Tàm ngai chờ pơlam rơwah kơnòm bơsram, yal broă lơh ai kơnòm bơsram kấp 2 in, oh Trần Thùy Tú, bơsram ơdŭ 9D, hìu bơsram kấp 2 Thành Nhất, ƀòn dờng Buôn Ma Thuột rơcang iăt, nền nòn cih mờ rơcang geh jơnau lùp. Oh Trần Thùy Tú pà git: “Bơh ngai chờ do oh wă rơlao bè jơnau kờñ bơh broă bơto bơtê kung bè bơsram broă lơh tàm ală hìu bơsram broă lơh. Den tàng geh dùl broă rơwah niam ai ală bơyô in ờ tơl pràn ha là ờ jai in. Ală bơyô geh lơh ngan nàng bơtàu tơnguh să tờm kung bè rơwah broă lơh di pal mờ să tờm dê rơlao”.

Do là nam sơnrờp Sở Giáo dục mờ Đào tạo càr Dăk Lăk bơyai lơh “Ngai chờ pơlam rơwah kơnòm bơsram, yal broă lơh ai kơnòm bơsram kấp 2 in”. Pơgru Nguyễn Thị Lương, bơto tàm hìu bơsram kấp 2 Nguyễn Thị Minh Khai, ƀòn dờng Buôn Ma Thuột pà git, Rơndăp broă “Bơto jăt gùng dà broă lơh mờ ai geh gùng dà tam cah kơnòm bơsram tàm broă bơto mờ bơsram 3 kấp tàm càr Dăk Lăk tơngai bơh nam 2018 tus 2025 neh geh lơh bơh jŏ, mơya geh uă ală hìu bơsram lơh is broă rơndăp lơh mblàng yal den tàng cồng nha bal mờ bơta ring bal ờ hềt geh uă. Tàm tŭ kơnòm bơsram kờñ jòi nàng git bè broă bơsram broă lơh ngai sơlơ geh uă. Pơgru Nguyễn Thị Lương pà git: “Geh ờ uă bơta ờ jăk bè bơsram sră mơya jăt ngan bè ală gah broă lơh ndai, den tàng ală kơnòm bơsram sền gròi uă ngan tus mờ broă jòi sền nàng git. Bè ală dơ̆ pơlam bè do, kơnòm bơsram tàm hìu bơsram añ bơto dan tus bal gal ngan, kờñ tus bal jòi sền nàng git nền nòn rơlao bè ală hìu bơsram trung kấp lơh broă”.

Tus bal pơlam rơwah kơnòm bơsram, yal broă lơh ai kơnòm bơsram kấp 2 in, ồng Đặng Như Thanh, ala măt hìu bơsram Trung kấp Dăk Lăk đơs là, do là broă lơh geh kwơ nàng dong kờl ală oh rơcang lài rơlao tàm broă jòi sền nàng git mờ rơwah gah broă bơsram di pal đah bơta pràn, bơta kờñ gơboh să tờm bal mờ jơnau kờñ mpồl bơtiàn dê. Broă bơsram broă lơh gam geh nàng ală kơnòm bơsram in geh bơsram broă, mờ gam pơgồp bal tàm broă tơmù priă tă. Ồng Đặng Như Thanh pà git: “Ală kơnòm bơsram geh bơsram sră jăt jơnau bơsram 3 kấp dê, mờ geh bơsram broă lơh, den tơnơ̆ 3 nam ală oh geh dơ̆ lĕ bal geh bàr sră dờp: Kấp 3 mờ sră dờp broă lơh. Bơh tŭ hơ̆, ală oh geh gơnoar bơsram tai tus Kao đẳng, Đại họk nàng pơn jăt tai lơh jăt jơnau kơ̆p kờñ bơh să tờm dê. Bơdìh hơ̆ tai Dà lơgar tŭ do geh uă gùng dà broă dong kờl ai ală kơnòm bơsram in geh bơsram broă lơh mờ geh bơsram sră ndang, ală gùng dà broă lơh do geh uă bơta niam ngan”.

Nam bơsram 2024-2025, càr Dăk Lăk kờp dŭ geh di pơgăp 31 rơbô nă kơnòm bơsram jơh bơsram kấp 2, gơguh rơlao 2 rơbô dơ̆ pơn drờm mờ nam bơsram lài. Tàm khà do geh di pơgăp 23 rơbô nă oh geh mŭt bơsram tàm ală hìu bơsram kấp 3 jăt jơnau geh ai, rơlao 4 rơbô nă kơnòm bơsram mŭt bơsram tàm Hìu bơto broă lơh – Hìu bơsram sùm, khà kơnòm bơsram gam tai geh wèt mŭt bơsram broă lơh jăt Rơndăp broă “Bơto broă lơh mờ wèt gùng dà tam cah kơnòm bơsram 3 kấp tàm càr Dăk Lăk tơngai bơh nam 2018 tus 2025”. Jăt ồng Đỗ Trường Hiệp, Phó kwang atbồ Sở Giáo dục mờ Đào tạo càr Dăk Lăk pà git, Sở do gam tơnguh broă bơyai lơh pơlam rơwah kơnòm bơsram, yal broă lơh ai kơnòm bơsram kấp 2 in nàng ală oh gơtùi rơwah gùng dà broă lơh di pal. “Gah Bơto mờ bơsram pơn jăt tai tơnguh uă jơnau git wă ai mpồl cau pơgru in, kwang bàng atbồ, mpồl cau pơgru, tàm hơ̆ uă ngan là kơnòm bơsram, cau mè bèp kơnòm bơsram mờ gùt mpồl bơtiàn git broă tam cah kơnòm bơsram tơnơ̆ mờ tŭ neh jơh bơsram kấp 2 là kwơ màng. Ală kơnòm bơsram tam gơl rài kis bơh să tờm, broă bơsram sră bơh să tờm dê mờ broă ờ mìng geh gùng dà bơsram sră mờ gam gơtùi tus mờ gùng dà bơsram broă lơh mờ gơtùi ai geh rài tơnơ̆ do bơh să tờm dê bơh broă bơsram broă lơh”.

Bơh broă lơh pràn broă pơlam rơwah kơnòm bơsram, yal broă lơh, kơ̆p kờñ tàm tơngai tus, cau mè bèp kơnòm bơsram bal mờ kơnòm bơsram jơh bơsram kấp 2 tàm càr Dăk Lăk geh ală gùng dà broă rơwah di pal, pleh mờ bơta lòt jòi hìu bơsram bè ală nam bơsram lài.