wă rò sa tềp ram mhŭ, ring lơngai, chờ hờp, ờ lời hìu bơnhă làng bol lơi ờ geh sa tềp. Di nam pa tus, nting bơr jơh gùt làng bol pràn kơldang, lơh sa bơtàu tơnguh, tam klac rlau tai tàm ƀòn lơgar, hơ̆ là bơta mờ añ kơp kờñ ngan rlau jơh.

Mut tus bal pa Giáp Thìn 2024, nàng tơl nă cau, tơl hìu ndrờm geh sa tềp, ală mpồl lơh broă, anih lơh broă, mpồl cau bơyai lơh uă broă lơh sa tềp, neh at tê bal mờ gơnoar atbồ tàm ƀòn lơgar ală càr Tây Nguyên sền gròi sa tềp ai làng bol in, ngan là cau rƀah, cau kal ke, cau lơh phan, cau lơh broă,… wă rò dùl sa tềp ram mhŭ, hờm ram, wil tơl bal mờ bơta lơh ngan ờ lời hìu bơnhă lơi pal siơ̆u siar, jơgloh tàm dơ̆ sa tềp dà lơgar nam Giáp Thìn 2024.

Xã tiah nhàr lơgar Quảng Trực, kơnhoàl rƀah 30a Tuy Đức là dùl tàm ală xã gam uă kal ke ngan bơh càr Dăk Nông dê. Ồng Điểu Khanh, Phó Củ tịc Ủy ƀan Ñân zân xã pà gĭt, xã geh khà hìu rƀah gam uă sơl. Ngan là tàm nam 2023 pa do, tàm xã neh gơlik geh ală jơnau gơmù ù, tơrlah ù tài bơh trồ tiah lơh aniai lơh uă hìu làng bol gơtìp gơ ơm tàm rài kis kal ke. Den tàng bè hơ̆, broă sền gròi dong kờl sa tềp ai làng bol tàm xã in geh Đảng ủy, Gơnoar ătbồ xã sền gròi uă ngan, bal mờ jơnau đơs jơh ală cau, jơh ală hìu ndrờm geh sa tềp lơm. Ồng Điểu Khanh, đơs: Dơ̆ sa tềp do, xã Quảng Trực bol hi pơđơl pràn lơh ngan hòi jà, tă pơgồp bơh ală mpồl lơh sa kă bro, cau geh nùs nhơm niam nàng sền gròi dong kờl sa tềp ai làng bol in, ngan là hìu bơnhă rƀah, hìu bơnhă kal ke. Bol hi jơh nùs lơh ngan nàng jơh tơl hìu, jơh tơl nă cau ndrờm geh sa tềp mờ wă rò sơnam pa dồ bă chờ hờp chờ hờñ.

Pa do, ală pôs ling sền gàr tiah nhàr dà lơgar gơ wèt Gah đơng lam Mpồl ling sền gàr tiah nhàr dà lơgar càr Gia Lai neh bơyai lơh broă lơh “Nam pa sền gàr tiah nhàr dà lơgar – Ram nùs làng bol ƀòn lơgar” dơ̆ dùl dơ̆ tàm ală xã tiah nhàr dà lơgar kơnhoàl Ia Grai, Đức Cơ, Chư Prông. Tàm tơl broă lơh, ală cau ling sền gàr tiah nhàr dà lơgar bal mờ làng bol tàm ƀòn lơgar klơm mbar lơm pòng, dròng cing jañ mồng, tìp mat đơs crih tamya nàng sơlơ tàm tơrbŏ tai nùs nhơm đềt mềr ling klàng làng bol. Bal mờ hơ̆, ală cau geh nùs nhơm niam gam bơyai lơh ală anih tac phan 0 đông, bơh hơ̆ jàu pà làng bol in git nđờ rhiang bơnah phan là ồi tơ̆, kơmùng bic, phe mờ sră măi, sră cih, phan ngui bơsram sră ai kơnòm bơsram in. Bơh hơ̆ dong làng bol geh wă rò dùl dơ̆ sa tềp hờm ram, wil tơl rlau. Thượng úy Siu Thương – Pôs ling sền gàr tiah nhàr dà lơgar Ia O đơs bè broă sền gròi sa tềp ai cau rƀah, kơnòm dềt, cau jơi bơtiàn dồ êt nă cau tàm ală xã Ia O, Ia Chía: Pah nam, pah tŭ nam pa tus, pôs ling sền gàr tiah nhàr dà lơgar Ia O, càr Gia Lai mù tàm ƀòn bơyai lơh sa tềp, chờ hờp nam pa bal mờ làng bol, mờ kung là tŭ nàng pôs ling sền gàr tiah nhàr dà lơgar mờ làng bol geh tìp mat. Gah đơng lam mpồl ling sền gàr tiah nhàr dà lơgar càr kung sồr Pôs ling sền gàr tiah nhàr dà lơgar Ia O tàm ală dơ̆ wă rò nam pa lòt pà phan ai ală hìu bơnhă kal ke in. Pơn jat hơ̆, ală cau kra ƀòn, cau atbồ thôn là ală cau dong kờl jơh nùs ngan ai pôs ling sền gàr tiah nhàr dà lơgar in tàm broă lơh mblàng yal. Tàm dơ̆ sa tềp dà lơgar nam do, Pôs ling sền gàr tiah nhàr dà lơgar kung neh lòt pà phan ai ală hìu bơnhă geh màng mờ dà lơgar, tơl bơnah phan kờp priă 300 rbô đông, pơgồp bơnah cèng sa tềp ram mhŭ, chờ hờp nàng làng bol bal mờ ling sền gàr tiah nhàr dà lơgar sơlơ tam klac rlau tai tàm broă lơh bơt bơtàu lơngap lơngai tiah nhàr dà lơgar.