Tus bal Ngai chờ lơh broă geh UɃÑZ ƀòn dờng Buôn Ma Thuột pơgồp bal mờ Anih tờm Drơng ala broă lơh càr Dăk Lăk bơyai lơh bồ nhai 05 pa do, Kông ty TNHH Vũ Nguyên Bio kờñ rơwah geh 30 nă cau lơh broă. Mơya cồng nha ờ lơh geh jăt jơnau kơ̆p kờñ. Lŏ Nguyễn Thị Ý Nga, Kwang atbồ Kông ty pà git, pah nhai Kông ty kờñ rơwah di pơgăp 50 nă cau mờ ală gah broă bè: cau klài dà, cau chài spa, nail, geh broă lơh drơng ala bè lòt nhơl, hìu năc ơm nàng ai dà kă bro in, mơya bơh bồ nam tus tŭ do mìng rơ̆p rơwah geh 30 nă cau lơh broă. Lŏ Nguyễn Thị Ý Nga pà git: “Tŭ do khà cau lơh broă kờñ geh cau lơh broă bơh Kông ty dê kung gam ờ hềt tơl, tài Kông ty geh 3 anih lơh broă là Dăk Lăk, Dăk Nông mờ Phú Yên. Ờ geh tơl cau lơh broă den tàng kung gam ờ hềt gơtùi ai tơl cau lơh broă tàm anih dơ̆ 3 in”.

Là mpồl lơh sa kă bro gam geh khà cau lơh broă gal ngan tàm càr Dăk Lăk dê, mờ di pơgăp 1 rơbô 500 nă. Kông ty Able Joy tàm tiah lơh sa mờ măi mok Hoà Phú kung gam gơtìp kal ke tàm broă rơwah cau lơh broă. Ồng Trần Chí Vĩ, Phó Kwang atbồ dờng Kông ty Able Joy yal, tŭ do kông ty gam rơcang ai mŭt lơh broă anih dơ̆ 2. Tàm anih lơh broă do kờñ rơwah cau lơh broă di pơgăp 3 rơbô nă cau. Bơh bồ nam tus tŭ do, Kông ty neh pơgồp bal mờ uă broă lơh, mờ uă mpồl lơh broă nàng rơwah geh cau lơh broă, mơya mìng dờp geh di pơgăp 300 pang sră dan cih măt. Sră dan blơi phan gơguh, hìu lơh broă pa mờr mŭt lơh broă, mơya cau lơh broă ờ hềt geh tơl neh lơh Kông ty pal geh ală gùng dà broă lơh nàng gàr tơl niam pang sră dan blơi phan. Ồng Trần Chí Vĩ pà git: “Pang sră dan blơi phan nam 2024 den gơguh 50%, hìu lơh broă jăt broă rơndăp lơh là bơh ngai 01 nhai 6 geh lơh gơs, bơta tờm tŭ do là cau lơh broă, di lah geh den he rơcang lơh, mơya tŭ do gam kờñ jòi cau lơh broă. Di lah ờ jòi geh cau lơh broă den pal jòi jơh bơh tàm ală anih lơh broă ndai, kông ty ndai dong kờl lơh broă nàng gàr niam pang sră dan blơi phan neh geh”.

Jăt jơnau yal bơh Anih tờm Drơng ala broă lơh càr Dăk Lăk yal, tàm quý I nam 2024 geh rơlao 50 mpồl lơh broă, mpồl lơh sa kă bro tus bal tàm 13 dơ̆ lơh broă nàng jòi cau lơh broă geh Anih do bơyai lơh mờ jơnau kờñ rơwah geh rơlao 7 rơbô nă cau lơh broă. Anih do kung neh pơlam broă lơh mờ yal broă lơh ai rơlao 12 rơbô nă cau in sơl, mơya mìng geh 440 nă cau lòt lơh broă tơnơ̆ mờ tŭ yal. Kung tàm quý I nam 2024 sơl, Anih do neh dờp mờr 1 rơbô 500 pang sră dan dờp ƀảo hiểm roh broă lơh. Jơnau kờñ rơwah cau lơh broă uă, khà cau dờp ƀảo hiểm roh broă lơh gơguh, mơya ờ hềt geh tơrbŏ bal niam đah cau lơh broă mờ đah mpồl rơwah cau lơh broă, do là bơta krơi is gam gơtìp tàm càr Dăk Lăk dê.

Mblàng bè bơta gơkòl do, ồng Nguyễn Văn Cường, Phó Kwang atbồ Anih Drơng ala broă lơh càr Dăk Lăk pà git: “Geh uă cau lơh broă rê dờp priă dong kờl ƀảo hiểm roh broă lơh mờ tơngu me tờm là dờp priă dong kờl lài, tơnơ̆ mờ hơ̆, hơ̆ sồng jòi boă lơh tai. Geh ờ uă cau kờñ jòi broă lơh mơya priă geh tàm càr Dăk Lăk ờ uă rơlao mờ ală càr hờ đah jum dê, den tàng cau lơh broă ờ kờñ mŭt lơh broă”.

Ồng Nguyễn Quang Thuân, Phó Kwang atbồ Sở Lao động Thương ƀiñ mờ Xã hội càr Dăl Lăk đơs nền, càr gam geh cau lơh broă uă mờ di pơgăp 1 tơlăk 200 rơbô nă cau tàm sơnam lơh broă. Ală nam do, Sở Lao động Thương ƀiñ mờ Xã hội càr neh lơh pràn broă pơgồp bal, bơto, pơlam, yal broă lơh đah ală cau lơh broă mờ mpồl lơh sa kă bro, đah mpồl lơh sa kă bro mờ ală tiah nàng tơrbŏ bal geh mờ kờñ. Mơya, cồng nha ờ hềt geh di jăt mờ jơnau kơ̆p kờñ. Ồng Thuân đơs là, bơh bơta kal ke tàm broă jòi cau lơh broă, den mpồl lơh sa kă bro pal tơnguh uă priă nhai nàng gàr cau lơh broă. Ồng Nguyễn Quang Thuân pà git: “Cau lơh broă bè ờs gal ngan, geh tŭ cau lơh broă neh bơsram broă lơh kung gal sơl. Bơta tàm do là cau lơh broă tus mờ ală mpồl lơh broă lah ờ den jăt mờ tàm uă bơta, tàm hơ̆ geh bơta bè priă nhai, bơta bè rài kis lơh broă sa mpồl bơtiàn, bè tiah lơh broă den hơ̆ là ală bơta mờ ală mpồl lơh sa kă bro kờñ geh bơta tam gơl pa, cau lơh broă kung pal gơdờp bal nàng bàr gah geh tìp bal”.