VOV4.K’ho- Mìng tàm rlau 4 jơ, kờp bơh 2 jơ 8 phuk mho tus rlau 6 jơ 4 phuk mang ngai 23/8, tàm kơnhoàl Kon Plông, càr Kon Tum neh pơn jat sùm gơlik geh 7 dơ̆ tơrluh ù. Ală dơ̆ tơrluh ù mờ khà gơlik geh tàm rơndil tŭ tơngai mờ broă dơng dà bơh tơnau dơng dà hìu măi pờ tơlik ồs đèng Thượng Kon Tum dê gam geh uă cau jak chài sền là dùl tàm ală bơta lơh gơlik ală dơ̆ tơrluh ù tàm tiah kơnhoàl Kon Plông, càr Kon Tum. Jơnau yal bơh Ủy ƀan Ñân zân kơnhoàl Kon Plông ai gŏ, ờ hềt git gŏ hoàc huơr lơi uă tài bơh ală dơ̆ tơrluh ù lơh gơlik.

Tơnau dơng dà hìu măi pờ tơlik ồs đèng Thượng Kon Tum geh sền là dùl bơta digơlan lơh gơlik bơta tơrluh ù tàm kơnhoàl Kon Plông, càr Kon Tum

Bơh kờp sền bơh gơnoar atbồ ală xã bơh kơnhoàl dê, mìng geh dùl hìu bơnhă làng bol tàm thôn Đăk Chờ, xã Đăk Ring gơtìp gơ rềng tài bơh tơrluh ù. Mùl màl, tàm bơnah rơkàng hìu đah ngkời hìu mùl neh gơbàn ờ diơng bơh hìu bơnhă làng bol dê geh gak kiă gơ dùh. Gơnoar atbồ xã Đăk Ring neh sồr cau tus sền mờ dong hìu bơnhă làng bol lơh niam wơl mơ tơn. Bơdìh hơ̆ tai, Ủy ƀan Ñân zân kơnhoàl ờ hềt git gŏ hoàc huơr lơi bè kòn bơnus mờ phan bơna tài bơh ală dơ̆ tơrluh ù lơh gơbàn.

Cau mblàng K’Duẩn